Karem Moa Frut Long Wok Blong Prij
1 Yumi mas putum Kingdom blong God long faswan ples long laef blong yumi. Taswe yumi mas wantem karem moa frut long wok blong prij, from we hem i faswan wok long laef blong yumi. (Mak 13:10) Nating se yu stat prij longtaem finis, no yu jes stat, be yu mas wantem prij long wan fasin we i gud moa. ?Olsem wanem yu yu save mekem?
2 Plante man long wol oli traehad blong mekem wok blong olgeta i kam gud moa, from we oli wantem kasem moa mane, no oli no wantem lusum wok blong olgeta. From samting ya, oli rere blong mekem kos blong lanem gud wok blong olgeta. Yumi minista blong God, taswe yumi wantem gat gudhan long wok blong prij. Yumi wantem kam naf blong mekem disaepol, mo tijim gud ol man long Kingdom blong God. Blong kasem mak ya, yumi mas kasem sam nyufala fasin we yumi neva traem bifo. Ale, yumi save wekemap tingting blong plante defren man.—Mat. 28:19-20.
Yumi Mas Hadwok
3 Jeova i stap spid moa blong hivimap ol man we oli olsem sipsip. From samting ya, yumi stap go plante taem bakegen long doa blong ol man, i bitim bifo. From we i gat plante man olsem we i mekem wok blong pablisa mo blong paenia, wok blong prij i stap kam big moa, mo sam man oli harem nogud from. Taswe sam faswan tok we yumi bin yusum bifo oli no moa stret blong yusum naoia. Ating yumi mas jenisim ol tok blong yumi blong halpem moa ol man.
4 Sipos yumi wantem prij gud, yumi mas gat gudfala fasin blong toktok wetem ol man. Wajtaoa blong Ogis 1, 1989 i givim sam gudfala rul we yumi save folem. Olsem nao, long pej 17, haf 6, Wajtaoa i soemaot olsem wanem yumi save stat toktok long wan fasin we i glad, mo i kaen gud. Ale, nating se yumi prij evri wik long ples ya, mo ol man oli save gud yumi, be ol man oli no agensem yumi tumas. Long sem pej, long haf 5 blong hem, Sosaete i soemaot olsem wanem yumi save toktok long wan man we wan wik bifo i bin talem se: “Mi mi gat skul finis, mo skul blong mi i givim evri samting we mi mi nidim long saed blong speret.”
5 ?Olsem wanem? ?Yu traem finis blong visitim ol man blong talem long ol se oli save gat wan Baebol stadi blong olgeta long haos blong olgeta, mo stadi ya i fri nomo? ?Yu go visitim ol stoa mo ol ofis long ples blong yu? ?Mo yu soemaot ol magasin long ol man we i stap wokbaot long rod? I gat sam taem long dei we yumi save faenem plante man long rod olsem. Nomata wanem wok yu stap mekem, be yu save folem ol advaes blong Wajtaoa blong Ogis 1, 1989. Sipos yu yu folem ol advaes blong hem, bambae wok blong yu i save kam gud moa.
6 Blong karem moa frut long wok blong prij, yu mas traem visitim evri man long ples blong yu. (Efes. 6:13) Kwiktaem, yu save luksave sipos i gat sam defren famle we i stap long wan haos. Samtaem, sam man i stap long wan smol haf blong wan haos. Ating oli stap long store we i stap daon long haos, no long wan narafala ples we i haed lelebet, mo i no isi blong faenem doa blong kam insaed long hem. Yu yu save traehad blong faenem olgeta memba blong wan famle—ating wan olfala we i neva kam openem doa, no wan man we i stap long wok blong hem long ol dei we yumi kam visitim ol man. Sipos yu yu traem visitim ol man long ol defren haoa, maet yu save faenem sam narafala memba blong wan famle. Yumi save gat jans blong mekem olsem, sipos yumi prij long sapa.
Traem Kasem Mak Ya
7 Yumi mas traem kasem mak ya—karem moa frut long wok blong prij. Bighaf blong yumi i save kasem mak ya. Yumi mas prea long Jeova from, mo yumi mas mekem tingting blong yumi i rere. Sipos yumi gat gudhan moa long wok blong prij, bambae yumi save gat jans blong givhan long ol narafala pablisa, blong olgeta tu oli karem moa frut olsem.—Gal. 6:6.
8 Taem bambae “Bigfala Trabol” i kam, wok blong prij i no finis wantaem. (Mat. 24:21) Long plante plante yia bakegen, bambae yumi mas tijim ol man we oli girap bakegen long ded, blong olgeta tu oli folem ol rod blong Jeova. Olgeta we bambae yumi tijim long 1,000 yia, be yumi glad tumas blong luk olgeta oli obei long Kingdom blong Kraes. Sipos yumi traehad blong mekem wan wok we i gud moa naoia, bambae wok blong yumi i karem moa frut blong leftemap nem blong Jeova.