Ol Video Kaset We Oli Givim Witnes Oli Karem Gudfala Frut
1 “Stat long taem we boe blong mitufala i no save wokbaot yet, kam kasem naoia, hem i stap lukluk video kaset ya bakegen mo bakegen. Hem i no save mestem blong lukluk kaset ya. !I gud tumas we mifala i gat ol tul olsem blong “tijim ol pikinini blong mifala blong laekem Jeova!” ?Wanem video kaset we Kristin papa ya i stap tokbaot? Hemia Noah—He Walked With God. Boe blong wan woman we i no wan Witnes i lukluk video kaset blong Noah long haos blong narafala man. Ale, hem i sanem 9,000 vatu i kam long Sosaeti olsem presen, mo i askem sipos i gat sam moa video kaset blong ol pikinini. Ol video kaset we ogenaesesen blong Jeova i stap wokem, oli givhan long ol yangfala mo ol olfala tugeta.
2 Long Famle: Afta we wan Witnes famle i lukluk kaset ya Jehovah’s Witnesses Stand Firm Against Nazi Assault, mama i talem se: “!Tede, mi stap tingbaot oltaem olsem wanem Jeova i mekem ol man we oli olsem yumi nomo oli stanap strong tru long ol hadtaem we oli bitim mak! Samting ya i mekem mi mi luksave se ol trabol blong mi oli smol nomo. Mitufala i lukluk video kaset ya wetem ol pikinini, mo olgeta tu oli luksave klia naoia se oli mas dipen oltaem long Jeova. Mifala i tokbaot kaset ya tugeta, mo mitufala i givhan long ol gel blong mitufala blong rere moa blong winim ol traem mo trabol we i save kasem olgeta.”
3 Long Skul: Wan yangfala Witnes i givim wan tok long klas blong hem long skul, nao hem i soemaot sam haf blong video kaset ya Stand Firm. Fastaem, tija i talem se hem i no laekem ol Witnes. Afta we hem i lukluk kaset ya, hem i se: “Hemia i jenisim tingting blong mi fulwan long saed blong ol Witnes blong Jeova. !Mi promes se nekis taem oli kam long haos blong mi, bambae mi lesin, mo bambae mi askem olgeta blong mekem Baebol stadi long mi!” ?Wanem samting i jenisim tingting blong hem? Hem i talem se, “trufala lav mo fasin blong stap tru” we ol Witnes oli soemaot.
4 Long Wok Blong Prij: Wan sista i storian wetem wan woman we i no wantem karem wan buk, be hem i askem plante kwestin long saed blong skul blong yumi. Sista ya i karem video kaset ya Jehovah’s Witnesses—The Organization Behind the Name, mo i mekem woman ya wetem man blong hem tufala i lukluk. Tufala evriwan i laekem tumas mo tufala i agri blong stadi Baebol. From gudfala witnes we video kaset ya i givim, tufala i stat blong mekem laef blong tufala i laenap wetem samting we God i wantem.
5 ?Yu yu stap yusum fulwan ol video kaset blong yumi?