Stap Glad Long Ol Samting We Yu Hadwok Long Hem
1. ?Wanem i save mekem se tingting blong yumi i no moa strong blong prij?
1 God i mekem we yumi ol man, yumi save “glad long ol samting ya we yumi stap hadwok long hem.” (Prija 3:22) Be samtaem, yumi no luksave ol gudfala samting long wok blong prij we yumi stap mekem. Ale tingting blong yumi i foldaon, nao yumi no moa glad mo tingting blong yumi i no moa strong blong mekem wok. ?Wanem i save givhan long yumi blong yumi holem gudfala tingting?
2. ?From wanem yumi mas gat stret tingting long wok blong prij we yumi stap mekem?
2 Yu Mas Gat Stret Tingting: Yu mas tingbaot se taem Jisas i stap long wol mo i stap prij, i gat smol man nomo we oli glad blong lesin long hem. Be nating se i olsem, wok blong hem i karem gudfala frut. (Jon 17:4) Long parabol ya blong man we i planem sid, Jisas i talemaot finis se bighaf blong ol man bambae oli no glad blong lesin long gud nius blong Kingdom. (Mat. 13:3-8, 18-22) Nating se i olsem, sipos yumi gohed blong wok strong, wok blong yumi bambae i mas gat frut blong hem.
3. Nating se smol man nomo oli lesin long yumi taem yumi prij, ?yumi kasem wanem ‘frut’?
3 ?Olsem Wanem Blong Karem Plante Frut?: Long parabol ya blong Jisas, hem i talem se olgeta we oli lesin long gud nius ya blong Kingdom, bambae “oli gat frut blong tok ya long laef blong olgeta.” (Mat. 13:23) Taem sid blong wit i gru i kam bigwan, hem i karem frut. Frut ya hem i wan niufala sid, be i no wan narafala wit. Taswe, frut we wan Kristin i kasem long wok blong prij, hemia gud nius blong Kingdom we hem i stap gohed blong talemaot, be i no man we hem i pulum i kam disaepol. From samting ya, nating we man i wantem lesin long yumi no nogat, be yumi save “glad” from we yumi mekem wan gudfala wok. Yumi stap leftemap nem blong Jehova. (Aes. 43:10-12; Mat. 6:9) Taem yumi joen wetem God blong mekem wok blong hem, hemia wan bigfala blesing. (1 Kor. 3:9) Olgeta fasin ya blong talemaot nem blong Jehova, oli olsem gudfala frut we i mekem Jehova i glad.—Hib. 13:15, 16.
4. Wok blong yumi i save karem plante gudfala frut we yumi no save. ?Samting ya i save hapen olsem wanem?
4 Samtaem wok we yumi mekem i gat gudfala frut blong hem, be yumi no luksave. Taem Jisas i stap prij, ol man we oli lesin long hem oli no kam disaepol stret long taem ya we hem i stap. Sem mak long taem blong yumi. Gud nius ya we yumi stap talemaot i no gru wantaem nomo long hat blong ol man. Taem ol yia oli pas, maet ol man ya oli kam long trutok, be yumi no save. Wok blong prij we yumi mekem i save karem gudfala frut. Taswe, yumi mas gohed nomo blong ‘karem plante gudfala frut long laef blong yumi’ mo pruvum se yumi man blong Jisas.—Jon 15:8.