Ol Profet Oli Soemaot Gudfala Rod Long Yumi—Jona
1. ?Wanem sam gudfala fasin we Jona i gat?
1 ?Wanem tingting blong yu long profet Jona? Sam man oli talem se hem i wan man blong fraet mo hem i no gat sore. Be stori blong Jona i soemaot se hem i gat tingting daon, tingting blong hem i strong, mo hem i tingbaot narafala. ?Olsem wanem blong gat ol gudfala fasin ya we Jona i soemaot?—Jem. 5:10.
2. ?Olsem wanem blong gat tingting daon olsem Jona?
2 Hem i Gat Tingting Daon: Taem Jehova i sanem Jona i go long Nineve, Jona i ronwe i go long defren ples. Yumi no sapraes long samting ya, from we ol man Asiria oli raf tumas. Plante man oli talem se taon blong Nineve hem i ples blong ol “man blong kilim man i ded.” (Neham 3:1-3) Nating se i olsem, Jehova i stretem Jona, mo Jona i gat tingting daon from we hem i agri blong go long Nineve. (Prov. 24:32; Jona 3:1-3) I tru se, fastaem, Jona i ronwe, be biaen hem i mekem samting we Jehova i talem long hem blong mekem. (Mat. 21:28-31) ?Olsem wanem long yumi? ?Yumi gohed blong talemaot gud nius nating se oli stretem yumi from wan slak fasin blong yumi, mo nating se ol man long teritori blong yumi oli no wantem lesin?
3. ?From wanem yumi nidim strong tingting mo yumi mas tingbaot narafala taem yumi talemaot gud nius?
3 Hem i Gat Strong Tingting Mo i Tingbaot Narafala: Taem Jona i luksave se desisen we hem i mekem blong ronwe i go long Spen, i putum laef blong ol boskru long denja. Ale, hem i rere blong ded blong sevem olgeta ya. (Jona 1:3, 4, 12) Biaen, taem hem i go long Nineve, hem i no fraet blong wokbaot olbaot long taon ya. Ating hem i traem faenem wan ples we i stret blong hem i talemaot tok we Jehova i talem blong jajem olgeta. !Olgeta samting ya oli soemaot se Jona i gat strong tingting, hem i no wan man blong fraet! (Jona 3:3, 4) ?Olsem wanem long yumi tede? Yumi mas gat strong tingting tu blong prij taem ol man oli agensem yumi. God nomo i save mekem tingting blong yumi i strong olsem. (Wok 4:29, 31) Wan narafala fasin we yumi mas gat taem yumi talemaot gud nius, hemia se yumi mas tingbaot narafala. ?From wanem? From we yumi stap yusum taem, paoa, mo mane blong yumi.—Wok 20:24.
4. ?From wanem i gud yumi tingbaot gudfala fasin blong ol profet blong Jehova?
4 Taem yu ridim stori blong wan profet blong Jehova, stori ya i save givhan long yu sipos yu tingbaot ol kwestin ya: ‘?Sipos mi mi stap long ples blong profet ya, bambae mi mekem wanem? ?Mi save mekem wanem blong gat ol gudfala fasin olsem profet ya?’ (Hib. 6:11, 12) Long ol narafala Kingdom Wok Blong Yumi bambae yumi tokbaot sam narafala profet blong Jehova bakegen. Bambae yumi luk wanem gudfala samting we yumi lanem long olgeta ya.