Taem Yumi Rere Gud From Memoriol Yumi Glad Tumas
1. ?Memoriol i givim janis long yumi blong mekem wanem?
1 Memoriol we bambae yumi mekem long Tusde 26 Maj, i givim janis long yumi blong soemaot se yumi glad from rod we God i mekem blong sevem yumi. (Aes. 61:10) Taem yumi glad, bambae yumi rere gud bifo long Memoriol. ?Yumi rere gud olsem wanem?
2. ?Yumi rere gud long Memoriol from wanem?
2 Rere Gud From Memoriol: Lodsapa i no wan seremoni we i flas, be hem i gat bigfala mining. Taswe, yumi mas mekem wan gudfala plan, blong yumi no fogetem ol smosmol samting we oli impoten. (Prov. 21:5) Yumi jusum wan stret ples mo taem blong hem. Yumi mas gat stret bred mo waen. Yumi klinim mo flasem ples blong miting. Brata we i givim tok i mas rere gud. Olgeta we oli pasem bred mo waen, mo ol man blong welkam, oli mas mekem gudfala plan tu. I tru, plante long ol samting ya, yumi mekem finis. Yumi glad se Jisas i ded blong sevem yumi, ale samting ya i pulum yumi blong yumi rere gud from spesel taem ya.—1 Pita 1:8, 9.
3. ?Yumi mekem wanem blong rere gud long hat blong yumi?
3 Yumi Rere Gud Long Hat Blong Yumi: Yumi wantem kasem bigfala mining blong Memoriol. From samting ya, yumi mas rere gud long hat blong yumi. (Esra 7:10, NW) Yumi save makemaot taem blong mekem Baebol riding blong Memoriol, mo yumi tingting dip long ol samting we oli hapen long ol dei bifo we Jisas i ded. Taem yumi tingbaot we Jisas i rere blong lego evri samting blong sevem yumi, bambae yumi wantem folem fasin blong hem.—Gal. 2:20.
4. ?Ded blong Jisas i karem wanem blesing we i mekem yu glad moa?
4 Taem Jisas i ded, hem i soemaot se Jehova i rul long fasin we i beswan. Mo tu, hem i mekem rod blong yumi kamaot long sin mo ded. (1 Jon 2:2) Hem i openem rod blong yumi save fren gud wetem God, mo yumi save kasem laef we i no save finis. (Kol. 1:21, 22) Ded blong Jisas i givhan long yumi blong yumi mekem tingting blong yumi i strong blong holem promes we yumi mekem long Jehova. Mo tu, ded blong Jisas i mekem se yumi wantem gohed strong olsem ol disaepol blong hem. (Mat. 16:24) !Taem yu yu rere gud from Memoriol mo yu joen long hem, bambae yu glad moa!