Yusum Gud Buklet Ya, ?Hu i Stap Mekem Samting We Jehova i Wantem?
Blong Pulum Man We i Stadi i Kam Long Ogenaesesen
1. ?Oli wokem niufala buklet ya blong wanem?
1 ?Yu yusum finis niufala buklet ya? Oli wokem buklet ya blong givhan long ol Baebol stadi blong oli save se: (1) yumi wanem kaen man, (2) wanem wok blong yumi, (3) yumi wok folem wanem plan. Long evri pej blong niufala buklet ya, i gat wan stadi. Long en blong stadi we yumi mekem wetem man, bambae yumi tekem faef no ten minit blong tokbaot wan pej blong niufala buklet ya.
2. ?Niufala buklet ya i olsem wanem?
2 ?Buklet Ya i Olsem Wanem?: Buklet ya i gat tri haf blong hem. Ol haf ya wanwan oli tokbaot wan samting long saed blong ogenaesesen blong Jehova, olsem we yumi luk long paragraf 1. I gat 28 stadi long hem. Ol taetel blong olgeta oli raetem olsem kwestin. Ol smol stamba tok we oli raetem long blak raeting, oli ansarem kwestin ya. Yu save luk ol pija blong bitim 50 kantri, we oli soemaot se wok blong yumi i kasem olgeta ples long wol. Long sam pej, i gat bokis ya tu we nem blong hem “Traem Save Moa.” Long bokis ya, i gat sam advaes we yu save askem long Baebol stadi blong i folem.
3. ?Yumi yusum buklet ya olsem wanem?
3 ?Olsem Wanem Blong Yusum Buklet Ya?: Fastaem, yu soem taetel blong stadi. Biaen, yutufala i ridim ol haf, mo yu makem ol smol stamba tok we oli stap long blak raeting. Yutufala i tokbaot ol kwestin we i stap long en blong pej. Yutufala i save ridim ful pej wantaem, no maet yutufala i ridim mo tokbaot ol haf wanwan. Yu mas luksave ol vas we i gud blong ridim wetem man we i stadi. Yu no mas foget blong tokbaot ol pija, mo bokis ya “Traem Save Moa.” Plante taem i gud yu tokbaot ol stadi ya, stat long faswan i go. Be sipos yu luk se wan stadi i stret long samting we man i intres long hem, yu save go stret long stadi ya. Sipos asembli i stap kam klosap, yutufala i save go stret long stadi 11, we i tokbaot ol asembli.
4. ?Yumi glad tumas long niufala buklet ya from wanem?
4 Taem yumi mekem Baebol stadi long wan man, yumi stap givhan long hem blong i save gud Papa blong yumi long heven. Be yumi mas givhan long hem tu blong i save ogenaesesen blong Jehova. (Prov. 6:20) !Yumi glad tumas long niufala buklet ya we i save givhan long yumi blong pulum man i kam long ogenaesesen ya!