!Yu No Mestem Janis Ya!
Memoriol i Wan Taem Blong Talem Tangkiu Long Jehova
1. ?Memoriol i givim janis long yumi blong mekem wanem?
1 Memoriol long namba 14 Eprel i wan nambawan janis blong talem tangkiu long Jehova from ol gudfala fasin blong hem. Stori we i stap long Luk 17:11-18, i soemaot tingting we Jehova mo Jisas i gat long fasin ya blong talem tangkiu. Be sore tumas, long ol ten man we Jisas i mekem olgeta oli kam gud bakegen, wan nomo i tekem janis blong gobak mo talem tangkiu long Jisas. Long fiuja, sakrefaes blong Jisas bambae i mekem ol sik oli finis, mo laef we i no save finis i kamtru. Yes, evri dei bambae yumi talem tangkiu long Jehova from ol blesing ya. Long ol wik we i kam, ?olsem wanem yumi save mekem samting ya?
2. ?Wanem i save givhan long yumi blong yumi wantem talem tangkiu?
2 Yumi Mas Wantem Blong Talem Tangkiu: Tingting blong yumi nao i pusum yumi blong yumi wantem talem tangkiu from sakrefaes blong Jisas. Samting we i save givhan long ol famle blong oli talem tangkiu, hemia blong folem program blong Baebol riding blong Memoriol. Yu save faenem olgeta long Kalenda blong yumi, mo long smol buk ya Ridimgud Ol Tok Blong Baebol Evri Dei. Sipos yumi mekem olsem, bambae yumi wantem talem tangkiu moa from sakrefaes blong Jisas. Mo samting ya bambae i pulum yumi blong yumi gat ol gudfala fasin.—2 Kor. 5:14, 15; 1 Jon 4:11.
3. Long taem blong Memoriol, ?yumi talem tangkiu olsem wanem?
3 ?Yumi Talem Tangkiu Olsem Wanem?: Yumi talem tangkiu long narafala, taem yumi mekem wan gudfala samting long hem. (Kol. 3:15) Wan long ol man ya we i gat leprosi i traehad blong faenem Jisas mo i talem tangkiu long hem. Yumi save tu, se hem i glad blong talemaot merikel ya we Jisas i mekem long hem. (Luk 6:45) Sipos yumi wantem talem tangkiu from sakrefaes blong Jisas, bambae yumi joen fulwan long spesel wok ya blong singaot ol man oli kam long Memoriol. Wan gudfala rod blong talem tangkiu, hemia taem yumi mekem wok blong haftaem paenia, no yumi joen moa long wok blong prij. Mo tu, bambae yumi welkamem ol niuwan we oli kam long Memoriol, mo yumi rere blong ansa long ol kwestin blong olgeta.
4. ?Yumi no mas mestem wanem?
4 Yumi no save, maet Memoriol ya hem i laswan. (1 Kor. 11:26) Be yumi save se taem Memoriol ya i pas, janis ya blong talem tangkiu i finis. Taswe !yu no mestem janis ya! I gud ol toktok blong yumi blong talem tangkiu, mo ol tingting blong yumi oli mekem Jehova we i letem pikinini blong hem i ded, i glad.—Sam 19:14.