Distrik Asembli Blong 1996 “Ol Man Blong Talemaot Pis Blong God”
1 Distrik asembli long yia ya bambae i givhan long yumi blong holem pis blong God, mo bambae hem i eksplenem wok we yumi gat blong halpem ol narafala blong faenem pis ya. Stampa tok blong asembli ya, “Ol Man Blong Talemaot Pis Blong God.” Bambae i stap long Haos Kingdom long Port Vila, long Ogis 30 kasem Septemba 1, 1996. ?Yu yu mekem ol plan blong yu finis blong yu no save mestem wan haf blong asembli ya?
2 Asembli Blong Tri Dei: Mifala i save se bambae yu laekem tumas distrik asembli blong yia ya. Mo bambae yu gobak long ples blong yu wetem nyufala paoa blong wok strong bakegen. (2 Kron. 7:10) Long yia ya, asembli i blong tri dei bakegen. ?Yu yu askem finis blong tekem spel blong yu long wok, blong mekem se yu save stap long ful asembli?
3 Wajtaoa blong Febuwari 15, 1996, i talem olgeta ples mo taem blong ol distik asembli long Saot Pasifik. Long saed blong branj blong yumi, bambae i gat asembli ya long Franis long Nyukaledoni, long nyufala Haos Asembli long Nomondi, stat long Septemba 13 go kasem 15, 1996.
4 Long trifala dei ya, program bambae i stat long haf pas naen long moning, mo asembli bambae i finis long Sande aftenun, samwe long 4 klok. Evri moning, doa blong Haos Asembli bambae i open long 8 klok. Olgeta nomo we oli gat wok blong mekem, oli save kam insaed bifo long taem ya. Be oli no gat raet blong blokem ol jea, gogo doa i open blong ol narafala oli kam insaed tu. ?Bambae yumi soem kaen fasin long ol olfala mo sik brata blong yumi, mo livim sam gudfala jea i stap, blong oli save sidaon long ples we i isi long olgeta blong kam insaed mo goaot? Tingbaot se, “Man we i stap laekem ol man tumas . . . i no save tingbaot hem nomo.”—1 Kor. 13:4, 5; Fil. 2:4.
5 ?Bambae Yu Letem Narafala i Sapenem Yu?: Wajtaoa blong Ogis 15, 1993 i tokbaot Proveb 27:17 we i talem se: “Aean i save sapenem aean.” Nao biaen i talem se: “Yumi olsem ol tul we man i mas sapenem olgeta oltaem. Blong soemaot lav long Jeova mo mekem ol disisen we oli stanap long strong bilif, yumi mas stap defren long ol man blong wol. Taswe, oltaem yumi mas folem wan rod we i defren long bighaf blong ol man.” ?Olsem wanem yumi save folem advaes ya?
6 Yumi defren mo yumi mas stap defren long ol man blong wol. Yumi mas traehad oltaem blong mekem samting ya, sipos yumi wantem gohed strong blong mekem ol gudfala wok. (Taet. 2:14) Hemia nao from wanem haf ya blong Wajtaoa we yumi tokbaot antap i gohed olsem: “Taem yumi stap wetem ol narafala we oli laekem Jeova tumas, wan i sapenem narawan—yumi givgivhan long yumi blong kam strong moa long lav, mo blong mekem ol gudfala fasin.” Distrik asembli i wan samting we Jeova i mekemrere, blong halpem yumi blong stap sap long saed blong speret. Yumi no mas mestem wan haf blong hem.
7 Wan Man We i Waes Bambae i Lesin: Fasin blong lesin i wan samting we yumi mas lanem. Samfala oli talem se, yumi save rimemba stret haf nomo blong olgeta samting we yumi harem—nomata sipos yumi ting se yumi stap lesingud. Long taem blong yumi, i gat plante samting blong pulum tingting blong yumi. Taswe, samtaem i hadwok blong putum tingting blong yumi i stap strong long wan samting blong longtaem. ?Yumi save traem blong mekem taem ya we yumi stap lesingud i kam longfala moa, antap moa taem yumi stap sidaon wetem plante narafala man blong lesin long asembli? ?Yu ting se bambae yu save talem ol bigfala poen we oli kamaot long asembli long wan dei? ?Olsem wanem yumi evriwan i save kamgud moa long fasin blong lesin, mo putum tingting i stap strong long ol wanwan tok long asembli ya?
8 Yumi mas intres gud long ol samting we yumi harem, from we fasin blong rimemba we God i givim long yumi i no save wokgud sipos yumi no intres. Eksampel, sipos yumi intres bigwan long tok we brata i stap givim, i isi nomo blong rimemba ol bigfala poen long tok ya no long haf ya blong program. Be, samting ya i dipen bigwan long fasin blong yumi blong lesin strong moa long distrik asembli bitim we yumi lesin long ol narafala taem. Fasin blong yumi blong intres mo lesingud long evri haf blong asembli, i joen wetem helt blong yumi long saed blong speret naoia, mo wetem blesing we bambae yumi kasem long fyuja. Long ol distrik asembli, yumi kasem tijing long saed blong ol rod blong Jeova, mo ol advaes blong mekemgud wok ya we i save sevem laef blong narafala man. (1 Tim. 4:16) Traem tingbaot se yu yu olsem wan sip we i stap long bigsi taem wan bigfala win i blu. Ol promes blong Jeova oli givim hop we i olsem wan strong angka. Sipos wan man i no lesingud long ol tok we i kamaot long ol Kristin miting mo i letem tingting blong hem i stap long ol narafala samting, ?wanem i save hapen? Hem i save mestem ol impoten advaes mo tijing we oli save givhan long hem blong i no fas long wan rif long saed blong speret.—Hib. 2:1; 6:19.
9 Long plante ples long wol, ol brata blong yumi oli hadwok blong go long ol miting. Hem i nambawan tumas blong luk olsem wanem oli lesingud long ol asembli. Be, long sam ples, samfala oli blokem ol narafala blong oli no save lesingud, taem oli wokbaot olbaot long ples blong asembli. Sam narafala oli kam afta we asembli i stat. Long sam asembli we oli pas, i hadwok blong harem ol faswan tok blong asembli gogo sam menet i pas, from we plante oli stap wokbaot insaed long Haos Asembli kolosap long ol jea. Kolosap oltaem, hemia i no ol brata we oli stap wok, mo ol mama we oli stap lukaot long ol smol pikinini blong olgeta. Bighaf blong ol noes ya i kamaot from ol man we oli stap storeyan. Long yia ya, ol brata blong mekem welkam, bambae oli lukluk moa long problem ya, mo mifala i hop se olgeta evriwan bambae oli sidaon taem jeaman blong asembli i talem long olgeta blong mekem olsem. I gud tumas sipos yufala i obei long samting ya.
10 ?Wanem ol gudfala advaes we bambae i givhan long yumi blong lesin moa long ol tok blong asembli, mo blong rimemba moa ol poen we yumi harem? I gud blong talem bakegen samting we yumi bin harem long ol yia we oli pas: (a) Tingbaot bigfala risen from wanem yu kam long taon ya we asembli i stap long hem. I no blong pleplei mo spel, be blong lesin mo blong lanem plante samting. (Dut. 31:12) Traem blong slipgud evri naet. Sipos yu kam long asembli evri dei we yu taed tumas, bambae i hadwok blong lesingud. (b) Lego haos longtaem lelebet bifo we asembli i stat, blong yu gat inaf taem blong wokbaot i go, putumgud trak blong yu, mo sidaon, bifo we ol tok oli stat. Sipos yu hareap blong faenem wan jea long las menet nomo, sua se bambae yu mestem sam long ol fastok. (c) Raetemdaon ol bigfala poen nomo. Sipos yu raetemdaon tumas samting, yu no save lesingud. Taem yu stap raetem ol not, meksua se yu no mestem sam narafala poen from we yu tingbaot samting we yu stap raetem nomo. (d) Taem jeaman i talemaot stat blong wan narafala tok long asembli, yu mas gat tingting we yu wantem tumas blong harem tok ya. Tingbaot se: ‘?Mi save lanem wanem poen long tok ya, we bambae i givhan long mi blong gat moa tangkyu mo lav long Jeova? ?Olsem wanem tok ya i save givhan long mi blong soemaot moa ol fasin blong nyufala laef ya? ?Olsem wanem tok ya bambae i givhan long mi blong kamgud moa long wok blong prij?’
11 Fasin We i Leftemap Tok Blong God Long Fes Blong Ol Man: Pol i leftemap tingting blong Taetas blong ‘soemaot long fes blong ol man fasin blong hem blong mekem gudfala wok.’ Sipos Taetas i tijim tok we i tru oltaem, bambae hem i givhan long ol narafala tu blong oli “leftemap tok blong God ya we i sevem yumi, long fes blong ol man.” (Taet. 2:7, 10) Evri yia, yumi kasem ol tok blong soem long yumi long kaen fasin, from wanem i impoten blong mekem ol gudfala fasin we God i laekem. Yumi mas tingbaot ol tok ya taem yumi stap mekem trep blong go mo kambak long ples blong asembli, taem yumi stap long haos blong ol brata blong yumi long Port Vila, mo taem yumi stap long Haos Asembli tu.
12 Las yia, mifala i bin harem sam gudfala tok long ol fasin blong yufala. Be, i gat nid blong kamgud moa long sam samting. I gat sam brata we long kaen fasin, oli agri blong givim ples blong slip long samfala we oli kam long ol aelan. Sam long ol brata ya, oli bin spenem mane blong olgeta blong mekemrere wan gudfala ples blong slip. Be olgeta we oli mas kam, oli jenisim plan blong olgeta we oli no talemaot nating, from we oli wantem stap wetem sam famle blong olgeta, no from we oli no moa kam long asembli. Yumi save se ol famle we oli mekemrere blong welkamem olgeta oli mas harem nogud. Lav we yumi gat long ol brata blong yumi i mas blokem fasin ya we yumi mekem ol brata blong yumi oli harem nogud olsem.—1 Kor. 13:5.
13 From samting ya, mifala i askem olgeta we oli bin fulumap wan pepa blong kasem wan ples blong slip, sipos oli save karem ples we ol brata oli givim long olgeta. Sipos wan trabol i kamaot we i mekem se yu no save karem ples ya, plis talemaot kwiktaem long famle we yu mas stap wetem olgeta, mo long Ofis Blong Faenem Ol Ples Blong Slip. Olsem nao, oli save mekem wan narafala plan. Asembli ya bambae i wan nambawan jans blong faenem sam nyufala fren, sipos yu karem ples blong slip we ol brata oli givim long yu.
14 Yumi mas trenem ol pikinini blong yumi blong kasem save se, oli mas soemaot ol Kristin fasin oltaem, i no sam samtaem nomo. Ol gudfala fasin ya oli no finis taem yumi aot long ples blong asembli. Oli mas gohed 24 haoa evri dei. Ol fasin we yumi mekem long haos, wetem olgeta we oli slip long haos blong yumi, mo taem yumi wokbaot long rod, oli mas gud, sem mak olsem fasin we yumi mekem taem yumi sidaon wetem ol brata blong yumi blong lesin long asembli, mo blong letem Jeova i tijim yumi.—Aes. 54:13; 1 Pita 2:12.
15 I nidim mane blong mekemrere wan Distrik Asembli. Ol brata oli pem ol samting wetem ol presen mane nomo. Wan sista we ol pikinini blong hem oli bigwan lelebet, i no gat plante mane taem hem i kam long asembli. Be nating, hem mo ol pikinini blong hem oli givim smol presen mane. Samting we wanwan man i givim, hem i bisnes blong hem nomo. Be mifala i save se yufala i glad long ol tok ya we i pulum tingting blong yufala bakegen.—Wok 20:35; 2 Kor. 9:7.
16 Oli Luksave Yumi From Klos Blong Yumi: Klos blong yumi oli soemaot plante samting long saed blong yumi, mo long saed blong ol filing blong yumi long ol narafala. Bighaf blong ol yangfala mo plante bigman oli stap wok mo skul wetem ol man we oli folem ol krangke fasin blong wol long saed blong klos, mo oli putum ol klos olbaot nomo. Evri yia, ol stael blong klos oli bitim mak moa, mo sam oli krangke olgeta. Sipos yumi no lukaotgud, bambae i isi nomo blong letem ol man blong wol oli pulum yumi blong putum klos we oli sem mak olsem olgeta. Plante stael blong klos, i no stret blong werem olgeta long ol miting we yumi mekem blong wosip long God. Wan leta we mifala i kasem afta long asembli las yia, i talem tangkyu from ol advaes blong asembli, be i ademap se: “Mi bin tingbaot from wanem i gat plante yangfala gel we oli werem ol sot dres, ol top we oli soemaot bodi blong olgeta, mo ol dres we oli open long saed i go antap tumas.” Yumi evriwan i mas wantem blong werem ol klos we oli stret long ol Kristin minista, taem yumi stap long asembli, mo taem yumi joen wetem ol brata mo sista afta we asembli i finis. Oltaem, yumi mas tingbaot advaes we aposol Pol i givim long ol Kristin, blong ‘putum klos we i stret nomo, i no blong pulum ae blong man, mo i no blong flas.’—1 Tim. 2:9.
17 ?Hu i save talem wanem klos nao we oli “stret nomo” mo oli no blong pulum ae blong man? No pulum ae blong man i minim se yumi “no mekem flas mo yumi no bitim mak.” Diksonari i talem mining ya se “no soem yumi long fored blong ol narafala.” Sosaeti mo ol elda oli no mas putum ol rul long saed blong klos mo hea. Be, ?yu ting se wan Kristin i mas naf blong luksave wanem klos oli bitim mak mo oli no stret? (Skelem wetem Filipae 1:10.) Hea mo klos blong yumi oli no mas pulum ae blong ol man. Oli mas naes mo mekem narafala i haremgud. Oli no mas olsem ol stael blong wol we oli save spolem tingting blong ol narafala. From we yumi ol minista blong gud nyus, sipos klos mo hea blong yumi oli stret long taem blong distrik asembli, oli karem ona long Jeova mo givim gudnem long ogenaesesen blong Hem. Taswe, ol papa mama bambae oli givim eksampel, mo bambae oli meksua se ol pikinini blong olgeta oli putum klos we oli stret blong go long asembli. Ol elda oli mas givim gudfala eksampel long saed ya, mo rere blong givim advaes long kaen fasin sipos i gat nid.
18 Ol Kamera, Video Kamera, mo Kaset Rikoda: I oraet nomo blong yusum kamera mo ol narafala mesin blong rikodem asembli, sipos yumi tingbaot ol narafala we oli stap lesin. Sipos yumi wokbaot blong tekem foto taem ol tok blong asembli oli stap gohed, bambae yumi blokem ol narafala blong oli no lesin, mo tu, bambae yumi mestem sam haf blong ol tok ya. Kolosap oltaem, yumi kasem moa poen long asembli sipos yumi lesingud long ol tok mo raetem ol smosmol not. Maet yumi stap rikodem asembli blong wan brata no sista we i sik mo i no save kam long asembli. Be sipos yumi stap rikodem blong yumi nomo, taem yumi gobak long ples blong yumi, maet yumi faenem se yumi no gat taem blong lesin long plante tok we yumi bin tekem plante haoa blong rikodem olgeta. Yumi no mas joenem enikaen rikoda long lektrik no saon blong asembli, mo yumi no mas blokem ol ples blong wokbaot, no blokem narafala blong i no save luklukgud platfom.
19 Ol Jea: Mifala i luk se bisnes ya long saed blong blokem ol jea i kamgud moa. Las yia, bighaf blong yufala i bin obei long advaes ya: YUFALA I SAVE BLOKEM JEA BLONG OL FAMLE BLONG YUFALA NOMO, MO BLONG OLGETA WE OLI KAM LONG TRAK WETEM YUFALA. Ating yu luksave se i moa isi las yia, from we plante oli bin folem ol klia advaes ya. Samting we i moa impoten se, fasin obei blong yu i bin mekem Jeova i glad, mo ‘slef we i stret’ we i stap givimaot kakae long saed blong speret, i glad tu.—Mat. 24:45.
20 Plante moa brata blong yumi we oli kam long asembli, oli gat ol spesel nid long saed blong helt. Sam long olgeta oli mas yusum ol wiljea blong wokbaot, mo oli nidim we sam memba blong famle blong olgeta oli lukaot long olgeta. Sam narafala oli tekem ol defren kaen meresin from wan sik we oli gat, olsem trabol long saed blong hat no sik blong faol. Taem yumi luk we ol gudfala brata mo sista ya oli kam long ol asembli from strong tingting blong no mestem wan kakae long saed blong speret, samting ya i mekem hat blong yumi i glad tumas. Be, wok blong lukaot long ol sikman olsem, i stap fastaem long ol memba blong famle blong olgeta. Dokta we i stap long asembli i no blong lukaot long ol man we oli stap sik oltaem. Sipos wan memba blong famle blong yu i nidim spesel kea, plis meksua se yu no livim hem i stap hem wan, we wan trabol i save kamaot. Mo tu, bambae i no gat wan spesel rum long ples blong asembli, blong ol sikman we oli no mas stap kolosap long ol narafala man. Ol elda oli mas savegud ol spesel nid blong ol sikman long kongregesen blong olgeta, mo bifo long asembli, oli mas meksua se i gat wan plan i stap blong lukaot long olgeta.
21 Kakae Long Asembli: Olsem evri yia, bambae i gat kakae long asembli, mo yufala i save karem ol tikit blong pem kakae tru long kongregesen mo long asembli. Long ol yia we oli jes pas, Sosaeti i traehad blong mekem bisnes ya long saed blong kakae i moa isi. Olsem nao, olgeta we oli wok long saed ya, oli no mestem sam gudfala toktok blong asembli. Long yia ya bakegen, mifala i glad sipos ol man blong wok ya oli save lesin long ful asembli. Wan sista i raetem leta i kam se: “Eksampel blong yufala ol gudfala brata, i leftemap tingting blong mifala ol wanwan Kristin, blong skelemgud laef blong mifala. Olsem nao, mifala i save lukaot ol rod blong mekem laef blong mifala i moa klia, mo blong mekem moa long ol tiokratik wok.”
22 I no longtaem, faswan long ol Distrik Asembli “Ol Man Blong Talemaot Pis Blong God,” bambae i stat. ?Yu yu mekem ol plan finis blong kam long asembli ya, mo yu yu rere naoia blong haremgud long fasin joen mo ol gudfala samting long saed blong speret blong tri dei? Mifala i prea wetem fulhat blong mifala blong askem Jeova blong blesem ol traehad blong yufala blong stap long asembli ya.
[Bokis]
Ol Samting Blong Tingbaot Long Saed Blong Distrik Asembli
Baptaes: Olgeta we bambae oli tekem baptaes, oli mas sidaon long ol jea we oli makemaot blong olgeta, bifo we asembli i stat long Sarede moning. Samfala oli bin werem sam klos blong swim we oli no stret mo oli no soem respek long impoten taem ya. Olgeta we oli wantem tekem baptaes oli mas karem wan taoel mo klos blong swim we oli stret. Ol elda long kongregesen we oli tokbaot ol kwestin long buk ya Minista Wok Blong Yumi wetem olgeta we oli wantem tekem baptaes, oli mas meksua se olgeta evriwan oli kasem save long ol poen ya. Afta we brata i givim tok blong baptaes mo i mekem prea, jeaman blong program bambae i talem sam sot mesej long olgeta we oli rere blong baptaes, mo biaen i gat wan singsing. Long en blong laswan vas blong singsing, ol man blong welkam bambae oli lidim olgeta we oli tekem baptaes oli go long ples blong baptaes. Baptaes we i soemaot se wan man i givim laef blong hem i go long Jeova, i wan spesel samting bitwin long hem mo Jeova nomo, taswe i no gat wan rod blong tu man no wan grup blong man oli save baptaes wantaem, we oli holholem han no oli holholem olgeta blong tekem baptaes.
Ol Baj: Plis werem baj blong 1996 long asembli, mo taem yu wokbaot blong go mo kambak long asembli. Plante taem, samting ya i mekem se yumi save givim wan gudfala wetnes taem yumi stap wokbaot nomo. Ol baj mo plastik blong olgeta, yu save karem tru long kongregesen. Yu no mas wet kasem sam dei nomo bifo long asembli blong askem ol baj we yu mo famle blong yu i nidim. Mo tu, yu no mas fogetem blong karem Kad blong Blad wetem yu.
Ol Rum: SIPOS YU GAT WAN PROBLEM, plis talem kwiktaem long brata we i lukaot long Ofis Blong Faenem Ples Blong Slip long asembli, nao hem i save givhan long yu blong stretem problem ya kwiktaem. Sekretari blong ol kongregesen oli mas sanem kwiktaem long ples blong asembli, ol pepa blong askem ples blong slip. Sipos yu no moa wantem wan ples blong slip we yu bin askem tru long Ofis Blong Faenem Ples Blong Slip, yu mas talem kwiktaem long hemia we yu mas slip long haos blong hem mo long Ofis Blong Faenem Ples Blong Slip, nao oli save givim rum ya long wan narafala.
Ol Volontia: ?Yu yu save yusum sam taem long asembli blong givhan blong mekem sam wok? Taem yumi wok blong ol brata blong yumi, nating se i blong sam haoa nomo, yumi save givhan bigwan mo i mekem yumi haremgud. Sipos yu save givhan, plis go luk Ofis Blong Ol Volontia long asembli. Ol pikinini we oli no gat 16 yia yet, oli save givhan tu, taem oli wok wetem papa no mama blong olgeta no wetem wan narafala bigman.
Ol Tok Blong Givim Woning: Tingting fastaem long ol problem we oli save kamaot, nao bambae yu save blokem plante trabol. Plante taem, ol stilman mo ol narafala man nogud oli laekem blong mekem wok blong olgeta long medel blong ol man we oli kam long narafala ples. Meksua se yu lokem trak blong yu oltaem, mo no livim wan samting i stap insaed we ol stilman oli save luk, mo we i save pulum olgeta blong wantem stilim. Mo tu, i no waes blong livim ol sas samting oli stap long jea we yu sidaon long hem long asembli. Yu no save sua se olgeta evriwan raonabaot long yu oli Kristin.