?Yu Yu Rere From Memoriol?

Long yia 33 long Nisan 13, Jisas i joen wetem ol gudfala fren blong hem, bifo we hem i ded. Hemia laswan sapa we bambae hem i mekem lafet blong Pasova wetem olgeta, nao biaen, hem i stanemap niufala lafet ya, Kakae Blong Masta. Lafet ya i impoten tumas, taswe oli mas rere gud long hem. Ale, Jisas i sanem Pita mo Jon, tufala i go mekemrere ol samting blong lafet ya. (Luk 22:7-13) Stat long taem ya, evri yia ol Kristin oli rere gud bifo we oli mekem Memoriol. (Luk 22:19) ?Wanem sam samting we yumi mas mekem blong rere from Memoriol long namba 3 Eprel?

Ol Elda Oli Mas Rerem Ol Samting Ya:

Mekemrere plan blong yusum Haos Kingdom no wan narafala haos blong mekem Memoriol. Mo meksua se i gat inaf jea, laet, mo fan. Mekem plan blong klinim ples blong Memoriol.
Jusum gud brata we i naf blong mekem tok blong Memoriol, wan jeaman, mo ol brata we bambae oli prea from bred mo waen.
Sipos plante kongregesen oli yusum semfala Haos Kingdom, ol elda oli mas tingrere long taem blong miting blong Memoriol blong wanwan kongregesen. Mo oli mas tingbaot olsem wanem blong mekem se ol man oli no fasfas tumas taem oli kam insaed mo taem oli goaot.
Jusum ol brata we oli pasem bred mo waen, mo oli mas mekem smol miting wetem olgeta blong oli save wanem blong mekem.
Meksua se i gat stret waen mo flaoa, plet, glas blong waen, tebol, mo kaliko blong tebol.

Ol Pablisa Oli Mas Rerem Ol Samting Ya:

Joen fulwan long taem blong seremaot ol pepa blong singaot ol man oli kam long Memoriol.
Mekem lis blong ol man we bambae oli singaot olgeta, olsem ol Baebol stadi, ol famle, ol fren long skul mo long wok, mo eni narafala man we oli save, mo oli go givim pepa blong Memoriol long olgeta.
Ridim mo tingting dip long Baebol riding blong Memoriol.
Kam eli long Memoriol blong welkamem ol visita.