Ansa Long Wan Kwestin

◼ Sipos wan brata i folem wan sista i go blong mekem wan Baebol stadi long doa blong man, ?sista ya i mas kavremap hed blong hem?

Taem wan brata i folem wan sista, blong mekem wan prapa Baebol stadi we sista ya i stap mekem evri wik, yes sista ya i mas kavremap hed blong hem. (1 Kor. 11:3-10) Long Wajtaoa blong 15 Julae 2002, pej 27 i eksplenem se: “Stadi i wan plan we oli mekemrere finis blong tijim man, mo hemia we i mekem stadi ya, hem i gat wok blong lidim stadi. From samting ya, stadi i olsem wan narafala haf blong ol wok long kongregesen. Sipos wan sista i stap lidim stadi ya long fored long wan brata, hem i mas kavremap hed blong hem.” Hem i mas kavremap hed blong hem, nating se hem i mekem stadi ya insaed long haos, no i stanap long doa nomo, no long eni narafala ples.

Taem wan brata i folem wan sista blong mekem wan visit we oli stanap nomo long doa, no maet hem i mekem visit ya blong soemaot long man olsem wanem blong stadi, no maet blong tokbaot sam save insaed long buk blong stadi, long taem olsem, sista ya i no nid blong kavremap hed blong hem. Bifo we wan man i kam wan prapa Baebol stadi, plante taem yumi visitim hem bakegen mo bakegen, be samtaem yumi stanap nomo long doa. Taswe, pablisa i mas skelem evri samting long saed blong stadi, nao hem nomo i mas luksave wetaem i stret blong hem i kavremap hed blong hem.