!Yumi No Givap!

1. ?Yumi glad mo yumi praod from wanem samting?

!YUMI glad mo yumi praod blong stap olsem ol Witnes blong Jehova! Yumi karem nem blong God, mo yumi pruvum samting ya taem yumi prij mo mekem disaepol. Yumi glad taem yumi save halpem wan man we i “stret blong kasem laef we i no save finis,” blong i bilif. (Wok 13:48) Yumi gat sem filing olsem Jisas we i “glad bitim mak” taem ol disaepol blong hem oli tokbaot ol gudfala ekspiriens we oli gat long wok blong prij.—Luk 10:1, 17, 21.

2. ?Olsem wanem yumi soemaot se wok blong prij i impoten?

² Wok blong prij i impoten tumas long yumi. Aposol Pol i talem long Timoti se: “Yu mas lukaot gud long fasin blong yu, mo long ol tok we yu stap tijim ol man long hem.” Mo hem i gohed i se: “Sipos yu mekem olsem, bambae yu sevem yu, wetem olgeta we oli lesin long yu.” (1 Tim. 4:16) Yes, wok blong prij i save sevem laef blong man. Yumi lukaot gud long ol fasin blong yumi from we yumi olsem ol sitisen blong Kingdom blong God. Yumi wantem we oltaem ol fasin blong yumi oli presem Jehova mo oli laenap wetem gud nius we yumi stap talemaot. (Fil. 1:27) Yumi soem se yumi stap ‘lukaot gud long ol tok we yu stap tijim,’ taem yumi rere gud from wok blong prij mo taem yumi askem help blong Jehova bifo we yumi go prij.

3. ?Evri man bambae oli intres long mesej blong Kingdom? Talem wan eksampol.

³ Nating se yumi mekem bes blong yumi long wok blong prij, be maet i gat smol man nomo o i no gat man nating we i intres long mesej blong Kingdom. Traem tingbaot ekspiriens blong Brata Georg Lindal, we i stap prij hem wan long ol eria long Aeslan, long yia 1929 kasem 1947. Hem i seremaot plante taosen buk, be i no gat man i akseptem trutok. Hem i talem se: “I gat sam man we oli agensem trutok, be bighaf blong ol man oli no intres nating.” I gat sam misinari we oli graduet long Gilead Skul we oli kam long ples ya blong givhan long wok blong prij, be naen yia biaen, i jes gat sam man Aeslan we oli disaed blong givim laef blong olgeta long Jehova mo baptaes.b

4. ?Yumi harem olsem wanem taem ol man oli no lesin long gud nius?

⁴ Yumi harem nogud taem ol man oli no intres blong stadi Baebol. Maet yumi gat sem filing olsem Pol we i ‘sore tumas mo oltaem hat blong hem i soa’ from we ol man Jiu oli no wantem bilif se Jisas i Mesaea. (Rom 9:1-3) ?Olsem wanem sipos yu traehad blong givhan long wan Baebol studen, yu prea long bihaf blong hem, be hem i no gohed gud, mo yu mas stopem stadi? ?O olsem wanem sipos yu stadi wetem wan man be i neva kasem mak blong baptaes? ?Bambae yu blemem yu wan, mo gat tingting ya se Jehova i no blesem wok blong prij we yu mekem? Long stadi ya, bambae yumi ansa long tu kwestin: (1) ?Wanem i pruvum se wok blong prij we yumi mekem i stap gohed gud? (2) ?Yumi mas tingbaot wanem taem yumi prij long ol narafala?

?WANEM I PRUVUM SE WOK BLONG PRIJ WE YUMI MEKEM I STAP GOHED GUD?

5. ?From wanem wok blong prij bambae i no go gud oltaem olsem we yumi wantem?

⁵ Baebol i tokbaot man we i stap mekem wil blong God se: “Evri samting we hem i mekem, bambae i go gud.” (Sam 1:3) Be hemia i no min se evri samting we yumi mekem blong Jehova bambae oli go gud olsem we yumi wantem. Yumi stap “kasem fulap trabol” from we yumi evriwan i sinman. (Job 14:1) Mo tu, ol man we oli agensem yumi, maet samtaem oli save stopem wok blong prij we yumi mekem. (1 Kor. 16:9; 1 Tes. 2:18) Taswe, ?olsem wanem Jehova i makem se wok blong prij we yumi stap mekem i go gud? Bambae yumi luk sam vas long Baebol we oli save halpem yumi blong ansa long kwestin ya.

6. ?Olsem wanem Jehova i makem wok blong hem we yumi stap mekem se i go gud?

⁶ Jehova i luk ol traehad blong yumi mo fasin blong yumi blong stanap strong. Long ae blong Jehova, wok blong prij we yumi mekem i go gud, taem yumi prij wetem strong tingting mo yumi lavem hem, nating se ol man oli no wantem lesin. Pol i talem se: “Oltaem God i stap mekem i stret nomo. Hem i no save fogetem ol wok ya we yufala i mekem. Hem bambae i stap tingbaot we yufala i lavem nem blong hem, taem yufala i mekem minista wok mo yufala i stap gohed yet blong givhan long ol tabu man.” (Hib. 6:10) Jehova i stap tingbaot ol traehad mo lav we yumi soemaot, nating sipos ol wok we yumi mekem oli no karem gudfala frut. Taswe, tok ya blong Pol long ol Kristin long Korin i stret long yumi tu, we i se: “Wok ya we yufala i stap mekem, i mas gat frut blong hem” nating se wok we yumi mekem i no karem frut olsem we yumi wantem.—1 Kor. 15:58.

7. ?Yumi lanem wanem long tok we aposol Pol i talem?

⁷ Aposol Pol i wan nambawan misinari we i stanemap ol niu kongregesen long plante taon. Be taem sam man oli tok nogud long Pol se hem i no wan gudfala tija, Pol i no tokbaot hamas man we hem i bin halpem olgeta blong oli kam Kristin. Defren olgeta, hem i raetem se: “Mi mi mekem plante moa wok.” (2 Kor. 11:23) Olsem Pol, yumi mas tingbaot se samting we i moa impoten long Jehova, hemia se yumi wok had mo yumi stanap strong.

8. ?Yumi mas tingbaot wanem long saed blong wok blong prij?

⁸ Jehova i glad long wok blong prij we yumi mekem. Taem Jisas i sanem ol 70 disaepol blong oli go talemaot mesej blong Kingdom, “oli kambak we oli glad tumas.” ?From wanem? Oli talem se: “Taem mifala i yusum nem blong yu, ol dimon tu oli obei long mifala.” Be Jisas i stretem tingting blong olgeta taem i talem se: “Yufala i no mas glad from we ol rabis spirit oli obei long yufala, yufala i mas glad from we God i raetemdaon nem blong yufala finis long heven.” (Luk 10:17-20) Jisas i save se wok we oli mekem bambae i no karem gudfala frut oltaem. Blong talem stret, yumi no save hamas man we oli lesin long disaepol, nao oli kam ol Kristin. Ol disaepol oli mas kasem save se trufala glad i kamaot taem oli save se Jehova i glad long traehad blong olgeta, be i no from we ol man oli lesin long olgeta.

9. Folem Galesia 6:7-9, ?wanem bambae i hapen sipos yumi gohed blong prij?

⁹ Sipos yumi gohed blong prij, bambae yumi kasem laef olwe. Taem yumi mekem bes blong yumi blong planem mo wotarem ol sid blong trutok blong Kingdom, i olsem we yumi “planem samting we spirit i wantem,” hemia taem yumi letem tabu spirit i wok long laef blong yumi. Sipos “yumi no givap,” Jehova i promes se bambae hem i givim laef we i no save finis long yumi, nating sipos yumi no givhan long wan man blong i baptaes.—Ridim Galesia 6:7-9.

?YUMI MAS TINGBAOT WANEM TAEM YUMI PRIJ?

10. Taem yumi prij, ?from wanem samfala oli lesin be sam no gat?

¹⁰ Nating se ol man oli akseptem trutok o no gat, hemia i dipen long samting we i stap long hat blong olgeta. Jisas i eksplenem samting ya long parabol blong wan man we i saksakem ol sid long ol defren kaen graon, be wan nomo i karem frut. (Luk 8:5-8) Ol defren graon ya oli representem ol man we hat blong olgeta i akseptem “tok blong God” long ol defren fasin. (Luk 8:11-15) Olsem man ya we i saksakem sid, yumi no save kontrolem frut blong wok we yumi mekem from we hemia i dipen long hat blong ol man we oli lesin. Be wok blong yumi, hemia blong gohed blong sakem ol gudfala sid blong Kingdom. Olsem we aposol Pol i talem, wanwan man ‘bambae i kasem blesing we i stret long wok we hem i mekem,’ be i no from risal blong wok blong hem.—1 Kor. 3:8.

11. ?From wanem Jehova i glad long Noa nating se i no gat man i lesin? (Yu luk pija long fran pej.)

¹¹ Longtaem i kam, plante man blong Jehova oli prij long ol man we oli no wantem lesin. Eksampol, blong plante yia, Noa i stap olsem wan “prija blong stret fasin.” (2 Pita 2:5) I sua se Noa i wantem tumas se ol man oli lesin taem hem i prij, be Jehova i no talem se samting ya bambae i hapen. Defren olgeta, taem God i talem long Noa blong i bildim bigfala sip, hem i se: “Yu wetem ol boe blong yu, mo waef blong yu, mo ol waef blong ol boe blong yu, yufala i mas go insaed long sip ya.” (Jen. 6:18) Mo taem Jehova i talemaot saes blong sip ya, maet Noa i luksave se bambae i no gat plante man oli lesin long hem, from we bambae i no gat naf spes blong evriwan. (Jen. 6:15) Olsem yumi save, i no gat wan man i lesin long Noa taem i prij. (Jen. 7:7) ?Be hemia i min se Jehova i luk Noa se i no mekem inaf long wok blong prij? !Nogat! Jehova i glad tumas long Noa from we hem i mekem samting we hem i askem.—Jen. 6:22.

12. ?From wanem Jeremaea i glad nomo blong prij?

¹² Profet Jeremaea tu i prij blong bitim 40 yia, nating se ol man oli no lesin mo oli agensem hem. Tingting blong hem i foldaon bigwan mo i wantem lego wok blong hem, from ol man oli stap “talem ol rabis tok mo oli stap jikim” hem. (Jer. 20:8, 9) !Be Jeremaea i no givap! ?From wanem hem i gohed mo i glad nomo blong prij? Hem i tingbaot tu impoten trutok. Faswan, mesej blong God we hem i stap talemaot, bambae i givim “wan fiuja mo wan hop” long ol man. (Jer. 29:11) Nambatu, Jehova i jusum Jeremae blong i toktok long bihaf blong hem, mo blong i talemaot mesej blong hem long ol man. (Jer. 15:16) Yumi tu yumi stap talemaot wan mesej blong hop long ol man, mo yumi karem nem blong Jehova, yumi Witnes blong hem. Taem yumi tingbaot tufala trutok ya, bambae yumi save stap glad, nating se ol man oli lesin long yumi o no gat.

13. ?Yumi lanem wanem long parabol blong Jisas long Mak 4:26-29?

¹³ I tekem taem blong wan man i gru long saed blong spirit. Jisas i tokbaot samting ya long parabol blong man we i saksakem sid, nao i go slip. (Ridim Mak 4:26-29.) Ol sid we man ya i saksakem oli gru sloslo, mo hem i no save mekem se ol sid ya oli gru kwik. Long sem fasin, maet yumi tu yumi mas wet longtaem blong luk we Baebol studen blong yumi i folem wanem we hem i lanem. Wan fama i no save fosem ol sid blong oli gru kwik olsem we hem i wantem. Long sem fasin, yumi no save fosem ol Baebol studen blong oli gru kwik long saed blong spirit. Taswe, yumi no mas givap sipos oli tekem longtaem moa i bitim wanem we yumi tingbaot. Olsem wan fama, wok blong mekem disaepol i nidim longfala tingting.—Jem. 5:7, 8.

14. Talem wan eksampol we i soem se samtaem i tekem longtaem bifo we ol man oli lesin long yumi.

¹⁴ Long sam ples, i tekem longtaem bifo we wok blong prij i karem frut. Traem tingbaot ekspiriens blong Gladysc mo stret sista blong hem Ruby Allen. Long yia 1959, oli sanem tufala blong go mekem fultaem paenia long wan taon blong Kanada long provins blong Quebec. Long ples ya, ol man oli no wantem lesin long mesej blong Kingdom, from we oli fraet long samting we ol neba mo ol pris blong Katolik oli save mekem long olgeta. Gladys i talem se: “Blong tu yia, evri dei mifala i spenem 8 aoa blong prij long ol haos wanwan, be i no gat man i wantem lesin. Taem ol man oli kam long doa mo oli luk mifala, oli jes tanemraon nomo. Be mitufala i neva givap.” Sloslo, fasin blong ol man i stap jenis, mo samfala oli stat blong lesin. Naoia i gat tri kongregesen long taon ya.—Aes. 60:22.

15. ?Olsem wanem 1 Korin 3:6, 7 i tijim yumi long saed blong wok blong mekem disaepol?

¹⁵ I nidim plante man blong halpem wan man blong i kam disaepol. I gat wan tok we i talem se, i nidim wan kongregesen blong halpem wan man blong i baptaes. (Ridim 1 Korin 3:6, 7.) Eksampol, wan brata i givim wan traket o magasin long wan man we i intres. Be biaen brata ya i luksave se bambae hem i no gat taem blong go visitim man ya, ale hem i askem wan nara pablisa blong visitim man ya. Pablisa ya i statem Baebol stadi wetem man ya, mo evritaem we hem i go long stadi, hem i stap tekem ol defren brata mo sista oli go wetem hem. Olgeta wanwan oli enkarejem studen ya long plante rod. Evri brata mo sista we studen ya i mitim olgeta, bambae oli halpem hem blong i lanem moa long saed blong Jehova. Long rod ya, olsem we Jisas i talem, man blong saksakem sid mo man blong tekemaot kakae, tufala tugeta i glad long taem blong havest.—Jon 4:35-38.

16. ?From wanem yu save glad long wok we yu mekem, nating se yu gat problem blong helt o yu no gat naf paoa?

¹⁶ ?Olsem wanem sipos yu no moa naf blong prij mo tij, from we yu gat problem blong helt o yu no gat naf paoa? Yu save glad from smol wok we yumi mekem blong sapotem wok blong prij long fulwol. Traem tingbaot stori blong King Deved. Taem hem mo ol man blong hem oli go blong tekemaot ol famle mo olting blong olgeta long ol laen blong Amalek, tu handred long ol man blong hem oli taed tumas, so oli stap blong lukaot long ol samting blong olgeta. Be afta we Deved olgeta oli winim faet, hem i givim oda blong oli serem sem amon blong ol samting we oli winim long faet, long olgeta we oli go long faet mo olgeta we oli stap. (1 Saml. 30:21-25) Hemia i sem mak long wok blong mekem disaepol. Evriwan we oli mekem bes blong olgeta long wok ya, oli kasem semfala glad taem wan niufala man i save Jehova mo i baptaes.

17. ?Yumi talem tangkiu long Jehova from wanem samting?

¹⁷ Yumi wantem tumas blong talem tangkiu long Jehova, from hem i lavem yumi mo i gat stret tingting long wok we yumi mekem. Hem i save se yumi no save fosem ol man blong oli lesin, o wosipim hem. Hem i save we yumi lavem hem tumas mo i luk traehad we yumi mekem, nao i blesem yumi. Mo tu, hem i tijim yumi blong stap glad long wanem we yumi naf blong mekem long wok blong prij. (Jon 14:12) !Yumi sua se God bambae i glad long yumi sipos yumi no givap!