Tijim Man Wetem Ol Gudfala Tul We Hem i Save Lukluk
1. ?Olsem wanem Jeova i yusum ol samting we man i save luk blong tijim ol man blong hem bifo, mo wanem samting i kamaot from?
1 Bifo, taem Jeova i wantem talemaot wan impoten save long ol man blong hem, samtaem hem i yusum ol vison mo ol drim. Tingbaot vison we Esikel i luk long saed blong kat blong Jeova long heven. (Esik. 1:1-28) Tingbaot filing blong Daniel afta we hem i luk wan drim we i soemaot ol defdefren politik paoa blong wol. (Dan. 7:1-15, 28) ?Mo olsem wanem long ol nambawan “saen” we aposol Jon i luk long saed blong ol samting we bambae oli kamaot long “dei blong Masta”? (Rev. 1:1, 10, NW ) Jeova i yusum ol samting we oli soemaot aksin mo we oli gat strong kala, blong tijim Esikel, Daniel, mo Jon, mo ol samting ya oli gat bigfala paoa long tingting blong trifala.
2. ?Wanem ol samting we yumi save luk we yumi save yusum blong tijim ol narafala long ol trutok blong Baebol?
2 Sipos yumi wantem tijim ol man long ol trutok blong Baebol long fasin we bambae i isi long olgeta blong rimemba, yumi save yusum ol vidio kaset blong yumi. Ol vidio kaset ya oli soemaot plante defren poen mo oli pulum ol man blong oli trastem Baebol, ogenaesesen blong Jeova, mo ol rul we oli mekem se ol Kristin oli gat wan gudfala laef. Tingbaot sam rod blong yusum ol vidio kaset blong tijim ol man. Biaen i gat nem blong sam vidio kaset we yumi save yusum.
3. ?Yu save yusum wanem samting blong lidim wan Baebol studen i kam long ogenaesesen?
3 Long Wok Blong Prij: ?Yu yu bin storian long wan Baebol studen long saed blong fasin joen blong ol Kristin brata sista raon long wol? Yusum vidio kaset ya Our Whole Association of Brothers blong soem long hem. Yu save givim vidio kaset ya long hem blong hem i wajem bifo we yutufala i stadi, sipos no, yutufala i save wajem kaset ya tugeta long taem blong stadi. Biaen, yutufala i save tokbaot ol kwestin blong tingtingbak we i stap long Kingdom Wok Blong Yumi blong Julae 2003.
4. ?Wanem tul blong tijim narafala we maet ol yangfala Witnes i save yusum long skul?
4 Ol yangfala, sipos skul blong yufala i letem, maet yufala i save askem long tija sipos i oraet blong yufala i soemaot long klas blong yufala, vidio kaset ya Jehovah’s Witnesses Stand Firm Against Nazi Assault, sipos no Faithful Under Trials—Jehovah’s Witnesses in the Soviet Union. Yufala i save talem long tija se sipos i oraet, bambae yufala i mekem rere sam kwestin blong klas i save tokbaot afta. Yufala i save yusum ol kwestin long Kingdom Wok Blong Yumi blong Jun 2001 no Maj 2004, mo jenisim sam long olgeta blong mekem oli laenap wetem klas blong yufala.
5. ?Ol papa mama oli save yusum wanem long famle stadi blong olgeta?
5 Wetem Ol Famle Mo Fren: Ol papa mama, ating longtaem lelebet ol pikinini blong yufala oli no moa wajem vidio kaset ya Young People Ask—How Can I Make Real Friends? ?From wanem yufala i no wajem kaset ya bakegen long nekis famle stadi blong yufala? Long Kingdom Wok Blong Yumi blong Septemba 2002, i gat ol kwestin we oli save mekem se storian blong yufala i klia mo i laef.
6. ?Wanem ol rod we yu save tingbaot blong yusum ol vidio kaset blong yumi?
6 Ol Narafala Rod: ?Wanem ol narafala rod blong yusum ol 20 defren vidio kaset blong yumi? ?Sipos yu soemaot wan no tu kaset long wan we yu stap visitim hem oltaem, hemia bambae i givhan long hem blong i gruap long saed blong spirit? ?Yu save askem sipos yu save soemaot ol kaset ya long ol spesel hospital blong ol olfala no long ol ples we ol olfala oli go long hem blong oli joen wanples? Ol vidio kaset ya oli save mekem se ol famle blong yu we oli no Witnes, olgeta we oli stap raonabaot long yu, no olgeta we yu wok wetem olgeta, oli respektem wok blong yumi. Ol vidio kaset blong yumi oli ol gudfala tul we man i save luk, oli gat paoa mo oli tijim man. Yumi mas yusum olgeta blong tijim ol man.