Gobak Long Skul

¹ Long manis Maj, ol pikinini blong yumi oli statem wan nyufala yia long skul. I gat sam gudfala samting we yumi save tingbaot long saed ya, be i gat sam narafala samting tu we yumi wari from. Plante yangfala oli gat ol nyu tija, ol nyu kos, mo oli mas joen wetem ol studen we oli no save olgeta. Ol yangfala blong yumi oli wantem wokgud wetem ol tija mo joengud wetem ol narafala studen, be oltaem oli mas tingbaot se oli mas blokem eni samting we i save spolem olgeta long saed blong speret.​—⁠1 Kor. 15:⁠33.

² Wan bigfala samting we ol pikinini blong ol Wetnes oli mas blokem, se ol doti fasin blong wol, we naoia oli fulap long ol skul long plante kantri. Olgeta Kristin, nating se oli yangfala no oli olfala, oli mas gat strong tingting blong tanem baksaed long ol rabis fasin mo tingting long saed blong seks, we naoia wol i stap leftemap. Mo oli mas stadi long Tok blong Jeova mo folem ol advaes blong Hem, blong mekem se oli ‘gohed blong lukaotgud.’ (Sam 119:⁠9) Ol papa mama we oli kea long ol pikinini blong olgeta, oli mas save long saed blong program blong skul, nao oli save givim stret advaes long ol pikinini blong olgeta. Sipos samting we oli stap tijim long ol pikinini long skul no samples bakegen, i no laenap wetem klin mo tabu fasin we Jeova i wantem se ol man blong hem oli mas folem, oli no mas kasem tijing ya.​—⁠1 Pita 1:​15, 16.

³ Mo tu, plante taem i gat kwestin i kamaot long saed blong ol seremoni blong leftemap kantri, ol lafet blong holide, ol spot, no sam lafet blong pulum ol pikinini oli joen wanples. Buklet ya School and Jehovah’s Witnesses i save givhan long ol Kristin yangfala long ol taem olsem. Ol papa mama blong ol smol pikinini oli save blokem no winim sam problem taem oli go luk ol tija kwiktaem wetem buklet ya. Oli save eksplenem long tija se bambae buklet ya i givhan long hem blong kasem save from wanem ol Wetnes blong Jeova oli no joen long sam haf blong program blong skul. Fasin ya blong eksplenem long tija i save givhan bigwan blong mekem se tija mo studen mo ol papa mama oli wokgud tugeta.

⁴ Antap long hemia, i gud sipos ol Kristin studen oli putum wan School buklet i stap wetem ol narafala buk we oli karem i go long skul. Plante taem oli gat jans blong toktok wetem ol narafala studen we oli askem kwestin, taem wan samting i kamaot long saed long bilif blong olgeta. Mo tu, oltaem ol pikinini blong ol Wetnes oli mas karem Kad blong talem No Blad, no Aedentiti Kad blong olgeta, we i nyuwan, mo we oli saenem long stret rod, mo i gat man i wetnes long hem. Ol yangfala we oli folem ol advaes ya, oli olsem ‘wan waes man we i luk trabol finis, ale hem i haed.’​—⁠Prov. 22:⁠3.