‘Yu Tekem Ol Man Oli Kam Wanples’

1. ?Wanem samting long asembli blong tri dei mo intenasnal asembli, we i sem mak long taem ya we ol man Isrel oli kam wanples?

¹ Smoltaem afta we neson blong Isrel i aot long Ijip, Jehova i talem long Moses se hem i mas “tekem ol man oli kam wanples” long Hil ya Sinae. Long ples ya oli save harem ol tok blong Jehova, nao oli save ona long hem mo oli save tijim ol pikinini blong olgeta long ol samting we Jehova i mekem. (Dut. 4:10-13) !Ating oli no fogetem taem ya we i mekem bilif blong olgeta i kam strong! Long ol manis we oli kam, ol man blong Jehova bambae oli joen wanples long asembli blong tri dei mo long ol intenasnal asembli, blong Jehova i tijim olgeta. ?Yu mas mekem wanem blong joen fulwan long taem ya?

2. ?Yu mas mekem wanem blong rere from asembli?

² ‘Yu Mas Rere’: Jehova i talem long ol man Isrel se oli “mas rere” blong oli kam wanples long Hil ya Sinae. (Eks. 19:10, 11) Long sem fasin, yumi evriwan we bambae yumi go long asembli blong tri dei, yumi mas rere gud, i no olgeta nomo we oli gat ol haf long asembli ya. Plante long yumi oli wok fultaem, taswe oli mas askem long bos blong olgeta blong oli save spel long taem ya. Maet yu yu fesem sem problem olsem Nehemaea. Hem i wantem lego wok blong hem blong hem i save go long Jerusalem, mo blong givhan long wok blong bildim stonwol. Be hem i no save sipos King Ataksekses bambae i agri no nogat. Ale, hem i prea mo biaen hem i gat strong tingting blong toktok long King. Nao King i letem hem i go, mo i givim sam samting long hem, blong givhan long wok blong bildim stonwol ya bakegen. (Neh. 2:1-9) ?Olsem wanem long yu? ?Yu yu askem spel long bos blong yu finis? ?Yu yu pem rod blong yu finis blong go long asembli? ?Yu save se bambae yu slip wea? Sipos yu no mekem yet, ol elda bambae oli glad blong givhan long yu. I gud yu mekem plan blong go eli long asembli, mo yu mas rere blong ‘holem ol trutok ya we bambae yu harem.’—Hib. 2:1.

3. ?Wanem i save givhan long yumi blong yumi rerem hat blong yumi?

³ Yu mas rerem hat blong yu tu, olsem nao yu save lesin gud mo yu lanem samting. (Esra 7:10) Program blong asembli ya, bambae i stap tu long Websaet ya jw.org, mo bambae i gat ol taetel blong ol tok wetem wan no tu stamba vas blong olgeta. Long ol wik bifo long asembli, ol famle wanwan oli save tokbaot ol samting ya long naet blong Famle Wosip. Sam pablisa oli printim program blong asembli, mo oli yusum blong raetem ol poen we oli laekem long asembli ya.

4. ?Olsem wanem ol papa mo mama oli save tijim ol pikinini blong olgeta long taem blong asembli?

⁴ ‘Yu Tijim Ol Pikinini Blong Yu’: Wan stamba risen we i mekem se i gat asembli long Hil ya Sinae, hemia blong ol man Isrel oli save “tijim ol pikinini blong olgeta.” (Dut. 4:10) Tede tu, ol asembli blong tri dei oli givim janis long ol papa mo mama blong oli tijim ol pikinini blong olgeta. Ol pikinini oli mas sidaon wetem papa mo mama blong olgeta, olsem nao tufala i save givhan long olgeta blong oli lesin gud. Evri dei afta we program i finis, ol famle oli save tokbaot ol poen we oli laekem. Mo biaen, long taem blong famle wosip, oli save tokbaot bakegen ol poen we oli kamaot long trifala dei ya.

5. ?Asembli bambae i givhan long yumi olsem wanem?

⁵ Asembli ya blong ol man Isrel, i givhan long olgeta blong oli harem gud se oli man blong God. (Dut. 4:7, 8) Asembli ya we bambae yumi gat i no longtaem, bambae i givhan long yumi long sem fasin. Long trifala dei ya, bambae yumi no joen long wol blong Setan, be yumi joen wanples wetem ol man blong God, mo yumi harem gud wetem olgeta. (Aes. 35:7-9) Dei blong God i kam klosap tumas, taswe yumi no mas mestem janis ya, blong joen wanples wetem ol brata mo sista blong yumi, blong yumi lefleftemap tingting blong yumi.—Hib. 10:24, 25.