Distrik Asembli 1999 “Profet Tok We i Kamaot Long God”
1 Taem ol man Isrel oli stap rere blong go insaed long Promes Lan, Moses i talem long olgeta se oli mas tinghevi long ol tok we God i bin givim long olgeta. Moses i talem long olgeta se: “Ol tok ya oli no toktok nating nomo, laef blong yufala i stap long hem.” (Dut. 32:45-47) Laef blong yumi i sas tumas long ae blong Jeova, taswe hem i gohed blong yusum nambawan Tok blong hem blong lidim yumi. ?Yumi stap soem tangkiu from samting ya? Sipos yes, bambae yumi wantem tumas blong stap long tri dei Distrik Asembli ya “Profet Tok We i Kamaot Long God,” blong kasem wanem we Jeova i rerem blong yumi.
2 Long yia ya, bambae yumi gat tri distrik asembli long teritori we Branj ofis blong yumi i lukaot long hem. Faswan bambae i stap long Luganville, Santo, long Ogis namba 13 kasem 15, 1999. Ol tok we oli kamaot long program ya bambae oli stap long Bislama. Biaen, long Septemba 3-5 mo Septemba 10-12, bambae i gat tu narafala asembli long Franis lanwis. Tufala asembli ya bambae oli stap long Nouméa, long Haos Asembli blong Normandie. Ating kongregesen blong yu i harem finis se weswan long ol asembli ya we bambae yu yu joen long hem.
3 Ating yu mekem plan finis blong stap long olgeta dei blong asembli ya from we yu save se Jeova i wantem yumi evriwan blong stap long taem ya. Yu save sua se, Jeova i luk ol traehad we ol man blong hem oli mekem mo ol samting we oli rere blong lego blong stap long asembli ya. Jeova bambae i stap tingbaot ol traehad ya oltaem, mo bambae hem i glad from. (Hib. 6:10) Sipos yumi stap long olgeta dei blong asembli ya, i stat long faswan singsing go kasem laswan prea, yumi soemaot long Jeova se ol tok blong hem oli impoten tumas long yumi. (Dut. 4:10) Mo tu, yumi soemaot se yumi gat tangkiu from bigfala wok we plante brata blong yumi oli mekem blong rerem asembli ya.
4 Plante taosen man blong God bambae oli kam long ol asembli ya, taswe i nidim blong mekem gudfala plan fastaem blong i gat oda. I gud blong tingbaot se ol brata oli soem lav blong rerem gud ol asembli. Samting ya i mas pulum yumi blong wokgud folem ol plan, blong “mekem olgeta samting long fasin we i stret gud, we ol man oli glad long hem.” (1 Kor. 14:40) Long ol haf we oli kam biaen, i gat sam advaes mo tok blong tingtingbak we oli blong halpem yumi blong rere gud taem yumi kasem ples blong asembli. Olsem nao bambae yumi save harem gud long ol kakae long saed blong spirit mo gudfala kampani blong ol Kristin brata blong yumi.
Bifo Long Asembli
5 I gat sam Baebol studen no sam man we oli intres long trutok, we maet olgeta tu oli nidim help blong rere from asembli ya. Ol samting we oli luk no harem long asembli ya maet i save pulum olgeta blong kam man blong wosipim Jeova. (1 Kor. 14:25) Ol elda oli mas save long eni man we maet bambae oli nidim help blong faenem wan ples blong slip no transpot blong go long asembli. Long olgeta ya i gat ol olfala brata sista blong kongregesen blong yumi. Yumi save soem lav long olgeta ya sipos yumi halpem olgeta.—Gal. 6:10.
6 ?Yu yu mekem ol plan blong yu finis long saed blong ples we bambae yu slip long hem? Sipos yu stap wetem wan famle, mifala i leftemap tingting blong yu blong folemgud plan we brata we i lukaot long ol Ples blong Slip i mekem. Ating wan long ol brata blong Kongregesen Sevis Komiti i jekem finis olgeta Pepa blong askem Ples blong Slip. Taem hem i finis blong makem olgeta pepa ya, Sekretari blong kongregesen bambae i mas sanem olgeta i go long kongregesen long ples we asembli i stap long hem. Sipos yufala i mas kanselem sam long ol ples blong slip ya, plis talemaot samting ya kwiktaem long ol brata we oli lukaot long ol Ples blong Slip, blong bambae narafala man i save karem ol ples ya. I waes blong rere gud fastaem, blong save weples mo wetaem bambae yu mitim famle ya we bambae i tekem yu yu go stap long haos blong olgeta.
7 Sekretari blong kongregesen blong yu bambae i save talem long yu hu ya ol brata we oli lukaot long ol Ples blong Slip. Sipos yu nidim blong save eni samting long saed blong asembli, askem kwestin long Sekretari blong kongregesen.
8 Nating se bambae i gat dokta no ples blong sikman long taem blong asembli ya, i gud blong karem prapa meresin blong yu olsem panadol, plasta, mo narafala meresin olsem, we maet yu ting se bambae yu nidim. Sipos yu, no wan memba blong famle blong yu i gat wan bigfala sik, olsem problem long hat, diabet, no sam kaen sik olsem, plis karem ol meresin we bambae yu nidim long asembli ya olsem we yu stap mekem taem yu stap long haos no taem yu go spel. I waes sipos wan memba blong famle no wan fren we i gat save long sik blong yu, i stap klosap long yu oltaem, from we hem nao bambae i naf moa blong lukaot long yu sipos yu nidim help.
9 I sua se, bambae yumi gat jans blong prij long ol man taem yumi mekem trep i go long asembli ya, no taem yumi wokbaot i go long asembli ya, no taem yumi stap kambak long haos blong yumi. ?Bambae yu yu rere blong serem trutok wetem narafala man? Yumi evriwan, wetem ol pikinini blong yumi, yumi save givim traket long ol man we yumi mitim long trep blong yumi, olsem ol man long ol ples blong bensin, no narafala ples bakegen. Bambae yumi gat moa jans blong seremaot ol magasin, buklet, no narafala buk, wetem ol man we oli intres. Yumi mas rere blong givim witnes long olgeta man, from we maet yumi no gat jans blong faenem ol man ya long wok blong prij long ol narafala taem.
Long Taem Blong Asembli
10 Evri dei, bambae ol doa blong haos asembli oli open long 8 klok moning. Yu save tekem ol jea we oli naf blong yu mo famle blong yu no olgeta we oli kam wetem yu long trak blong yu nomo. Bambae i no gat sam spesel rum long asembli ya we oli blong ol man we oli sik taem oli stap long ples we i gat win no ol man we oli nogud long sam samting. Evri dei, taem yu lego ples blong asembli, meksua se yu karem olgeta samting blong yu i go wetem yu.
11 Sipos yu wantem givim presen kakae, i gud blong wok folem oda. Beswan rod blong mekem olsem, hemia blong talemaot long brata we i lukaot long ol kakae, wanem we yu yu plan blong karem i kam.—Prov. 15:22; 1 Kor. 14:40.
12 ?Bambae yu tekem baptaes long distrik asembli ya? Long Sarede moning, ol brata bambae oli jusum sam jea blong olgeta we bambae oli baptaes. Plis, i gud blong sidaon long ol jea ya bifo we program i stat. Karem Baebol blong yu, sing buk, taoel, mo wan klos blong swim we i stret. Baptaes i wan taem we yumi mas ona long hem, taswe i no stret blong werem ol klos olsem: ol jin we yumi katem blong mekem traoses, ol sot we oli raetem olkaen toktok long hem, no narafala klos olsem. Ol elda we oli mekem kwestin wetem ol man blong baptaes, long buk ya Ol Rul Blong Mekem Minista Wok Blong Yumi, oli mas meksua se olgeta ya oli kasem save long ol poen ya. From we baptaes i blong soemaot se wan man i givim laef blong hem i go long Jeova God, i no stret we olgeta man blong baptaes oli holem han tugeta taem oli tekem baptaes.
13 Long taem blong asembli yumi gat raet blong yusum: ol kamera, ol tep rikoda mo ol samting olsem. Be, yumi no mas blokem rod blong man i pas, no blokem man blong luk brata we i stap mekem tok. Yumi no mas mekem noes we bambae i mekem se man i no save lesingud. Yumi no mas yusum saon sistem blong asembli ya blong joenem wetem ol rikoda ya blong yumi.
14 Blong sevem taem mo blong no mekem hadwok long ol brata, Sosaeti i plan blong mekem ol kakae we oli isi blong rerem. Bighaf blong ol brata oli bin talem se long rod ya oli faenem se oli gat moa taem blong spel long medel dei, mo oli save spenem taem tu blong storeyan wetem ol narafala brata sista. Bifo long taem blong asembli ya, ol wanwan kongregesen bambae oli stat finis blong salem ol tikit blong pem kakae, long rod ya bambae yu gat tikit finis taem yu kasem ples blong asembli.
15 ?Yu save putum nem blong yu blong givhan blong klinim ples afta we program i finis long olgeta wanwan dei blong asembli ya? no ?Yu save mekem wan narafala wok long taem blong asembli ya? Olsem yumi mekem las yia, ol brata we oli lukaot long ol defren wok long asembli, bambae oli jusum sam brata no sista long kongregesen blong olgeta, no long narafala kongregesen tu, blong mekem sam wok. Oli mas givim lis blong olgeta long brata we i lukaot long ol Volontia, bifo long asembli. Sipos oli no putum nem blong yu long ol lis ya, be yu yu wantem givhan, plis luk ol brata we oli lukaot long ol Volontia long asembli ya. Ol pikinini we oli no kasem 16 yia yet, oli save wok wetem papa mama blong olgeta no wan narafala bigman. Be i tru se, yumi evriwan i save givhan blong mekem ples blong asembli i stap klin sipos yumi sakem doti long stret ples blong doti.
16 Yumi bin kasem gudfala advaes long saed blong wanem stael blong klos mo hea we i stret long taem blong ol asembli blong yumi. Eksampel: Ol pepa we oli stap insaed long Kingdom Wok Blong Yumi oli givim fulap advaes long saed ya, yumi save luk ol pija long ol buk blong Sosaeti, mo samting we i moa impoten se, yumi gat wanem we Jeova i talem long Baebol. (Rom 12:2; 1 Tim. 2:9, 10) Ol man oli save gud yumi mo oli save from wanem yumi kam tugeta long taon blong olgeta. Taswe, klos mo hea blong yumi i save givim witnes long olgeta. Bighaf blong ol man blong Jeova oli soem gudfala eksampel long saed ya. Be, wan wantaem yumi luk se tingting blong wol i kamaot long ol stael blong klos mo hea blong samfala we oli kam long ol asembli. Enikaen klos we i soem bodi, oli makemaot klia se wan man i no rili strong long saed blong spirit. Ol klos we oli stret, oli klingud, mo oli naes, hemia nao wanem we i mekem narafala i gat gudfala tingting long saed blong wan man. Taswe, hed blong famle i mas meksua se ol memba blong famle blong hem oli werem klos we i stret. Yumi mas tingbaot ol samting ya tu, taem yumi no stap long ples blong asembli. I gud blong werem ol baj blong yumi, bifo mo afta long program blong asembli, hemia wan moa rod blong soemaot se yumi stap long saed blong Jeova mo se ol man blong hem oli klin.—Skelem wetem Mak 8:38.
17 Tabu spirit i pusum Waes King Solomon blong talem se “krangke fasin i stap long hat blong wan boe” mo “boe we oli letem hem i mekem ol samting we hem nomo i wantem, bambae i mekem mama blong hem i sem.” (Prov. 22:15; 29:15, NW) Long taem we program blong asembli i stap gohed, ol pikinini blong sam Witnes oli bin mekem noes, ale ol brata sista oli no save lesin gud. Ol papa mama oli gat kaon blong pembak long Jeova from fasin we ol pikinini blong olgeta oli mekem. Taswe, blong meksua se pikinini i stap kwaet mo i lesingud long ol oda blong Jeova, oli mas sidaon wetem papa mama blong olgeta. Ol brata we oli lukaot long welkam, bambae oli mas talem long hemia we i mekem noes, blong i stap kwaet, mo wetem kaen fasin, bambae oli talem klia se hem i mas lesin gud long program.
18 From we i fri long eni man nomo blong kam long ol asembli blong yumi, i waes blong lukaot gud long ol smol pikinini blong yumi mo olting blong yumi. Ol pikinini blong yumi oli wan sas presen we Jeova i givim. Be yumi save se wol ya i karem fasin blong Setan we i rere oltaem blong stil no mekem trabol long narafala. Taswe, yufala i mas save oltaem se pikinini blong yufala i stap weples. Mo tu, yufala i no mas lego ol kamera, paos, mo narafala sas samting blong yufala i stap olbaot long ol jea, yufala i mas holem oli stap wetem yufala oltaem. Meksua se yu lokem trak blong yu, mo putum olting blong yu i stap long wan sefples, maet long bokis blong trak, no maet yu save kipim ol samting ya i stap wetem yu. Long rod ya bambae i no gat samting blong pulum ae blong man we maet i wantem stil.
19 Ol brata we oli wok blong faenem Ples blong Slip, oli rere blong givhan long yu. Sipos i gat problem i kamaot, plis yufala i mas talemaot long ol brata ya taem yufala i stap yet long asembli ya. Ol brata bambae oli glad blong halpem yu blong stretem bisnes ya blong yu save gohed blong harem gud long asembli ya.
20 I gud tumas blong luk se ol brata sista oli tekem sam not long taem blong asembli. Ol not we oli sot bambae oli halpem yu blong no letem tingting blong yu i flae olbaot, mo bambae oli givhan long yu blong rimemba ol bigfala poen. Taem yu lukluk bakegen long ol not ya wetem famle no ol fren blong yu, bambae yu gat jans blong tingting dip long ol bigfala toktok blong asembli ya mo bambae yu no fogetem olgeta.
21 Ol man blong Jeova oli rere oltaem blong givim presen blong sapotem tiokratik wok. (Eks. 36:5-7; 2 Kron. 31:10; Rom 15:26, 27) Ol presen mane we yufala i givim oli blong sapotem wok we i stap gohed long olgeta ples blong wol. Mo tu, mane ya i givhan blong pem ol samting we yumi nidim blong mekem ol asembli olsem hemia. Wetem mane ya yumi save pem ol samting blong fiksimap no klinim ol ples.
22 Olsem i stap long Amos 3:7, Jeova i talem se “sipos hem i wantem mekem wan samting, hem i stap soemaot ol plan blong hem fastaem.” Jeova i man blong “soemaot ol samting we i haed,” taswe plante handred profet tok we hem i putum i stap long Baebol, oli bin kamtru fulwan. (Dan. 2:28, 47) Sam long ol bigfala promes blong hem oli no kamtru yet. Distrik Asembli blong 1999, “Profet Tok We i Kamaot Long God,” bambae i mekem bilif blong yu i kam strong moa long ol promes blong God. Lesingud long tok we Jeova i mekem rere blong yu. Mekem samting we yu luk mo harem, i wok long minista wok blong yu, long kongregesen, mo long laef blong yu evri dei. !Mifala i prea se ol sas blesing blong Jeova bambae oli stap long olgeta plan we yufala i mekem blong kam long olgeta dei blong bigfala kakae ya long saed blong spirit!
[Tok blong pija long pej 3]
!Mekem plan blong stap ful dei Fraede, Sarede, mo Sande!