‘God, Yu Mekem Samting We Yu Yu Wantem’
1. ?Wanem stamba tok blong spesel dei asembli blong seves yia 2012? ?From wanem i gud yumi tokbaot samting ya?
1 Jehova i mekem yumi from we hem nomo i wantem se yumi gat laef. (Rev. 4:11) Taswe, sipos yumi no kasem save long samting we God i wantem, mo yumi no mekem samting ya, bambae laef blong yumi i blong nating nomo. Samtaem i no isi blong mekem samting we God i wantem. ‘Tingting blong yumi i wantem ol samting we yumi stap harem gud long hem,’ mo i wantem “fasin blong ol man we oli no bilif long God.” Taswe, yumi mas faet agensem ol tingting mo fasin ya. (Efes. 2:3; 1 Pita 4:3; 2 Pita 2:10) God i mas givhan long yumi, sipos no, bambae ‘Setan i kasem yumi, i fosem yumi blong mekem ol samting we hem nomo i wantem.’ (2 Tim. 2:26) Long seves yia 2012, spesel dei asembli bambae i givhan gud long yumi, blong yumi wanwan i wok folem namba tri samting we Lodsprea i talem, se: ‘God, yu mekem samting we yu yu wantem.’—Mat. 6:9, 10.
2. ?Wanem ol kwestin we asembli bambae i ansarem?
2 Ol Kwestin We Asembli Bambae i Ansarem: Taem yu stap lesin long ol tok long asembli, i gud yu traem faenem ansa blong ol kwestin ya: ?Taem yumi harem Tok blong God finis, wanem narafala impoten samting we yumi mas mekem? ?Yumi mas mekem wanem blong traem save samting we God i wantem long saed blong yumi? ?From wanem yumi mas wantem blong givhan long ol defren kaen man? ?Yumi mas mekem wanem blong yumi gat wan laef we yumi save harem gud tumas long hem? Ol pikinini mo ol yangfala, ?yufala i mas soemaot long Jehova se yufala i wantem wanem? ?Wanem ol blesing we yumi kasem taem yumi mekem samting we God i wantem? ?From wanem i impoten tumas naoia we yumi leftemap tingting blong ol narafala, mo yumi mekem bilif blong olgeta i strong?
3. ?Yu save mekem wanem blong asembli ya i givhan gud long yu?
3 Yu mas meksua se yu stap long asembli ya mo yu lesin gud long evri tok. Ating bambae i gat wan brata blong Betel no wan seket elda i stap, blong givim sam tok. Yu no mas fraet blong go storian wetem hem mo woman blong hem, sipos hem i mared. Yu save mekem olsem bifo mo afta long asembli, mo long medel dei. Taem yu gobak long haos, yu no mas ‘fogetem ol samting we yu harem.’ Yu save tokbaot ol samting ya wetem famle blong yu, mo yufala i traem luk wanem moa we yufala i save mekem blong wok folem samting we God i wantem.—Jem. 1:25.
4. ?From wanem i impoten we yumi putum samting we God i wantem, i stap long fas ples long laef blong yumi?
4 Ol man we oli stap ronem ol samting we tingting blong olgeta nomo i wantem, mo we oli no wantem mekem samting we Jehova i wantem, klosap nao bambae oli lus. (1 Jon 2:17) Yumi talem tangkiu long Jehova from ol nambawan save ya we hem i givim long yumi long stret taem. !Ol save ya i givhan long yumi blong putum samting we God i wantem i stap long fas ples long laef blong yumi!