Distrik Asembli Blong 1994—“Fraetgud Long God”
1 Stat long taem blong Ebel mo Noa kasem taem blong yumi, ol man blong bilif oli bin ‘fraetgud long God.’ (Hib. 11:4, 7) Blong fraetgud long God i minim se yumi “respektem mo givim bigfala ona long Man we i Wokem yumi, mo yumi fraet blong mekem wan samting we i save mekem Hem i harem nogud.” (ad p. 343. Franis) Blong soemaot dip fasin ona ya, long Septemba bambae yumi go long Distrik Asembli “Fraetgud Long God.” ?Bambae yu yu stap long ful asembli ya, stat long faswan singsing go kasem laswan prea?
2 Evri yia, yumi stap wet long distrik asembli wetem tingting we i glad. Maet i nidim mane mo fasin traehad blong yumi save stap long taem ya, be bambae yumi kasem plante blesing from. Bambae yumi save gobak long ples blong yumi we yumi glad, haremgud mo yumi kasem plante samting long saed blong speret. (Ridim 1 King 8:66.) Kampani blong ol brata i givim paoa long yumi mo asembli i mekem se yumi spel long program we yumi stap folem evri dei. Be yumi no mas fogetem se yumi kam joen wanples blong wosip long Jeova. Hem nao i givim oda long yumi blong mekem samting ya. Hem i stap lanem yumi long ol samting we oli save givhan long yumi.—Dut. 31:12, 13; Sam 122:1.
3 Wan Asembli Blong Tri Dei: Long yia ya, bambae i gat asembli long Port Vila long Septemba 2 kasem 4.
4 Bambae asembli i stat long 10:20 long moning long Fraede mo finis samples long 4:15 long aftenun long Sande. Sarede mo Sande, bambae asembli i stat long 9:30 long moning. Ol doa bambae oli open long 7:30 long moning. Olgeta nomo we oli gat wan spesel wok oli gat raet blong go insaed bifo long taem ya.
5 Dip Fasin Ona Long Jeova i Pusum Yumi Blong Stap Long Asembli Ya: Pol i givim advaes long ol Hibru Kristin blong ‘stap mekem wosip long God long fasin we Hem i glad long hem, we oli ona long Hem, mo oli fraet long Hem.’ (Hib. 12:28) Ol haf blong distrik asembli long yia ya i blong givhan long yumi blong mekem samting ya. Ating bambae yumi fesem sam trabol we bambae oli traem strong tingting we yumi gat blong stap long taem ya. Oli save kam olsem ol bigfala hil, be, wetem help blong Jeova, bambae yumi save win. (Mat. 17:20) Sipos yufala i no save tekem sam spel blong stap long ful asembli, stat Fraede moning kasem Sande aftenun, ?yufala i bin traem blong askem spel blong tri dei ya nomo long bos blong yufala, afta we yufala i prea long Jeova from?—Jem. 1:6-8.
6 Kasem Frut From Samting We Yumi Givim: ?Wanem samting ya we yumi givim? Taem mo fasin traehad blong yumi blong stap long asembli ya. Sipos yumi reregud blong stap long distrik asembli be afta yumi gobak long haos blong yumi long Sande aftenun we yumi mestem wan bighaf blong ol program, samting ya i no waes. Bambae i no stret sipos yumi goaot long wan bigfala lafet we yumi stap kakae long hem blong go mekem sam narafala samting. Sipos yumi bigman long speret mo yumi gat fasin fraetgud long God, bambae yumi no save mestem wan samting we Jeova i mekemrere blong yumi.—Skelem wetem 1 Korin 2:9, 10.
7 Ating bighaf blong yumi i no save gat tingting blong lego asembli bifo en blong program. Nating se i olsem, yumi save mestem wan bighaf blong program. ?Olsem wanem? Taem yumi no mekemgud plan blong yumi fastaem blong mekem sua se yumi kasem fulwan ol gudfala samting long asembli ya. Yumi save girap eli blong dring ti mo mekem sam wok long haos we i nidim blong mekem, nao yumi save stap sidaon long jea blong yumi bifo asembli i stat. I impoten tu blong slipgud long naet blong bambae yumi wekapgud mo lesingud long fuldei.
8 Wan gudfala rod blong mekem se asembli ya i givhan long yumi fulwan, i blong raetem sam not long ol bigfala poen. I impoten long ol yangfala, olsem we i impoten long ol bigman blong mekem olsem. Wan pablisa we i gat 16 yia blong hem i talem se: “Mi stap raetem ol vas blong Baebol we oli talem long tok. Ale, mi lukluk bakegen long haos blong mi.” Wan narafala yangfala we i gat 16 yia blong hem tu i talem se: “Mi mi stap raetem ol bigfala poen. Samting ya i mekem se mi stap folemgud tok we i stap kamaot.” Yes, taem yumi go long asembli, yumi nidim nomo blong karem Baebol blong yumi, sing buk, wan buk blong raetem ol not we i bigwan naf mo wan pensel no stilo. I tru, ol papa mama we oli gat ol smol pikinini oli mas karem ol samting we ol pikinini oli nidim, be i gud blong no karem bigfala eski no ol samting blong olgeta wanwan we oli save mekem hadwok long olgeta mo long ol narafala.
9 Sam brata oli stap rikodem program blong asembli wetem wan teprikoda no video kamera blong bambae oli save luk no harem bakegen long haos blong olgeta biaen. Hemia bisnes blong olgeta wanwan, be ekspiryens blong samfala i soem se taem oli gobak long wok we oli stap mekem oltaem, i no gat taem blong lesin no lukluk bakegen long samting we oli bin rikodem. Mo tu, yumi save mestem sam bigfala poen blong wan tok, from yumi stap mekem wan samting long mesin we yumi yusum blong rikodem.
10 Yumi mas rili traehad blong stap sidaon bifo program i stat. Nating sipos yumi stap storeyan long ol gudfala ekspiryens wetem ol olfala fren blong yumi, be taem jeaman i talemaot se bambae program i stat, yumi soem respek long olgeta we oli gat haf long program mo ol narafala brata tu sipos yumi stop blong storeyan mo go kwik long ples blong yumi blong sidaon.
11 Oltaem ol distrik asembli oli taem blong glad from Jeova i blesem olgeta bigwan. Yumi stap kasem gudfala blesing long saed blong speret mo bodi.
12 ?Bambae Gudfala Fasin Blong Yu i Pulum Ol Man Blong Tinghae Long Yumi? Evri yia, Kingdom Wok Blong Yumi i mekem yumi tingbaot se i impoten blong gat gud fasin taem yumi stap long distrik asembli. I tru oltaem, fasin blong yumi i mas gud, be taem yumi plante we i stap joen wanples, ol man we oli no stap long trutok oli stap lukluk moa long yumi. Maet bambae oli save jajem yumi moa from gud no nogud fasin blong yumi, bitim wok blong prij blong yumi. Yumi mas wantem se ol toktok blong yumi mo fasin blong yumi oli presem Jeova. —Prov. 27:2; 1 Pita 2:12.
13 Afta distrik asembli “Tijing Blong God” las yia, wan naet gad blong wan hotel i talem se: “Longtaem mi no mekem gad long wan hif blong ol yangfala we oli naes olsem ol yangfala ya.” Mo afta we hem i talem sam samting long saed blong ol nogud fasin blong ol narafala grup blong yangfala mo fasin blong olgeta blong spolem ol samting, hem i ademap long saed blong ol pikinini blong ol Wetnes se: “Oli gat gudfala fasin mo i gud tumas blong stap wetem olgeta. Sipos ol narafala man we oli stap joen wanples olsem oli olsem yufala, bambae i gud.”
14 Wan man blong raetem store long nyuspepa i talem samting ya long saed blong asembli se: “Ol woman mo ol yangfala gel oli werem ol naesfala dres, mo ol man mo ol yangfala boe oli werem naes klos mo oli putum nektae. Oli glad blong raetem ol not taem oli stap lesin long ol man we oli givim tok long ol fo dei ya. Sipos fasin klin i kolosap long fasin blong obei long God, be, ol Wetnes blong Jeova oli kasem wan nyufala mak long saed ya.” Be i no ol ripot blong olgeta we oli gud.
15 Samtaem ol pikinini oli stap pleplei long ples blong asembli. Hemia from plante taem ol bigman oli no lukaotgud long olgeta.
16 Ripot i bin soem se plante man oli stap wokbaot taem asembli i stap gohed. Oli kaontem plante man (speseli ol pikinini) long ol rod i go long toelet, taem program i stap gohed long Sarede aftenun. Samting ya i soem se i nidim we ol papa mama oli mas givim moa trening mo lukaotgud moa long ol pikinini blong olgeta. Taem yumi stap wokbaot oltaem long ol rod i go long toelet mo long ol narafala ples, yumi stap mekem plante noes, mo samting ya i stap pulum tingting blong ol man we oli stap traem blong lesin. Samfala oli gat sam spesel wok blong mekem taem program i stap gohed, be ol narafala oli mas stap long jea blong olgeta mo lesingud.
17 Bighaf blong ol papa mama oli stap trenem ol pikinini blong olgeta blong gat gudfala fasin long ol miting blong kongregesen evri wik. I gud sipos oli mekem sem mak long taem blong asembli, ale oli save mekem sua se ol pikinini blong olgeta oli stap sidaon kolosap long olgeta mo oli no stap wokbaot olbaot taem program i stap gohed. I tru, haos blong asembli i kam olsem wan bigfala Haos Kingdom, be yumi stap yet long wol blong Setan, mo i isi nomo blong ol man we fasin blong olgeta i no stret blong kam insaed wetem ol rong tingting. OLTAEM YUFALA I MAS SAVEGUD SE OL PIKININI BLONG YUFALA OLI STAP WEA MO OLI STAP MEKEM WANEM.
18 Klos Mo Hea: Yumi stap laef long wan taem we ol man oli akseptem nomo ol klos we oli soemaot bodi mo oli olbaot nomo. Poen we i stap long paragraf 14 i soem se samfala oli tinghae yet long ol man we oli stap werem ol klos we i givim ona, antap moa long taem blong wosip. Klos mo hea we i olbaot i givim wan mesej long saed blong yumi. Yumi no mas fogetem se ples blong asembli i no moa wan stad blong plei spot, be i kam wan Haos Kingdom. Samfala oli werem ol klos we oli soem respek long taem blong asembli, be afta long ol program oli werem sam klos we oli no soem respek mo oli no stret.
19 Olgeta we bambae oli tekem baptaes oli mas tingbaot se, long taem ya, i no stret blong werem sam stael blong klos blong swim. Oli mas werem klos we i no soemaot bodi mo i stret. ?Hu i mas lukaot long bisnes ya? Ol elda oli gat responsabiliti blong lukaot se wanwan memba blong kongregesen we i wantem baptaes i no mas mekem ol narafala oli foldaon. (2 Kor. 6:3, 4) Klos blong swim we i soem bodi mo sigglet we i gat ol raeting blong wol long hem, no ol pablisiti long hem, yumi no mas werem. I gud se ol elda oli tokbaot bisnes ya wetem olgeta we oli wantem tekem baptaes, taem oli stap mekem kwestin wetem olgeta we oli stap long buk ya Ol Rul Blong Mekem Minista Wok Blong Yumi.
20 Ol Rum: I gud blong yumi gat longfala tingting mo fasin blong tingbaot filing blong narafala taem yumi stap long haos blong ol brata mo sista. Yumi mas soemaot frut blong speret oltaem. Yumi mas wok wanples wetem famle we i askem yumi blong stap wetem olgeta, mo no yusum jans ya blong askem plante samting. Tekem sam menet blong luklukbak long atikol ya long saed blong gudfala fasin blong tekem ol man oli kam long haos, we i stap long Wajtaoa, Septemba 15, 1975 long pej 551, (Franis).
21 Ol Mesin Blong Rikodem: Olsem mifala i talem finis antap, ol mesin blong rikodem antap moa video kamera, i bisnes blong wanwan man. Sipos yu mekem disisen blong rikodem samting, plis tingbaot olgeta we oli stap raon long yu. Yumi save spolem ol narafala tu nating se yumi save rikodem nomo taem yumi stap long jea we yumi stap sidaon long hem. Yumi no mas blokem ol narafala blong oli no save lukluk taem yumi stap tekem foto. Mo tu, i no mas gat wan mesin blong rikodem we oli joenem long lektrik we oli yusum long taem blong asembli, mo oli no mas blokem ol ples blong wokbaot.
22 Ol Jea: I gud blong tingbaot oltaem problem we i save kamaot taem yumi blokem plante tumas jea. Wan taem bakegen, mifala i wantem mekem yufala evriwan i tingbaot samting ya se: YUMI SAVE BLOKEM JEA BLONG OL STRET FAMLE BLONG YUMI NOMO MO OLGETA WE OLI KAM LONG SEM TRAK WETEM YUMI. Samtaem i bin kamaot we “plante oli stap blokem tumas jea be long taem blong asembli i no gat man i sidaon long olgeta.” Fasin olsem blong no tingbaot narafala i stap gohed yet, nating se yumi kasem advaes ya plante taem finis. Yumi mas skelem hat blong yumi wanwan long bisnes ya mo tingting dip long rul we i stap long Filipae 2:3, 4.
23 Long ol wanwan asembli, oli mekem ol plan blong givhan long olgeta we oli gat spesel nid, olsem ol olfala mo ol handikap. I gud se yufala i no sidaon long ol jea we oli mekemrere blong olgeta sipos yufala i no gat problem long bodi. Yufala i mas rere tu blong givhan long olgeta blong faenem wan jea, sipos i no gat man i stap wetem olgeta blong halpem olgeta.
24 Ol Buk mo Kakae: Long distrik asembli, yumi gat plante kakae long saed blong bodi mo speret. Yumi mas kasem wetem fasin tangkyu, we yumi no westem wan samting.—2 Kron. 31:10; Prov. 3:10; Jon 6:12.
25 Bambae distrik asembli “Fraetgud Long God” i stap long Septemba 2-4, 1994. ?Yufala i mekem plan finis, mo yufala i rere naoia blong haremgud long ol trifala dei ya we bambae yumi glad blong stap kampani wetem ol brata sista mo kasem ol gudfala samting long saed blong speret? Mifala i prea wetem fulhat se Jeova bambae i blesem fasin traehad blong yufala, blong stap long distrik asembli ya “Fraetgud Long God” long yia ya mo blong rere blong kasem ol gudfala samting long tebel blong Jeova.
[Bokis]
Distrik Asembli—Ol Samting Blong Tingbaot
Baptaes: Olgeta we bambae oli baptaes oli mas sidaon fored bifo program blong Sarede moning i stat. Oli makem se samfala oli bin werem klos we i no soem respek mo we i daonem impoten mining blong baptaes. Olgeta wanwan we oli tekem baptaes oli mas karem wan klos blong swim we i stret mo wan taoel. Afta we brata we i givim tok blong baptaes i finis mo mekem prea, jeaman blong program bambae i givim smol advaes long olgeta we bambae oli tekem baptaes, afta oli save singsing long wan sing. Afta laswan laen blong sing i finis, ol man blong welkam bambae oli lidim olgeta we bambae oli baptaes oli go long ples blong baptaes. Baptaes we i blong soemaot se man i givim laef blong hem long Jeova i wan bisnes we i stap bitwin man ya mo Jeova nomo, taswe i no gat wan rod we ol man oli save baptaes olsem grup blong tu memba no moa we oli stap holholem han blong olgeta taem oli draon long wora.
Ol Baj: I gud yufala i werem baj blong 1994 asembli taem yufala i stap long asembli mo taem yufala i go mo kambak long ples blong asembli, plante taem samting ya i save openem rod blong yumi givim gud wetnes long samfala. Yufala i save kasem ol baj tru long kongregesen blong yufala, from bambae i no gat long taem blong asembli. Yufala i no fogetem blong karem “Kad Blong Blad” blong yufala tu. Ol memba blong famle blong Betel mo ol paenia oli mas karem Aedentiti kad blong olgeta tu wetem olgeta.
Ples Blong Slip: Bakegen, mifala i askem yufala evriwan blong wok wanples wetem ol brata we oli lukaot long ples blong slip. SIPOS YUFALA I GAT TRABOL, i gud yufala i talemaot kwiktaem long brata we i lukaot long ples blong slip long taem blong asembli, blong hem i save givhan long yufala blong stretem problem ya kwiktaem. Ol sekretari blong ol kongregesen oli mas sanem kwik ol fom we ol brata sista oli fulumap blong askem ples blong slip, long stret adres blong asembli. Sipos yu no moa nidim ples blong slip we yu askem finis, talem kwiktaem long brata we i lukaot long ples blong slip blong bambae oli save givim rum ya long wan narafala.
Ol Jea Blong Pusum Pikinini: I tabu blong yusum ol jea blong pusum pikinini taem yumi joen plante wanples olsem. Ol rul long saed blong faea i talem se i nogud blong letem olgeta i stap long ples blong wokbaot, no long medel blong ol jea. From we plante man oli save fasfas, ol jea blong pusum pikinini oli kam wan denja, i no long pikinini nomo, be long olgeta we oli save fas long hem tu. Yufala i mas lukaot blong no karem i kam long ples blong asembli. Be, ol jea blong ol pikinini no ol jea blong putum biaen long trak i no tabu, from ol papa mama oli save fasem long wan jea kolosap long olgeta. Mifala i glad tumas sipos yufala i folem advaes blong mifala long saed ya.
Ol Volontia: Yufala i save givhan long taem blong asembli. Taem yumi mekem samting blong givhan long ol brata blong yumi, nating se blong smoltaem nomo, yumi mekem i gud long olgeta, mo yumi tu, yumi haremgud from. Sipos yufala i wantem givhan, yufala i save go long ples blong volontia long asembli. Ol pikinini we oli no kasem 16 yia yet, oli save mekem wan gudfala wok tu taem oli wok wetem papa no mama blong olgeta, no wetem wan bigman we i save lukaot long olgeta.
Lukaot: Sipos yumi wekapgud long ol problem we oli save kamaot, bambae yumi save ronwe long plante trabol we i no nidim blong kamaot. Plante taem, ol stilman no ol narafala man we oli no gat stret fasin, oli save mekem rabis fasin blong olgeta long medel blong ol man we oli no savegud olgeta no oli stap longwe long ples blong olgeta. Yufala i mas lukaotgud oltaem blong lokem ol doa blong trak blong yufala mo neva livim wan samting insaed we i save pulum ae blong stilman. Ol stilman oli save stil plante, taem i gat bigfala hif blong man oli stap joen wanples. I no waes blong livim wan sas samting i stap long jea blong yufala. Yufala i mas save se i no evriwan we oli stap raon long yufala oli Kristin. LUKAOTGUD OLTAEM LONG OL PIKININI BLONG YUFALA.