Yu Yusum Fastok We i Wok Gud
1. ?Yumi save lanem wanem long ol defren fastok we ol fas Kristin oli yusum?
1 Ol fas Kristin oli talemaot gud nius long ol man long ol defdefren ples mo long ol defdefren jos. (Kol. 1:23) Nating se oli stap talemaot Kingdom blong God, be oltaem oli yusum ol defdefren fastok, blong i laenap wetem nid blong ol man. Yu traem tingbaot Pita. Ol man Jiu oli respektem Baebol, ale taem Pita i toktok long olgeta, hem i tokbaot fastaem profet tok blong Joel. (Wok 2:14-17) Be taem Pol i storian wetem ol man Gris, hem i mekem oli tingting. Yumi save luk samting ya long buk blong Ol Wok 17:22-31. Tede, sam man long ples blong yumi oli respektem Baebol, mo yumi no fraet blong yusum Baebol taem yumi prij long olgeta. Be maet yumi mas waes moa, taem yumi toktok wetem ol man we oli no intres long Baebol no long skul, no we oli joen long wan jos we i no bilif long Jisas.
2. ?Yumi save mekem wanem blong givhan long man we i intres long Baebol, mo man we i no intres long Baebol?
2 Yu Yusum Gud Buk We Yumi Seremaot Long Manis: Ol buk we yumi seremaot long seves yia ya, bambae i jenis evri tu manis. Bambae yumi seremaot ol magasin, ol traket, mo ol buklet. Nating se yumi faenem wan man we i no intres long Baebol, be yumi save tokbaot wan haf blong magasin, traket no buklet we hem i intres long hem. Sipos yumi prij long man we i glad blong lesin, be yumi no ridim wan vas blong Baebol long hem, no yumi no tokbaot Baebol, yumi save gobak luk hem blong givhan long hem blong i bilif long God mo long Baebol. Be sipos yumi prij long ol man we oli respektem Baebol, yumi save yusum wan buk mo wan fastok we i laenap wetem buk ya. Yumi save givimaot buk ya Baebol Tijim, no tufala buklet ya Listen to God mo Yu Mas Lesin Long God Nao Bambae Yu Laef Olwe. Bigfala samting hemia blong yusum fastok we i wok gud.
3. ?I minim wanem se hat blong man i olsem graon blong garen?
3 Yu Givhan Long Man Blong i Rerem Hat Blong Hem: Hat blong man i olsem graon we man i planem sid long hem. (Luk 8:15) Blong wan sid i gru gud long garen, yumi mas rerem graon fastaem. Long sem fasin, yumi mas rerem gud hat blong man fastaem blong sid blong trutok i gru long hat blong hem. Ol fas Kristin oli prij long defdefren kaen man, mo samting ya i mekem oli glad bigwan. (Wok 13:48, 52) Yumi tu yumi save harem gud olsem sipos yumi tingting gud long ol fastok blong yumi.