Yu No Mas Fraet Blong Prij
1. ?Yu mas gat strong tingting blong yu no fraet blong mekem wanem? ?From wanem?
1 ?Olsem wanem? ?I gat sam taem we yu wantem prij long ol fren blong yu long skul, be yu no mekem from we yu fraet se bambae oli jikim yu? I tru, yu mas gat strong tingting, blong yu no fraet blong toktok long narafala, antap moa sipos yu yu gat fasin blong sem. ?Wanem samting i save givhan long yu?
2. ?From wanem yu mas waes sipos yu wantem prij long skul?
2 Yu Mas Waes: I stret nomo we yu tingbaot skul olsem spesel teritori blong yu blong prij. Be yu no mas ting se yu mas tokbaot trutok long evriwan long skul, olsem we yu stap prij long ol haos wanwan. Yu mas waes blong save wetaem i stret blong toktok. (Pri. 3:1, 7) Maet wan wok we klas blong yu i mas mekem no tokbaot, i givim janis long yu blong yu talemaot bilif blong yu. Sipos no, maet wan fren blong yu long skul i askem from wanem yu yu no joen long sam samting long skul. Long stat blong yia, sam Kristin oli talemaot long tija blong olgeta se oli Witnes blong Jehova, mo oli givim wan buk we i eksplenem bilif blong yumi. Sam narafala oli lego wan buk long tebol blong olgeta, blong pulum tingting blong ol fren blong olgeta.
3. ?Yu save mekem wanem blong yu rere gud blong prij long skul?
3 Yu Mas Rere Gud: Sipos yu rere gud, bambae tingting blong yu i strong moa. (1 Pita 3:15) Taswe, yu mas tingting rere long ol kwestin we maet ol fren blong yu oli save askem, mo yu tingbaot wanem ansa we yu save givim. (Prov. 15:28) Sipos i oraet, yu save lego Baebol blong yu i stap long skul wetem sam buk olsem Reasoning buk, Ol Yangfala Oli Askem, mo ol buk we oli tokbaot olgeta samting we God i mekem. Olsemia nao yu save yusum olgeta taem yu nidim. Yu save askem long papa mama blong yu, sipos long taem blong famle wosip, yufala i save mekem pleplei blong trenem yu blong prij long skul.
4. ?From wanem yu mas gohed blong prij long skul?
4 Yu Mas Gat Gudfala Tingting: Yu no mas ting se sipos yu tokbaot trutok, bambae ol fren blong yu oli jikim yu. Maet sam oli respektem yu taem oli luk se yu yu no fraet blong toktok, mo maet bambae oli lesin. Be tingting blong yu i no mas foldaon sipos oli no wantem lesin. Jehova bambae i glad long yu from we yu traehad. (Hib. 13:15, 16) Yu mas gohed blong askem long hem, blong i givhan long yu blong ‘talemaot ol tok, we tingting blong yu i strong.’ (Wok 4:29; 2 Tim. 1:7, 8) Yu traem tingbaot bigfala glad we bambae yu yu kasem sipos wan long ol fren blong yu i lesin. !Maet wan dei hem i save kam wan man blong Jehova!