DVD Ya: Jehovah’s Witnesses—Organized to Share the Good News
Bitim 100 yia finis, ol Witnes blong Jehova oli wok folem wan plan blong talemaot gud nius. Wok ya blong prij i bigwan moa i bitim ol narafala wok we man i mekem samtaem. Yumi talemaot gud nius ya long plante handred lanwis, mo long bitim 230 kantri. (Mat. 24:14) ?From wanem wok ya i impoten? ?Wanem i mekem se wok ya i gohed long olgeta ples long wol? DVD ya, Jehovah’s Witnesses—Organized to Share the Good News, i givim ansa blong ol kwestin ya. Hem i soemaot ol defdefren haf blong wok blong yumi we i stap gohed long olgeta ples long wol. I gud yu wajem DVD ya, mo biaen, yu traem ansarem ol kwestin ya:
?DVD ya i givhan long yu olsem wanem, blong yu tinghae (1) long hadwok we ogenaesesen blong Jehova i mekem, blong talemaot gud nius? (2 Tim. 4:2) (2) long olgeta we oli wok long ol Betel raon long wol? (3) long trening we ol seket elda mo ol misinari oli stap kasem? (2 Tim. 2:2) (4) long fasin blong ridim vas blong dei evri dei, mo blong rerem ol defdefren miting blong kongregesen? (Wok 17:11) (5) long ol Kristin miting blong yumi? (Hib. 10:24, 25) (6) long ol blesing we bambae yu kasem taem wol ya i kam Paradaes? (Aes. 11:9) (7) long janis we yu yu gat blong joen long wok ya blong tekem kakae long garen?—Jon 4:35.
Yumi save yusum nambawan DVD ya, blong givhan long ol man we oli laekem trutok, blong oli save wok ya we ol Witnes blong Jehova oli stap mekem raon long wol. (8) ?Wetaem i stret blong soemaot DVD ya long ol Baebol studen, ol famle blong yumi, mo ol narafala? (9) ?Taem yu soem DVD ya long ol man, yu luk se oli mekem wanem samting we i soemaot se oli glad?
Taem yumi tingting dip long bigfala wok we Jehova i mekem, yumi wantem talem semfala tok ya blong man blong raetem Sam, se: “Hae God, yu yu God blong mifala. Yu yu mekem plante samting finis blong givhan long mifala. I no gat narafala god we i olsem yu.” (Sam 40:5) Yumi mas yusum gud DVD ya blong givhan long ol narafala, blong oli kasem save long Jehova mo ogenaesesen blong hem.