Rod Magasin—Wan Gudfala Rod Blong Statem Ol Baebol Stadi
1. ?From wanem ogenaesesen blong Jehova i pulum ol pablisa blong oli traehad blong mekem rod magasin wetem ol man?
1 Plante man oli no wantem stadi Baebol wetem yumi, be oli laekem blong ridim ol magasin blong yumi. From samting ya, longtaem finis i kam, ogenaesesen blong Jehova i pulum ol pablisa blong oli traehad blong mekem rod magasin wetem ol man. Taem ol man oli stap gohed blong ridim ol magasin blong yumi, plante taem oli save kam we oli wantem tumas Tok blong God. (1 Pita 2:2) Ale yumi sek se wan dei, oli ridim wan samting long ol magasin we i pulum tingting blong olgeta, nao oli glad blong stadi long Baebol.
2. ?Yu save mekem wanem blong givhan long wan rod magasin, blong hem i intres moa long trutok?
2 Yu Putum Wota Long Ol Sid Blong Trutok: I gud we yu storian moa wetem man i bitim we yu givim ol niufala magasin long hem mo yu aot kwiktaem. Yu mas traehad blong savegud hem mo fren gud wetem hem. Olsem nao bambae yu save bilif blong hem, laef blong hem, mo samting we hem i intres long hem. Taem yu savegud hem, bambae yu save wanem blong talem, taem yu storian wetem hem. (Prov. 16:23) Evritaem, bifo we yu go luk hem, yu mas reregud. Sipos yu luk se i stret, yu save tokbaot smoltaem wan poen mo wan vas we i stap long Wajtaoa no long Wekap! Hemia i olsem we yu stap putum wota long eni sid blong trutok we i stap long hat blong hem. (1 Kor. 3:6) Yu mas raetemdaon dei we yu visitim hem, ol buk we yu givim long hem, ol vas mo ol samting we yu tokbaot wetem hem.
3. ?Hamas taem yu mas gobak blong luk ol rod magasin?
3 ?Hamas Taem Yu Mas Gobak Blong Luk Hem? Yu mas gobak wan taem evri manis blong karem ol laswan magasin i go long hem. Be, maet yu jusum blong gobak plante taem long manis, sipos yu naf mo sipos man ya i intres. Maet wan no tu wik afta we yu givim wan niufala magasin long hem, yu save gobak mo talem se: “Mi pas smoltaem blong tokbaot wan samting long magasin we mi givim long yu.” Hemia bambae i mekem se man ya i wantem ridim wan haf long magasin ya. Sipos hem i ridim finis ol magasin we yu givim long hem, yu save askem long hem blong i talemaot wan haf we hem i laekem. Biaen yu save storian smol wetem hem long haf ya. Sipos man ya i glad blong ridim ol magasin blong yumi, maet yu save gobak mo givim buk, no buklet, no traket, we yumi stap seremaot long manis ya we yu visitim hem.
4. ?I gud we sam samtaem yu mekem wanem blong luk sipos man i glad blong stadi Baebol?
4 Yu no mas wet se man blong haos i askem stadi. Yu nao yu mas faswan blong mekem samting ya. Nating se maet bifo hem i no wantem stadi Baebol, be i gud we sam samtaem yu tokbaot haf ya “Baebol i Ansa” we i stap long ol Wajtaoa, mo yu traem luk sipos hem i glad taem yu storian wetem hem long haf ya. Maet yu save statem Baebol stadi wetem hem. Be sipos yu luk se hem i no wantem stadi yet, yu mas gohed blong karem ol magasin i go long hem blong mekem se hem i gohed blong intres long trutok.