Ol Tul We Oli Tijim Man, Pulum Tingting, Mo Givim Paoa
1 Ol tul ya oli gat paoa blong tijim ol man long saed blong Baebol mo ol Witnes blong Jeova. Oli pulum tingting blong plante man blong tekem wan strongfala disisen blong folem trutok. Oli givim paoa long ol man blong God blong mekem se bilif mo fasin tangkiu blong olgeta long God i kam strong moa. ?Wanem ol tul ya? Hemia ol video kaset we ogenaesesen blong Jeova i wokem. ?Yu yu wajem ol ten video kaset ya finis? ?Wetaem nao yu bin wajem olgeta? ?Longtaem finis? ?Yu yusum olgeta blong prij long ol man? Long distrik asembli blong yumi, yumi harem se i gat wan niufala video kaset i kamaot, hemia video kaset namba 11 we nem blong hem Our Whole Association of Brothers. ?Yu yu odarem video kaset ya finis? ?Olsem wanem yu save kasem moa blesing from ol nambawan tul ya?
2 Haf ya “Stadi Oltaem Long Tok Blong God Wetem Famle Blong Yu,” long Wajtaoa blong Julae 1, 1999, i givim advaes ya se, long famle stadi blong yufala, “yufala i save wajem wan haf blong video kaset blong Sosaeti . . . ale biaen yufala i save tokbaot ol haf ya we yufala i luk.” Folem gudfala advaes ya, bambae i gat wan haf long Miting Blong Kingdom Wok evri manis we i tokbaot wanwan long ol defren video kaset ya. Mifala i leftemap tingting blong evriwan long kongregesen blong wajem video kaset ya long haos, bifo long taem we bambae yumi tokbaot hem long Miting blong Kingdom Wok.
3 Long manis ya bambae yumi stat wetem video kaset ya, Jehovah’s Witnesses—The Organization Behind the Name. Wajemgud mo lesingud blong faenem ansa long ol kwestin ya:
◼ ?Ol man oli savegud ol Witnes blong Jeova from wanem samting?
◼ ?Olgeta wok we oli gohed long haos Betel oli laenap wetem wanem vas blong Baebol?
◼ ?Wanem stori blong Baebol we yu bin luk se ol brata oli plei long hem, tekem foto long hem, mo pentem blong putum long ol buk?
◼ ?Wanem samting we yu yu sapraes long hem taem yu luk rod we yumi folem blong rerem ol buk?
◼ ?Stat long 1920 i kam kasem 1990, hamas buk we Sosaeti i bin prentem?
◼ ?Long olgeta man blong God, hu olgeta we oli mas traem blong kasem ol mak blong wok long ol haos Betel?—Prov. 20:29.
◼ ?Long wanem rod famle blong Betel i soem wan gudfala eksampol long evri Witnes blong Jeova?
◼ ?Wanem samting we yu yu laekem tumas long saed blong wok we i stap gohed long haos Betel blong kasem moa man wetem gud nius?
◼ ?Mane blong sapotem wok blong prij long fulwol i kam wea?
◼ ?Yumi mas gat strong tingting blong sapotem wanem wok, mo wanem tingting we yumi save soem long saed ya?—Jon 4:35; Wok 1:8.
◼ ?Wanem tingting blong yu long saed blong ogenaesesen we i stap biaen long nem ya Witnes Blong Jeova?
◼ ?Olsem wanem yu save yusum video ya long wok blong prij?
Long Desemba bambae yumi tokbaot video kaset ya The Bible—Accurate History, Reliable Prophecy.