Yumi Rere Blong Soem Kwik Ol Buk Blong Yumi
1 Yumi tangkyu long Jeova, from we oltaem hem i stap yusum ogenaesesen blong hem blong givim sam buk long yumi. Yumi evriwan i tinghae long kakae ya blong speret. Taem yumi kasem wan nyufala buk no magasin, ale, kwiktaem yumi stat blong luk ol pej blong hem. Biaen, yumi tekem taem blong ridim hem, mo samting ya i pulum yumi blong tangkyu moa long Jeova from ol plan blong hem.
2 Taem yumi kasem blesing olsem long saed blong speret, yumi wantem talemaot ol samting ya long ol narafala man. (Mat. 24:14) Yumi wantem we plante man i gat jans blong ridim ol tok ya, ale, olgeta tu oli save laekem ol trutok blong Baebol. Sipos yumi rere gud blong givim ol buk ya, mo sipos yumi soem kwik olgeta long ol man, bambae yumi save givhan long ol man we oli gat stret tingting. Ol buk ya oli save halpem olgeta blong lesin long Jeova, mo blong joenem yumi blong mekem wok blong hem.
Long Evri Haos Wanwan
3 Long ol manis Janewari mo Febuwari, bambae yumi traem givimaot buk Trutok wetem buklet Gavman blong 100 VT. Evriwan i mas lukaot blong gat naf buk mo buklet blong givimaot olgeta long tufala manis ya.
4 Samtaem, yumi faenem man we oli rili bisi. Ating yumi save soem buk blong manis long ol, olsem we buk Reasoning i talem long pej 20 blong hem, long faswan tok blong pej ya. No ating yumi save yusum seken tok blong pej ya. Ale, yumi mas soemaot long man ya se yumi luksave olsem wanem hem i bisi, mo yumi gat strong tingting blong talem se: “Oraet, mi luk we yu yu no gat taem blong lesin long mi naoia, be mi mi laekem givim tufala magasin ya long yu blong 60 VT nomo. Yu yu save ridim olgeta taem bambae yu yu gat smol taem from. Mi mi save se bambae yu yu glad blong rid long promes blong God blong putum paradaes bakegen long wol.” Long rod ya, yumi soemaot we yumi stap tingbaot man ya, se hem i rili bisi, mo tu yumi soemaot sam buk.
5 ?Be olsem wanem nao sipos wan man i holem finis buk ya we yumi soemaot? Yumi save folem rul ya we i stap long 1 Korin 3:6-9. Sid i stap long graon finis, be yumi mas putum wora long hem blong mekem hem i gru. Hemia i min se yumi mas talemaot sam narafala tok blong gud nyus long man ya. No ating, yumi save talem se: “Mi mi glad blong haremsave se yu yu holem buk ya finis. ?Taem yu yu ridim hem, ating yu laekem hem, a? Be mi mi laekem soem long yu olsem wanem buk ya i save givhan moa long yu. Hemia blong smol taem nomo.” Ale, yu yu save soemaot long hem olsem wanem yumi stap mekem wan Baebol stadi wetem buk ya. Nating se man ya i holem wan buk finis no no gat, be oltaem yumi wantem kasem wan mak nomo—mekem disaepol.—Mat. 28:19.
Holem Ol Jans Blong Prij
6 Mo tu, taem yumi no stap long wok blong prij, yumi mas holem kwik ol jans blong givimaot sam buk long ol man. Fastaem, yu yu save tingtinggud olsem wanem yu save prij long ol man we i kam visitim yu long haos blong yu, long ol famle blong yu, ol man we i wok wetem yu, ol narafala pikinini long skul. Mo tu yu save prij taem yu go long stoa, no long wok blong prij taem yu stap wokbaot blong go long wan narafala haos. Yu yu mas rere fastaem. Yu yu save gat wan buk wetem yu oltaem, blong holem olkaen jans blong prij. Plante taem, i moa isi blong karem sam buk we i smol nomo, no sam traket. Taem yumi holem wan jans blong prij olsem, yumi save mekem wan bigfala wok.—1 Pita 3:15.
7 Ogenaesesen blong Jeova i givim olgeta buk we yumi nidim blong stap strong long saed blong speret, mo blong talemaot gud nyus long ol man. Sipos yumi holem kwik ol jans blong soem ol buk ya, yumi save leftemap nem blong Jeova.—Sam 34:3.