Ansa Long Wan Kwestin

◼ ?I stret we yumi mekem prea taem yumi stanap long doa blong haos nomo, blong mekem Baebol stadi?

Taem yumi mekem prea long stat mo long en blong Baebol stadi, plante gudfala samting i save kamaot. Taem yumi prea, yumi askem long Jehova blong i letem tabu spirit blong hem i lidim storian blong yumi. (Luk 11:13) Mo tu, taem yumi prea, samting ya i mekem se studen i tinghevi moa long stadi we hem i mekem long Baebol. Mo samting ya i tijim hem tu blong i save prea. (Luk 6:40) Taswe, i no longtaem afta we man i stat blong stadi, i gud yumi prea long stat mo long en blong stadi. Be samtaem, wan samting i kamaot nao pablisa i mas stanap long doa blong haos nomo blong mekem stadi. Long taem olsem, hem i mas luksave sipos i stret we hem i prea.

Wan impoten samting we pablisa i mas tingbaot, hemia ples we stadi i stap long hem. Sipos tufala i stadi long wan ples we ol narafala man oli no save luk tufala, pablisa i save mekem wan sot prea long stat mo long en blong stadi. Be sipos tufala i stadi long wan ples we i pulum ae blong ol narafala mo i mekem studen i sem, i moagud we pablisa i no prea. I gud hem i wet kasem taem we tufala i stadi long wan ples we ol narafala oli no save luk tufala, nao hem i jes prea. Nomata weples yumi mekem Baebol stadi, yumi mas skelem gud sipos i stret we yumi prea, no nogat.—Yu save lukluk Kingdom Wok Blong Yumi blong Maj 2005, pej 4.