Jehova i Trenem Yumi Blong Mekem Wok Ya
1. ?Taem Jehova i givim wan wok long ol man, hem i givim wanem moa?
1 Taem Jehova i givim wan wok long ol man, hem i givim ol samting tu we oli nidim blong mekem wok ya. Yumi traem tingbaot Noa. Hem i no save olsem wanem blong bildim wan sip, be taem Jehova i givim wok ya long hem, hem i talem tu olsem wanem blong bildim sip ya. (Jen. 6:14-16) Yumi traem tingbaot Moses, wan man we i gat tingting daon mo i lukaot long ol sipsip. Taem Jehova i talem long hem blong i go toktok long ol lida blong Isrel mo long King, Hem i talem long hem se: “Bambae mi mi givhan long yu long toktok blong yu, mo bambae mi talem long yu wanem we yu yu mas talemaot.” (Eks. 4:12) Jehova i givim wok long yumi blong talemaot gud nius, be hem i talem tu olsem wanem blong mekem wok ya. Hem i yusum Tiokratik Skul mo Miting Blong Kingdom Wok, blong trenem yumi. ?Yumi mas mekem wanem blong trening ya i givhan long yumi?
2. ?Yumi save mekem wanem blong Tiokratik Skul i givhan gud long yumi?
2 Tiokratik Skul: Bifo we yu go long miting, yu mas ridim mo stadi long ol save we bambae i kamaot long skul ya. Biaen, taem yu luk olsem wanem olgeta we oli mekem ol tok oli yusum ol save ya, bambae yu lanem plante moa samting long saed blong fasin blong tijim man. (Prov. 27:17) Taem yu kam long miting, yu mas karem buk ya Ministry School wetem yu, mo yu save raetem ol not long hem. Taem elda we i lukaot long skul i yusum buk ya blong givim advaes, yu save putum wan laen aninit long ol impoten poen we yu yu wantem folem. Mo tu, yu save yusum spes we i stap long pej blong raetemdaon sam save. Be sipos yu wantem se skul ya i givhan moa long yu, rod we i beswan, hemia blong joen long hem. ?Olsem wanem? ?Yu yu putum nem blong yu finis blong joen long skul ya? Taem yu kasem pepa blong tok, yu mas rere gud mo folem advaes we yu kasem. Nao taem yu prij, yu save yusum samting we yu lanem long skul ya.
3. ?Wanem bambae i mekem se Miting Blong Kingdom Wok i givhan long yumi?
3 Miting Blong Kingdom Wok: Bifo we yumi kam long miting ya, yumi mas ridim ol save we bambae i kamaot long miting ya, mo yumi rerem sam ansa. Long rod ya, bambae yumi rimemba gud ol advaes we i kamaot. Sipos yumi givim ansa we i sot nomo, bambae plante narafala oli save givim ansa tu. Yu mas wajem gud ol pleplei, mo yu save yusum ol advaes we yu ting se bambae i givhan gud long yu long wok blong prij. Yu save putum gud ol impoten haf blong Kingdom Wok Blong Yumi, blong yu save yusum olgeta sam taem biaen.
4. ?From wanem yumi mas yusum gud trening we God i givim long yumi?
4 Wok we Noa mo Moses i mekem, i no isi. Sem mak, wok ya blong talemaot gud nius long olgeta ples long wol, i no isi. (Mat. 24:14) Be yumi save mekem gud wok ya sipos yumi trastem Jehova, we i Bigfala Tija blong yumi, mo sipos yumi yusum gud trening we hem i givim long yumi.—Aes. 30:20.