Talemaot Gud Nyus—Tru Long Ol Baebol-Stadi
1 Lasyia long Vanuatu, ol brata sista oli mekem 286 Baebol-stadi evri manis. I luk olsem se raonabaot haf blong ol 124 pablisa oli mekem 1 no plante moa Baebol stadi. Be long narasaed, i klia nomo se narafala haf blong ol pablisa oli no mekem wan Baebol stadi. Yes, taem yumi mekem wan Baebol stadi, yumi harem gud tumas. ?Taswe, yumi mas mekem wanem blong tijim trutok long plante moa man?
2 Yumi wanwan i laekem God mo ol man raonabaot long yumi, ale tufala samting ya nao i pusum yumi blong go tokbaot trutok wetem ol narafala man. Be blong mekem wan wok olsem, Jeova i mas givhan long yumi. (1 Korin 3:6, 7) ?Ating i moa gud we yumi talem wan prea long Jeova mo yumi askem long hem blong givhan long yumi blong statem wan nyufala Baebol-Stadi? (1 Jon 5:14, 15) Biaen, yumi mas traehad blong kasem ol samting we yumi askem long Jeova. Samting ya i min se yumi mas tekem evri jans we yumi gat blong prij mo yumi mas askem long evri man we oli intres blong oli gat wan Baebol-Stadi.
Yumi Gat Plante Jans Blong Mekem Olsem
3 Long ol laswan yia, yumi seremaot plante handred buk mo buklet. Plante man we oli no Wetnes blong Jeova oli gat ol buk ya blong yumi long haos blong ol: Maet oli gat buk Yu Save Laef Foreva Long Paradaes, no Trutok Blong Soemaot Rod Blong Itenel Laef, no True Peace And Security buk. Hemia wan rod we i givim jans long yumi blong statem sam Baebol-Stadi.
4 Taem ol man we yumi visitim oli talem long yumi se oli save gud wok blong yumi, no oli talem se oli gat sam buk blong yumi long haos, yumi save talem long olgeta se yumi glad tumas from. (Lukluk Reasoning buk pej 20) Sipos oli talem se hem oli gat wan buk, yumi save askem long ol blong oli go tekem buk ya ale yumi soemaot long ol sam gudfala poen we maet oli givhan long ol wetem famle blong ol. Sipos oli intres tru, yumi save askem long ol blong mekem wan Baebol-Stadi wetem ol.
5 Wan narafala rod we yumi save yusum i olsem: Yumi save askem long ol man sipos oli gat sam buk blong yumi. Rod ya i kasem plante frut long ol ples we yumi seremaot fulap buk finis. Biaen long fastok blong blong yumi, maet yumi talem se yumi pas oltaem long ples blong olgeta taswe fulap man oli gat sam buk blong yumi. Afta yumi mas mekem i klia long tingting blong ol man ya se ol advaes we i stap long ol buk ya i save givhan bigwan long olgeta mo famle blong ol. Biaen, yumi save askem long olgeta sipos oli gat wan buk blong yumi. Sipos oli gat wan, yumi save soemaot long ol olsem wanem blong mekem stadi long buk ya. Wan sot pleplei nomo i save finis wetem wan Baebol-Stadi. Be sipos man we yumi toktok long hem i no gat wan buk blong yumi nating, yumi save soemaot buk we yumi seremaot long manis ya. Ating yumi save askem long hem sipos hem i agri blong gat wan Baebol-Stadi.
Yumi Mas Gat Fasin Blong Luksave
6 Tede, ol man oli gat tumas samting blong mekem taswe yumi no mas tekem tumas taem blong olgeta, yumi no mas bitim mak. Ol faswan stadi we yumi mekem wetem wan man oli no mas bitim 15 menet. Sipos man ya i luk se yumi no tekem tumas taem blong hem, maet bambae hem i agri blong yumi kam visitim hem oltaem. Biaen, taem we bambae stadi i gohed gud ale man ya i wantem save gud long sam poen. Long taem ya nao yumi save seftem taem blong stadi i kam longwan moa. Be i tru tumas, samfala oli stadi moa taem oli jes statem stadi blong ol.
7 Long ol ples we yumi stap prij long ol, i gat plante man yet oli nidim wok blong yumi mo plante long olgeta oli gat sam buk blong yumi. Sam long olgeta oli taed finis mo oli harem nogud tumas from ol rabis samting we i stap kamaot long wol tede. (Esikel 9:4) Wok blong yumi nao i blong seremaot ol trutok long saed blong Kingdom, mesej ya we i soemaot olsem wanem God i save fiksimap evri trabol we man i stap kasem tede. Be antap moa, yumi mas talemaot trutok long ol man we oli intres. Ol Baebol-Stadi oli wan rod we yumi save yusum blong mekem olsem.—Matyu 28:19, 20.