?Yu Yu Mekem Bes Blong Yu Blong Kasem Olgeta Tijing We i Kam Long Jehova?

1. ?Wanem tingting blong Jehova long tijing we man i mas kasem?

¹ “Bigfala Tija” blong yumi, Jehova, i wantem se yumi kasem tijing. (Aes. 30:20, NW) Taem hem i mekem fasbon Pikinini blong hem, long taem ya nao hem i stat blong tij. (Jon 8:28) Nating se Adam i mekem stronghed, be Jehova i gohed blong tijim yumi ol sinman from we hem i lavem yumi.—Aes. 48:17, 18; 2 Tim. 3:14, 15.

2. ?Wanem program blong tijim man we i stap gohed naoia?

² Tede, Jehova i lidim wan program blong tijim man, we i bigwan moa i bitim olgeta taem bifo. Olsem profet tok blong Aesea i talem, plante milian man long olgeta ples long wol, oli stap wokbaot blong kam long “hil ya we haos blong” Jehova i stap long hem. (Aes. 2:2) ?From wanem oli stap wokbaot i go long hil ya? !Olgeta oli go blong kasem tijing long ol fasin we Jehova i wantem blong oli folem! !Yes, oli go blong Jehova i tijim olgeta! (Aes. 2:3) Long seves yia 2010, ol Witnes blong Jehova oli spenem bitim 1.6 bilian aoa blong prij mo blong tijim ol man long trutok blong Baebol. Mo tu, evri wik i gat bitim 105,000 kongregesen long olgeta ples long wol we oli givimaot tijing we i kamaot long Baebol. Mo slef we i stret mo waes i wokem ol buk long bitim 500 lanwis.

3. ?Wanem gudfala samting we yu yu kasem from tijing we i kamaot long Jehova?

³ Gudfala Samting We Yumi Kasem From Tijing Ya: !Tijing ya we i kamaot long God, i givhan bigwan long yumi! Yumi lanem se God i gat wan nem blong hem mo se hem i tingbaot yumi. (Sam 83:18, NW; 1 Pita 5:6, 7) Yumi lanem ansa blong sam impoten kwestin, olsem: ?From wanem ol man oli safa mo oli ded? ?Mi mas mekem wanem blong mi save kasem glad we i tru? ?From wanem yumi stap laef? Mo tu, Jehova i givim ol rul blong ol gudfala fasin we oli save lidim yumi blong yumi “win” long laef blong yumi.—Jos. 1:8.

4. ?Wanem sam trening we ol man blong God oli gat janis blong kasem? ?From wanem yumi mas mekem bes blong yumi blong kasem olgeta tijing we i kam long Jehova?

⁴ Mo tu, Jehova i mekem rod blong sam man blong hem oli kasem sam spesel trening, we i save givhan long olgeta blong oli mekem moa long wok blong hem. Pej 4 kasem 6 i tokbaot ol trening ya we samfala oli gat janis blong kasem. Maet sam samting long laef blong yu i mekem se yu yu no save kasem plante trening we oli stap long pej ya. Be sipos yu yu save kasem wan long ol trening ya we i kamaot long God, ?yu yu mekem bes blong yu blong trening ya i givhan long yu? Plante taem ol tija long skul mo ol narafala oli pulum ol yangfala blong oli go long yunivesiti blong kasem hae edukesen. ?Be olsem wanem long yu? ?Yu yu pulum ol yangfala ya blong oli traehad from sam samting we i save givhan long olgeta blong oli fren gud wetem God? ?Mo yu yu pulum olgeta blong oli kasem trening we i hae moa, we i kamaot long Jehova? Sipos yumi mekem bes blong yumi blong kasem olgeta tijing we i kam long Jehova, bambae yumi glad long laef blong yumi naoia mo bambae yumi kasem laef we i no save finis.—Sam 119:105; Jon 17:3.

Sam Trening We Ogenaesesen Blong Jehova i Stanemap

Kos Blong Rid Mo Raet

• ?Hem i Blong Wanem?: Hem i blong tijim ol man blong oli save rid mo raet, olsemia nao oli save ridim Baebol mo stadi long hem, mo oli save tijim ol narafala long trutok.

• ?Hem i Blong Hamas Wik?: I dipen nomo long nid blong ol man we oli joen long kos ya.

• Ples Blong Hem: Long Haos Kingdom.

• Olgeta We Oli Save Joen: Olgeta pablisa mo ol man we oli intres.

• ?Yu Save Joen Olsem Wanem?: Ol elda oli mekem plan blong kos ya folem nid blong kongregesen, mo oli pulum evriwan we kos ya i save givhan long olgeta, blong oli joen long hem.

Tiokratik Skul

• ?Hem i Blong Wanem?: Hem i blong trenem ol pablisa blong oli kam man blong talemaot gud nius, mo blong oli tijim ol narafala long fasin we i karem frut.

• ?Hem i Blong Hamas Wik?: Hem i gohed evri wik.

• Ples Blong Hem: Long Haos Kingdom.

• ?Hu i Save Joen?: Olgeta pablisa, mo ol narafala we oli joen oltaem long ol miting, oli agri wetem olgeta tijing blong Baebol, mo laef blong olgeta i laenap wetem ol Kristin fasin.

• ?Yu Save Joen Olsem Wanem?: Yu toktok long elda we i lukaot long Tiokratik Skul.

Kos Blong Lanem Narafala Lanwis

• ?Hem i Blong Wanem?: Hem i blong tijim ol pablisa blong oli save talemaot gud nius long wan narafala lanwis.

• ?Hem i Blong Hamas Wik?: Hem i blong fo no faef manis. Plante taem kos ya i blong wan no tu aoa evri wik, long Sarede moning.

• Ples Blong Hem: Klosap oltaem hem i stap long Haos Kingdom.

• ?Hu i Save Joen?: Ol pablisa we oli gat gudnem long kongregesen mo we oli wantem prij long narafala lanwis.

• ?Yu Save Joen Olsem Wanem?: Branj ofis i mekem plan blong kos ya folem nid blong ol man long teritori.

Bildim Ol Haos Wosip

• ?Hem i Blong Wanem?: Hem i blong bildim mo wokem gud bakegen ol Haos Kingdom. Hemia i no wan kos. Oli tijim ol volontia long wan wok, nao oli save joen blong bildim ol Haos Kingdom.

• ?Hem i Blong Hamas Wik?: Hemia i dipen long ol volontia nomo.

• Ples Blong Hem: Hem i stap long eria we Komiti Blong Bildim Ol Haos Wosip i lukaot long hem. Maet oli save askem long sam volontia blong oli go long wan ples we i longwe moa, blong oli givhan long olgeta we oli kasem trabol from wan disasta.

• ?Hu i Save Joen?: Ol brata mo sista we oli baptaes, mo we ol elda oli agri se oli save joen long wok ya. Oli save joen nomata se oli save wan wok finis no oli no save.

• ?Yu Save Joen Olsem Wanem?: Ol elda long ples blong yu oli save givim pepa ya blong yu fulumap, Kingdom Hall Volunteer Worker Questionnaire (S-82).

Skul Blong Paenia

• ?Hem i Blong Wanem?: Hem i blong givhan long ol paenia blong oli ‘finisim olgeta wok ya we God i givim long olgeta.’—2 Tim. 4:5.

• ?Hem i Blong Hamas Wik?: Hem i blong tu wik.

• Ples Blong Hem: Branj ofis bambae i talem ples we skul ya i stap long hem. Plante taem i stap long Haos Kingdom.

• ?Hu i Save Joen?: Olgeta we oli mekem wok blong fultaem paenia wan yia finis.

• ?Yu Save Joen Olsem Wanem?: Olgeta we oli paenia wan yia finis oli joen long skul ya, mo seket elda nao bambae i talemaot long olgeta.

Skul Blong Betel

• ?Hem i Blong Wanem?: Skul ya i blong givhan long olgeta we oli jes kam long Betel, blong oli harem gud long wok blong olgeta.

• ?Hem i Blong Hamas Wik?: Hem i gohed blong sikistin wik, wan aoa evri wik.

• Ples Blong Hem: Long Betel.

• ?Hu i Save Joen?: Olgeta we bambae oli wok oltaem long Betel, mo olgeta we oli wok long Betel blong smoltaem (wan yia no bitim wan yia)

• ?Yu Save Joen Olsem Wanem?: Olgeta we oli memba blong famle blong Betel oli joen long skul ya.

Skul Blong Kingdom Wok

• ?Hem i Blong Wanem?: Hem i blong trenem ol elda mo ol man blong givhan, blong oli mekem gud wok blong olgeta long kongregesen mo long ogenaesesen blong God. (Wok 20:28) Hed Kampani i mekem desisen se wetaem oli mekem skul ya, be oli no mekem evri yia.

• ?Hem i Blong Hamas Wik?: Long ol yia we i jes pas, hem i wan dei haf blong ol elda, mo wan dei blong ol man blong givhan.

• Ples Blong Hem: Long Haos Kingdom no long Haos Asembli.

• ?Hu i Save Joen?: Ol elda mo ol man blong givhan.

• ?Yu Save Joen Olsem Wanem?: Seket elda i askem long ol elda mo ol man blong givhan blong oli joen long skul ya.

Skul Blong Ol Eldaa

• ?Hem i Blong Wanem?: Hem i blong givhan long ol elda blong oli mekem gud wok blong olgeta long kongregesen.

• ?Hem i Blong Hamas Wik?: Hem i blong faef dei.

• Ples Blong Hem: Branj ofis i talem se skul ya bambae i stap wea, be plante taem i stap long Haos Kingdom no long Haos Asembli.

• ?Hu i Save Joen?: Ol elda.

• ?Yu Save Joen Olsem Wanem?: Branj ofis i askem long ol elda blong oli joen long skul.

Skul Blong Ol Distrik Elda Mo Seket Elda Wetem Woman Blong Olgetab

• ?Hem i Blong Wanem?: Hem i blong givhan long ol distrik elda mo ol seket elda, blong oli kam gud moa long wok blong givhan long ol kongregesen. Hem i givhan long olgeta blong oli “hadwok blong prij mo blong tijim ol man,” mo blong oli lukaot gud long ol sipsip blong God.—1 Tim. 5:17; 1 Pita 5:2, 3.

• ?Hem i Blong Hamas Wik?: Hem i blong tu manis.

• Ples Blong Hem: Branj ofis bambae i talem ples we skul ya i stap long hem.

• ?Hu i Save Joen?: Ol distrik elda mo ol seket elda.

• ?Yu Save Joen Olsem Wanem?: Branj ofis i askem long ol distrik elda mo ol seket elda wetem woman blong olgeta, blong oli joen long skul ya.

Baebol Skul Blong Ol Brata We Oli No Maredc

• ?Hem i Blong Wanem?: Hem i blong rerem ol elda mo ol man blong givhan we oli no mared, blong oli mekem moa wok. Bighaf blong olgeta bambae oli go wok long sam ples we i gat nid long kantri blong olgeta. Maet smol nomo oli go long narafala kantri, sipos oli talemaot fastaem long branj ofis se oli glad blong go.

• ?Hem i Blong Hamas Wik?: Hem i blong tu manis.

• Ples Blong Hem: Branj ofis bambae i talemaot ples we skul ya i stap long hem, be plante taem i stap long Haos Asembli no long Haos Kingdom.

• ?Hu i Save Joen?: Ol brata we oli no mared, we oli gat 23 yia kasem 62 yia mo we helt blong olgeta i gud. Ol brata ya oli mas wantem blong givhan long ol brata mo sista mo mekem se wok blong prij i gohed moa long ol ples we i gat nid. (Mak 10:29, 30) Ol brata ya oli mas mekem wok blong elda no man blong givhan blong tu yia finis.

• ?Yu Save Joen Olsem Wanem?: Sipos i gat skul ya long teritori we branj ofis blong yu i lukaot long hem, bambae i gat wan miting we i tokbaot skul ya long taem blong seket asembli. Olgeta we oli wantem joen long skul ya oli save go long miting ya, mo bambae oli kasem moa save long saed ya.

Baebol Skul Blong Ol Man Mo Woman Blong Olgetad

• ?Hem i Blong Wanem?: Hem i blong givim wan spesel trening long ol man wetem woman blong olgeta, blong oli save mekem moa long wok blong Jehova mo ogenaesesen blong hem. Bighaf blong olgeta bambae oli go long sam ples long kantri blong olgeta we i gat nid. Maet smol nomo oli go long narafala kantri, sipos oli talemaot fastaem long branj ofis se oli glad blong go.

• ?Hem i Blong Hamas Wik?: Hem i blong tu manis.

• Ples Blong Hem: Fastaem, skul ya i stap long Watchtower Educational Center long Patterson, New York, Yunaeted Stet. Naoia, branj ofis i talem ples we skul ya i stap long hem, be plante taem i stap long Haos Asembli no long Haos Kingdom.

• ?Hu i Save Joen?: Ol man wetem woman blong olgeta we oli gat 25 yia kasem 50 yia, mo helt blong olgeta i gud. Oli mas naf blong prij long enikaen ples we i gat nid, mo oli mas gat sem tingting we Aesea i gat se: “!Mi ya, mi save go! !Yu sanem mi!” (Aes. 6:8) Mo tu, ol man mo woman ya oli mas mared tu yia finis, mo oli mekem wok blong fultaem paenia tu yia finis.

• ?Yu Save Joen Olsem Wanem?: Sipos i gat skul ya long teritori we branj ofis blong yu i lukaot long hem, bambae i gat wan miting we i tokbaot skul ya long taem blong spesel dei asembli. Olgeta we oli wantem joen long skul ya oli save go long miting ya, mo bambae oli kasem moa save long saed ya.

Baebol Skul Blong Gilead

• ?Hem i Blong Wanem?: Hem i blong trenem ol paenia mo ol narafala we oli mekem wok blong Jehova fultaem, blong oli mekem wok blong misinari.

• ?Hem i Blong Hamas Wik?: Hem i blong faef manis.

• Ples Blong Hem: Watchtower Educational Center, Patterson, New York, Yunaeted Stet.

• ?Hu i Save Joen?: Ol man wetem woman blong olgeta we oli baptaes tri yia finis, mo oli gat 21 yia kasem 38 yia long fas taem we oli fulumap pepa blong joen long skul ya. Oli mas toktok Inglis, oli mas mared bitim tu yia, mo oli mekem wok blong fultaem paenia tu yia finis. Oli gat gudfala helt. Ol paenia we oli prij long narafala kantri (wetem olgeta we oli misinari tu), ol distrik elda mo seket elda, olgeta we oli wok long Betel, mo olgeta we bifo oli joen long Ministeriol Trening Skul, Baebol Skul Blong Ol Brata We Oli No Mared, mo Baebol Skul Blong Man Mo Woman We Tufala i Mared, oli save fulumap pepa ya.

• ?Yu Save Joen Olsem Wanem?: Sam branj oli mekem wan miting we i tokbaot skul ya long taem blong distrik asembli. Olgeta we oli wantem joen long skul ya oli save go long miting ya, mo bambae oli kasem moa save long saed ya. Be sipos i no gat miting ya long asembli blong yufala, mo yu wantem fulumap wan pepa blong joen long skul ya, yu save raet i go long branj ofis blong kasem moa save.

Skul Blong Ol Memba Blong Branj Komiti Wetem Woman Blong Olgeta

• ?Hem i Blong Wanem?: Hem i blong givhan long ol branj komiti blong oli mekem gud wok ya blong lukaot long ol haos Betel. Mo i givhan long olgeta blong oli lukluk gud long ol wok blong ol kongregesen, mo blong oli lukaot long ol wok we i gohed long ol distrik mo seket long ples blong olgeta. Oli lukaot gud tu long wok blong translesen, wok blong printim buk, mo wok blong sanem ol buk i go long narafala ples. Mo oli lukaot long ol narafala wok tu long Betel.—Luk 12:48b.

• ?Hem i Blong Hamas Wik?: Hem i blong tu manis.

• Ples Blong Hem: Watchtower Educational Center, Patterson, New York, Yunaeted Stet.

• ?Hu i Save Joen?: Olgeta long Branj Komiti, no long Kantri Komiti.

• ?Yu Save Joen Olsem Wanem?: Hed Kampani i askem long ol brata wetem woman blong olgeta blong oli joen long skul ya.

Skul ya i no stap long olgeta kantri yet.