Distrik Mo Intenasnal Asembli Blong 1998, “Fasin Blong Laef We God i Glad Long Hem”
1 Proveb 10:29 i talem long yumi se “rod blong Jeova i wan sef ples.” !Taswe stampa tok blong asembli blong yia ya i stret nomo se: “Fasin Blong Laef We God i Glad Long Hem”! ?Olsem wanem bambae stampa tok ya i kamaot oltaem long asembli ya blong trifala dei? Yumi evriwan i wet wetem bigfala glad blong luk wanem i stap rere finis blong yumi. Bambae i gat plante impoten tijing oli kamaot.
2 Ating sam misinari, sam brata mo sista we oli go blong bildim ol nyufala Betel long ol narafala kantri, mo sam narafala tu we oli stap prij long ol narafala kantri, bambae oli joen long asembli blong yu. Ating plante taosen brata mo sista we oli kam long ol narafala kantri bambae oli stap long ol taon we i gat wan intenasnal asembli long olgeta. Maet bambae yu save mitim sam we oli visitim kantri blong yu. Bambae i gat plante ripot oli kamaot long asembli blong soem olsem wanem Jeova i stap blesem wok long ol defren ples.
3 Bambae i No Blong Nating Nomo Sipos Yu Traehad Blong Joen Long Hem: Plante brata blong yumi long Afrika, oli kasem hadtaem from we i gat faet mo trabol long plante ples long kantri ya. Olgeta ya oli tingbaot ol asembli ya blong ol man blong Jeova olsem samting we i sevem laef blong olgeta. Samfala oli mas wokbaot longwe blong joen long ol asembli, be oli no save mestem wan. Wan brata we i gat 73 yia mo i stap long Demokratik Ripablik blong Kongo (bifo Sair), i wokbaot kolosap 450 kilomita long leg nomo blong go long asembli. Hem i kasem ples blong asembli, 16 dei afta we i statem wokbaot blong hem. Ol leg blong hem oli solap, be hem i glad blong stap long ples ya. Taem asembli i finis, hem i glad tumas mo i harem se hem i strong moa long saed long Kristin bilif, ale hem i wokbaot long leg bakegen blong gobak long ples blong hem. !Brata ya i mekem olsem blong plante yia finis!
4 Long Mosambik, wan distrik elda mo waef blong hem, tufala i klaem antap long wan bigfala hil mo krosem wan bigfala drae ples long leg nomo, blong oli save joen long wan seket asembli. Tufala i tekem 45 haoa blong wokbaot 90 kilomita. Traehad blong tufala ya i leftemap tingting blong olgeta we oli kam long asembli ya. Plante famle we oli stap long asembli ya oli bin mekem bigfala fasin traehad olsem blong kam. Distrik elda i talem se sam brata, wetem wan we i gat 60 yia tu, !oli wokbaot 200 kilomita long leg!
5 ?Yu yu mekem ol stret plan finis blong kam long asembli long yia ya? Yu no nid blong wokbaot blong plante kilomita long leg nomo, be i sua se yu mas traehad mo lego sam samting we yu nomo yu wantem, blong yu mo famle blong yu i save joen long asembli ya. Mekem plan blong stap blong fulwan asembli, long stat go kasem en blong hem. Plante studen blong Baebol oli stap gohed gud long saed long Kristin bilif, we kolosap oli rere blong givim laef blong olgeta i go long Jeova. Asembli ya i save givhan long olgeta blong tekem stret disisen ya. ?Yu yu singaot ol studen blong yu finis mo ol narafala we oli intres, blong oli kam long asembli?
6 Asembli Blong Tri Dei: Long yia ya, bambae i gat 2 asembli long Nyu Kaledonia mo 1 long Vanuatu. Wajtaoa blong Febuwari 15, 1998, i talem ol dei mo ples blong ol asembli ya.
7 Makemgud Poen Ya: Plis no mekem plan blong go long wan intenasnal asembli we Sosaeti i no bin askem kongregesen blong yu blong go long hem. Ol ples we bambae yumi mekem ol intenasnal asembli long olgeta, oli no naf nating long ol man we oli laekem blong go long olgeta. Sipos yu soem respek mo obei long plan ya, bambae olgeta samting i folem stret oda mo i no olbaot.—1 Kor. 14:33, 40.
8 Long Fraede, Sarede, mo Sande moning, asembli bambae i stat long haf pas 9. Long Fraede mo Sarede, bambae i finis long 5 klok long aftenun, mo long Sande, long 4 klok long aftenun. Doa bambae i open long 8 klok long moning long ol trifala dei. Ol volontia nomo bambae oli save go insaed bifo long taem ya. Be, i no gat wan man i save blokem jea bifo 8 klok long moning.
9 Taem yumi wokbaot blong go mo kambak long asembli ya, yumi save lukaot ol jans blong prij. Man we i wok long ples blong bensin, man we i wok long stoa, long epot, ol man we oli wok long hotel, mo ol man we oli wok long restoron, maet oli save intres long ol tok blong Kingdom. Tingrere long wok ya, karem ol traket, ol nyufala magasin, ol buklet, mo ol narafala buk wetem yu. Olsemia, yu save tekem jans blong prij long sam man we oli no gat jans blong harem gud nyus long narafala rod.—2 Tim. 3:17.
10 ‘Lesingud Mo Tingbaot Ol Tok’: Olgeta we oli kam long asembli oli waes sipos oli folem advaes blong Luk 8:18. I gud we evriwan i karem wan Baebol, singbuk, mo notbuk wetem hem. Lesingud blong kasem ol stampa poen blong olgeta tok, mo raetemdaon sam smol not nomo. Tingbaot olsem wanem yu yu save folem ol advaes we yu stap harem. Evri naet blong asembli, bifo we yu go slip, i gud blong lukluk bakegen long ol not blong yu, mo traem skelem sipos yu yu stap folemgud fasin blong laef we God i glad long hem.—Prov. 4:10-13.
11 Long ol asembli we oli pas finis, i gat sam man we oli aot long ples blong asembli taem ol tok oli stap gohed, blong go sidaon long trak blong olgeta, mekem se oli mestem sam haf blong asembli. Sam narafala oli stap storeyan afsaed long ples blong asembli, long ol samting we oli no impoten, bitim we oli stap sidaon mo lesin long ol tok. Sam grup blong ol yangfala oli bin lego ples blong asembli long medel blong aftenun. Samfala man blong Jeova long taem bifo, oli mekem bigfala sin from we oli no lesingud long ol tok we Jeova i talem bakegen mo bakegen long olgeta. I sua se yumi no wantem mekem semfala mastik. (2 King 17:13-15) “Slef we i stret mo waes” i rerem tijing we yumi evriwan i nidim. Taswe, i impoten tumas, we “yumi mas strong moa blong holem ol trutok ya we yumi harem” long trifala dei blong asembli ya. Evri dei bambae i gat wan samting we i pulum intres blong yumi bigwan, wetem ol save we i sua se bambae i mekem fasin blong laef blong yumi i kamgud moa long fyuja. Yumi mas lesingud mo yumi mas yusum fulwan ol save long saed long tijing we Jeova i givim long asembli ya. Olsemia nao, hop blong yumi bambae i strong olsem angka we i holem bot i stap strong, nao bambae “yumi no lusum rod blong yumi” mo gowe long fasin blong laef we God i glad long hem.—Mat. 24:45, NW; Hib. 2:1.
12 Ol Klos We Oli Presem Jeova: Long taem blong yumi ya we fasin blong ol man i nogud tumas, yumi mas strong moa blong holem ol trutok we yumi harem finis, blong yumi naf blong blokem ol tingting blong wol we oli save spolem fasin blong yumi. (1 Kor. 2:12) Klos mo hea blong yumi oli no mas bitim mak, mo oli mas givim ona long God ya we yumi wosipim. (1 Tim. 2:9, 10) Yu no nid blong putum ol sas klos, blong joen wetem olgeta we oli ‘flasem tijing blong God ya we i sevem yumi, long olgeta samting.’ (Taetas 2:10) Lukluk nambawan advaes blong Baebol we i wokgud, long Wajtaoa blong Jun 15, 1997 pej 17 mo 18, haf 14-18. Yumi neva mas ting nating long bigfala wetnes we yumi save givim taem yumi putum ol stret klos we oli givim ona long Jeova.
13 Wan yangfala Wetnes gel we i gat 16 yia, i talem se wan naet afta long asembli, hem i go long restoron wetem brata blong hem, nao tufala i luk sam narafala brata mo sista we oli jenis finis, oli putum ol klos we oli no stret nating. Plante man we oli stap kakae long restoron oli glad taem oli luk sam Wetnes we oli jenisgud mo we oli stap werem baj blong asembli. Hemia i mekem se ol wetnes ya oli gat jans blong prij long sam long ol man ya.
14 Gudfala Fasin We i Presem Jeova: Yumi save se Kristin fasin blong yumi i save jenisim tingting blong ol narafala long saed long trufala wosip. Taswe, yumi mas mekem fasin blong yumi i laenapgud oltaem wetem gud nyus, mo i presem Jeova.—Fil. 1:27.
15 Las yia, hemia fastaem i gat wan distrik asembli long not blong Angola. Long namba tu dei blong asembli ya, tu polisman oli kam, blong jekem sipos ol man oli no mekem trabol. Tufala i stap blong fuldei. Long en blong dei, tufala i talem se oli sapraes tumas long wanem we oli harem mo long gudfala fasin blong ol man. Wan long tufala i talem se: “?From wanem oli sanem mitufala i kam long ples ya? Mitufala i save finis se ol Wetnes blong Jeova oli mekem ol asembli blong olgeta long fasin we i stretgud.”
16 Wan man blong politik long wan kantri blong Afrika, i ronwe i go long Yurop, taem samfala oli kilim i ded sam narafala memba blong pati blong hem. Man ya i kasem plante problem long laef blong hem mo tingting blong hem i foldaon. Samtaem biaen, hem i agri blong stadi Baebol. Taem hem i joen long faswan distrik asembli blong hem, hem i sapraes se ol man blong ol defren laen oli stap joengud tugeta long pis. Hem i sua nao se hem i faenem trutok. Long asembli ya, hem i tekem disisen blong no moa joen long ol bisnes blong politik. Afta we sam taem i pas, hem i tekem baptaes, mo naoia, hem mo ol pikinini blong hem oli stap mekem wok blong Jeova.
17 ?Fasin blong yumi long yia ya bambae i mekem wanem long ol narafala we oli kam long asembli blong fastaem? ?Bambae oli luksave se yumi gat fasin blong wokgud tugeta? ?Bambae oli sapraes se ples blong asembli i klin tumas, mo se bifo we yumi livim ples blong asembli, yumi mo ol pikinini blong yumi i pikimap ol doti we oli stap kolosap long jea blong yumi? ?Bambae oli luk gudfala fasin blong yumi taem yumi stap wokbaot blong go mo kambak long ples we yumi stap slip long hem mo long ples blong asembli? ?Bambae oli luksave se yumi ol papa mama i lukaotgud long ol pikinini blong yumi oltaem? Yumi mas meksua se yumi soem ol gudfala fasin ya, nao taem ol man ya oli luk yumi, bambae oli sapraes gud.
18 Mane Blong Pem Asembli: Long wol ya, wan tikit blong go luk spot no narafala samting long wan stad no bigfala haos, i sas tumas. Hemia from we praes i sas blong rentem ol ples ya long ol bigfala taon. Be oltaem long ol asembli, Sosaeti i folem rul ya se “ol jea oli fri, i no gat kleksin.” ?Be olsem wanem oli save pem ren mo ol narafala samting blong asembli? From olgeta presen mane blong olgeta man we oli joen long asembli. Mifala i sua se, bambae yu gat gladhat blong givim presen, olsem ol man blong God bifo oli gat, from we oli folem eksampel blong Jeova mo Jisas Kraes. (2 Kor. 8:7) Mifala i lukaotgud se ol presen mane i stap sef, mifala i raetemdaon hamas presen mane i gat, mo mifala i yusum mane ya long stret rod. Ol jek we yumi givim olsem presen mane, yumi mas raetem i go long “ol Wetnes blong Jeova.”
19 Jea: Rul we yumi bin folem long olgeta yia we oli pas, bambae i no jenis, hemia se, YU SAVE BLOKEM JEA BLONG STRET FAMLE BLONG YU MO BLONG OLGETA WE YU KAREM OLGETA LONG TRAK BLONG YU NOMO. I gud blong luk we ol samting i kamgud moa long saed ya, mo samting ya i mekem se i gat moa lav i stap long ol asembli. Long sam haos asembli, sam jea oli stap long ples we i moa isi blong sidaon long hem i bitim ol narawan. Plis tingbaot ol narafala, mo livim ol jea we oli moagud blong ol olfala mo ol narafala we oli nidim ol jea olsem. Rimemba se, man we i gat ‘lav i no save tingbaot hem wan nomo.’—1 Kor. 13:4, 5; Fil. 2:4.
20 Ol Kamera, Video Kamera, Mo Teprikoda: Yu save yusum ol kamera mo ol samting blong rikodem asembli. Be taem yu yusum ol mesin ya, yu no mas blokem narafala blong i no lesingud long ol tok. Sipos yu wokbaot blong tekem ol foto taem asembli i stap gohed, yu save blokem ol narafala we oli stap traehad blong lesin long ol tok. Yu no mas joenem ol mesin blong rikodem ol tok, oli go long lektrik no saon blong asembli. Mo tu, ol mesin ya oli no mas blokem ol ples blong wokbaot, no blokem ol narafala blong lukluk brata we i givim tok.
21 Dokta: Dokta long asembli i blong givhan taem wan man i nidim help kwiktaem nomo. Plis karem prapa meresin blong yu, olsem panadol, meresin blong dring taem bel i soa, ol kaliko blong fasem wan kil, mo ol pin blong pinim kaliko long bebi, from we bambae i no gat ol samting ya long asembli. Olgeta we oli gat wan sik finis, olsem sik blong suga, hat, no narafala samting, oli mas karem ol prapa meresin blong olgeta. Olgeta ya oli mas kam wetem wan famle blong olgeta no wan memba blong kongregesen we i save finis problem ya, mo i save wanem blong mekem blong givhan, sipos i nidim. Sam problem oli bin kamaot long asembli taem sam man we oli gat wan sik, oli stap olgeta nomo nao sik ya i kasem olgeta kwiktaem. Sipos sam we oli gat helt problem oli no gat sam famle oli stap, oli mas talem long ol elda, mo olgeta ya bambae oli mekem plan blong narafala i givhan long olgeta. I no gat sam spesel rum long asembli, blong olgeta we oli sik from we bodi blong olgeta i nogud long sam samting we oli stap raonabaot long olgeta.
22 Kakae Long Asembli: Kakae mo dring bambae i stap long ples blong asembli olsem bifo. Be, olgeta we oli wantem karem prapa kakae blong olgeta, oli save mekem olsem. I moagud blong karem kakae long wan smol bokis we i mekem i stap kolkol, i bitim we yu livim ples blong asembli long smol spel long dina blong go pem wan samting long stoa no blong gobak long haos blong yu. Yumi mas tingbaot se smol kakae nomo we i gud long bodi mo we i isi blong karem, i naf. Bokis no bag blong kipim kakae i stap kolkol i mas smol i naf blong go aninit long jea. Mifala i talem bakegen se ol botel we oli wokem long glas mo alkol oli no mas kam insaed long haos asembli. I gat samfala we oli bin kakae mo dring taem ol tok oli stap gohed, hemia i no soem respek nating.
23 !Yumi glad se i no longtaem, bambae i gat Distrik Asembli blong 1998, “Fasin Blong Laef We God i Glad Long Hem”! ?Yu yu mekem finis olgeta plan blong joen long hem? Mifala i hop se bambae yu gat wan sef trep, mo bambae yu kambak long ples blong yu wetem nyufala paoa, rere blong gohed long nambawan wok blong Jeova mo folem fasin blong laef we God i glad long hem, blong bambae yu save kasem blesing blong olwe.
[Bokis]
Ol Samting Blong Tingbaot Long Saed Blong Distrik Asembli
▪ Baptaes: Olgeta we bambae oli tekem baptaes, oli mas sidaon long ol jea we ol brata oli makemaot, bifo we asembli i stat long Sarede moning. Olgeta wanwan oli mas karem klos blong swim we oli stret, wetem wan taoel. Long ol yia we oli pas, samfala oli bin putum ol klos blong swim we oli no stret long wan taem olsem, mo we oli no soem respek. Ol elda oli mas meksua se olgeta evriwan oli kasem save long poen ya, taem oli mekem ol kwestin long buk ya Minista Wok Blong Yumi wetem olgeta we oli wantem tekem baptaes. Baptaes i soem se man i givim laef blong hem i go long Jeova, taswe hem i wan samting we i spesel mo we man ya i mekem wetem Jeova nomo. From samting ya, i no stret se olgeta ya oli holholem olgeta, no holholem han, taem oli tekem baptaes.
▪ Ol Baj: Plis, werem baj blong 1998 asembli oltaem, long taon we asembli i stap long hem, mo taem yu mekem trep blong go mo kambak long asembli. Plante taem, samting ya i save givim jans long yu blong prij. Yu save kasem ol baj mo plastik blong olgeta long kongregesen blong yu, from we yu no save faenem olgeta long ples blong asembli. Yu no mas wet kasem sam dei nomo bifo asembli, blong askem ol baj ya blong yu mo famle blong yu. Yu no mas fogetem blong karem nyufala Kad Blong Hospital wetem yu tu.
▪ Ol Rum: SIPOS YU KASEM WAN PROBLEM, plis yu no mas fraet blong talem long ofis blong asembli we i lukaot long ol ples blong slip, taem yu stap yet long asembli. Olsem nao, ol brata ya oli save givhan long yu blong stretem problem ya kwiktaem. Sekretari blong ol kongregesen oli mas sua se oli sanem kwiktaem ol pepa blong askem ples blong slip, oli go long stret adres blong asembli. Sipos yu no moa nidim wan ples blong slip we yu askem finis, kwiktaem nomo yu mas talemaot long hemia we yu mas slip long haos blong hem, mo long ofis blong asembli we i lukaot long ol ples blong slip. Nao oli save givim rum ya long narafala.
▪ Ol Kat Blong Bebi: Long sam haos asembli we yumi rentem, yumi no save yusum ol kat blong bebi. Ol loa blong lukaot long ol man blong oli stap sef, oli blokem ol papa mama blong oli no yusum ol kat ya long ples blong wokbaot no bitwin long ol laen blong jea. From we bigfala hif blong man i save fasfas, ol kat blong bebi oli denja long ol bebi mo long ol narafala we oli save foldaon long olgeta. Plis no karem ol kat blong bebi oli go long ples blong asembli. Ol jea blong bebi no pikinini we papa mama i save fasem long jea kolosap long olgeta, oli oraet. Tangkyu long fasin blong yu blong obei long ol plan ya we oli impoten.
▪ Ol Volontia: ?Yu save tekem sam taem long asembli blong givhan wetem ol wok? Nating se yu wok blong ol brata blong yu blong sam haoa nomo, samting ya bambae i givhan bigwan mo i mekem yu yu haremgud tumas. Sipos yu save givhan, plis go luk ol brata long ofis blong asembli we i lukaot long ol volontia. Ol yangfala we oli no gat 16 yia yet, oli save givhan tu, taem oli wok wetem papa no mama blong olgeta no wetem wan narafala bigman.
▪ Woning: Meksua se yu lokem trak blong yu oltaem, mo no livim samting insaed long hem we i save pulum ae blong stilman. Ol stilman oli laekem blong wokbaot long medel blong ol bigfala hif blong man. I no waes blong livim enikaen sas samting long jea blong yu taem yu no stap sidaon. Samfala we oli stap long asembli ya, oli no Kristin man. I no waes blong livim samting i stap we i save pulum olgeta blong stil. Sam ripot oli talem se, sam man oli bin traem blong pulum pikinini blong folem olgeta i go afsaed long asembli. LUKAOTGUD LONG OL PIKININI BLONG YU OLTAEM.