Yumi Mekem Plan Naoia Blong Stap Long Distrik Asembli Blong 1991 “Ol Man We Oli Laekem Fasin Fri”
1 Tede plante samting oli stap kamaot long wol. From samting ya, long plante kantri ol man oli wantem tumas kam moa fri. ?Be long weples man i save faenem tru fasin fri? Jisas i talem se: “Sipos yufala i obei long ol tok ya blong mi, hemia, yufala i prapa man blong mi. Nao bambae yufala i save ol trutok, mo trutok ya bambae i mekem yufala i friman.” (Jon 8:31, 32) Nating se ol man oli brekemdaon paoa blong wan haeman blong politik no wan gavman blong kam moa fri, be oli no save kam fri olgeta. No gat. Jisas i tokbaot fasin fri we i kasem stampa blong ol trabol blong man. Tru ya, Jisas i wantem talem se ol man we oli slef long sin, bambae oli save kam fri long hem. (Lukluk Jon 8:24, 34-36.) Olsem nao, taem man i kam wan tru disaepol blong Jisas Kraes, laef blong hem i jenis olgeta, hem i kam friman.
2 TU DEI ASEMBLI: Long Vanuatu, distrik asembli blong 1991 “Ol Man We Oli Laekem Fasin Fri” bambae i stap long namba 7 mo 8 blong Desemba, long Haos-Kingdom blong Port-Vila. Bambae ol brata oli mekem ol impoten tok we Sosaete i jusum gud blong givhan long yumi long saed blong speret. Bambae defren kaen tok i givhan long yumi blong save olsem wanem yumi save kasem fasin fri we Rom 8:21 i tokbaot. Bambae ol brata oli mekem ol tok, ol pleplei, mo wan drama, blong talem sam tingting we oli save givhan long yumi.
3 Tingting blong yumi i mas strong blong no mestem wan tok. Ating yumi mas lego sam samting we yumi laekem mo jenisim plan we yumi stap folem evri dei blong save stap long asembli ya. Sipos yumi wok blong wan masta, yumi mas askem long hem blong stap long asembli ya. Plante brata oli lusum mane from we oli no go wok long taem ya, be oli no mestem wan tok long asembli. Sipos yumi tokbaot samting ya long prea blong yumi mo yumi traehad blong stap long asembli ya, Jeova bambae i blesem yumi.—Luk 13:24.
4 KAM ELI: Ol man oli save se fasin blong ol Wetnes blong Jeova i stret, mo oli no let. (Luk 16:10) Taem bambae yumi go long distrik asembli ya, i impoten we yumi gat ol fasin ya. Yumi mas kam eli evri dei mo yumi mas sidaon bifo faswan tok i stat.
5 Taem yumi stap long distrik asembli, yumi gat jans blong joen wetem sam gudfala fren. Yumi harem gud from. Be sipos yumi storeyan wetem sam brata sista kasem let long naet, bambae yumi no save girap long moning long stret taem. Tru ya, i nogud blong girap let long moning mo hareap blong go long asembli. Blong no kasem trabol ya, i gud blong putum wan taem we i stret mo kambak long haos long taem ya. Sipos yumi folem plan ya, yumi save spel gud long naet nao yumi rere long moning blong go long asembli. Olsem nao, bambae yumi no let long faswan tok mo yumi no spolem olgeta we oli stap lesin. Sipos evri dei yumi kam eli, bambae yumi glad blong joen wetem kampani blong ol brata sista blong yumi. Yumi laekem mo yumi tingbaot olgeta, yumi gat respek long Jeova mo long kakae long saed blong speret we hem i stap givim long yumi. Ol samting ya oli mas pulum yumi blong traehad blong kam long stret taem.
6 LESIN GUD: Wod ya lesin i min se man i rili stap lesin gud wetem tingting blong hem, hat blong hem, sora blong hem mo i traem kasem mining blong tok we hem i harem. Yumi mas lesin mo ‘harem tok ya blong Jeova.’ (Jer. 2:4) Long Aesea 55:2 Jeova i talem wan loa long ol man Isrel. Hem i talem se: “Yufala i lesin gud long mi.” Tok ya i min se oli mas tingting dip long ol samting we oli harem. Sipos yumi lesin gud long ol tok blong asembli, bambae yumi ‘lesin long ol tok we oli save tijim yumi, mo yumi holem gud olgeta.’ (Prov. 1:5) Yumi wantem tumas mekem olsemia. Plante taem yumi mas traehad moa blong lesin mo lanem long distrik asembli, i bitim taem yumi stap long Haos-Kingdom. ?From wanem i olsem? From we yumi sidaon moa longtaem mo i gat plante moa man. From samting ya, plante moa samting oli save pulum tingting blong yumi nao yumi no lesin gud. Sipos yumi no lesin gud, bambae yumi no kasem save long gudfala kakae long saed blong speret. (1 Pita 2:2) ?Yumi mas mekem wanem blong no kasem trabol ya? Plante man oli tekem not long ol asembli. Samting ya i wan gudfala fasin. I tru, i gat sam tok we bambae oli kamaot long ol magasin biaen. Be i gat sam narafala tok we bambae oli no kamaot. From samting ya i gud blong tekem sam not long distrik asembli. Hem i wan gud rod blong lesin gud long ol tok.
7 I no nid blong tekem longfala not mo raetemdaon evri tingting we brata i talem. Wan smol tok no tu oli naf blong talemaot wan impoten tingting. Ol pikinini bambae oli lanem moa mo oli lesin moa sipos oli gat wan pepa mo wan pen blong raetemdaon ol stampa vas, ol impoten mo nyufala tingting. Ol elda oli mas tekem sam not we oli klia. Olsem nao, oli naf blong tokbaot ol poen blong asembli ya bakegen long Miting blong Kingdom Wok afta distrik asembli. Ol not ya oli givhan long olgeta tu long wok blong olgeta blong tijim man mo lukaot gud long ol brata.
8 STAP WANPLES LONG TAEM BLONG PREA MO SINGSING: Long wosip blong yumi, yumi ona long Jeova taem yumi leftemap hem wetem ol singsing. Yumi mekem olsem Jisas mo ol aposol blong hem. (Mak 14:26) Tok blong Pol long 1 Korin 14:15 i soem se ol singsing oli wan haf blong wosip blong yumi. (Lukluk Kingdom Wok Blong Yumi blong Febuwari 1991, pej 3.) Taem yumi stap long ol distrik asembli, yumi gat nambawan jans blong joen wanples wetem plante taosen brata sista blong yumi blong leftemap Jeova wetem ol singsing mo prea. Be sam brata sista oli no gat respek long impoten haf ya blong wosip blong yumi. ?Oli mekem wanem? Sam oli kam long asembli taem ol brata oli stap singsing, no biaen long singsing ya. Sam oli kam taem brata i stap talem faswan prea, no biaen. Mo tu afta las tok, taem ol brata oli stap singsing mo bifo we oli prea, sam oli livim ples blong olgeta, oli go afsaed. I tru, samtaem sam brata oli gat gud risen blong mekem olsem. Be plante taem, i no gat. Taem ol brata sista oli no tekem jans blong singsing mo prea wanples wetem ol narafala from we oli wantem go kwiktaem long trak blong olgeta, no long ples blong kakae, oli no respektem ol kakae long saed long speret we Jeova i mekemrere blong olgeta. Mo tu, oli soem se oli no laekem kakae ya.—Mat. 6:33.
9 Yumi mas lukaot gud blong no folem ol rabis fasin blong wol ya. Olsem nao, yumi no mas letem fasin blong tingbaot yumi fastaem, fasin blong wantem evri samting, mo fasin blong tingbaot yumi nomo i stap long yumi. Sipos yumi gat ol fasin ya, bambae yumi no save gohed gud long saed blong speret. Long ol yia we oli pas finis, plante brata sista blong Is blong Yurop oli kam fri, nao oli no moa mas haed blong singsing mo prea. Oli glad tumas from we plante man oli save hivap wanples blong singsing mo prea tugeta. !Olsem olgeta ya, yumi mas soemaot we yumi tinghae long ol tabu samting! !Neva yumi mas mestem blong singsing mo prea tugeta!
10 OL KRISTIN FASIN BLONG YUMI: Ol man oli tinghae long ol Wetnes blong Jeova from ol Kristin fasin blong olgeta long ol distrik asembli. Tru ya, yumi tinghae long wosip blong yumi long Jeova. Yumi no luk ol asembli ya olsem wan jans blong gat gud taem nomo wetem sam gud fren. No gat. Taem yumi stap wanples long ol asembli ya, yumi mas gat gudfala Kristin fasin, mo fasin blong yumi i mas soemaot we yumi minista blong God.—1 Korin 10:31-33.
11 Sipos yumi no mekem olsemia, bambae yumi mekem ol narafala oli harem nogud, mo samting ya i save spolem ol nyufala man we oli kam. Taem ol narafala oli mekem i gud long yumi, yumi mas tangkyu long olgeta. Yumi mas gat gudfala fasin wetem olgeta we oli stap raonabaot long yumi. Yumi mas respektem olgeta mo yumi mas kea long olgeta. Yumi mas tingbaot se taem faswan tok i stat, yumi mas lesin. I no moa taem blong go olbaot mo blong toktok.—Dut. 31:12.
12 Sipos yumi slip long haos blong wan man, yumi mas gat Kristin fasin long hem tu. Samting ya i save leftemap nem blong Jeova God.
13 LONG OL PAPA MAMA: Mifala i singaot ol pikinini mo ol yangfala blong kam long distrik asembli “Ol Man We Oli Laekem Fasin Fri.” Fasin fri blong wol i save pulum ol yangfala mo mekem olgeta oli foldaon long saed blong speret. Samting ya i hapen long Adam, be biaen hem i no moa fri olsem fastaem. Yumi mas gat stret tingting long saed blong fasin fri. Ogenaesesen blong Jeova i soemaot olsem wanem yumi save gat tingting ya. I gud blong luk ol yangfala oli lesin gud long ol Kristin miting, mo tu long ol tok long ol asembli. Samting ya i leftemap tingting blong yumi. (Sam 148:12, 13) Taem ol papa mama oli lesingud mo oli wajemgud ol pikinini blong olgeta, ale ol pikinini oli save gat gudfala fasin. Plante pikinini oli save finis olsem wanem blong raetem ol not long asembli. Sipos yu yu no tijim ol pikinini blong yu long samting ya yet, i gud blong tijim olgeta bifo we asembli i stat. Yu yu save talem long ol smol pikinini blong yu tu, olsem wanem blong raetem ol vas blong Baebol mo ol stampa tingting we oli harem. Taem oli gobak long ples we oli slip long hem, no taem oli gobak long haos blong olgeta, sam papa mama oli toktok bakegen wetem ol pikinini blong olgeta long ol bigfala tok we oli harem long dei ya.
14 Plante papa mama oli save se ol pikinini oli no save stap kwaet oltaem, oli no gat naf ekspiryens, mo oli no save tingtinggud yet. From samting ya, ol papa mama oli mas tijim ol pikinini blong oli save wetaem oli mas lesin gud mo wanem fasin oli mas gat taem oli stap long miting. Blong mekem olsem, ol papa mama oli mas wajemgud olgeta. Be sam papa mama oli mestem long saed ya. Wan eksampel: Taem ol brata oli prea, ol papa mama oli soemaot respek long Jeova. Be samtaem ol pikinini blong olgeta oli stap plei nao ol narafala oli no moa save lesin gud long prea ya. Yes, long taem blong prea tu, ol papa mama oli mas save wanem samting ol pikinini blong olgeta oli stap mekem. Mo tu, taem ol brata oli mekem tok, sam pikinini oli girap, oli livim ples blong ol. ?Be ol papa mama oli save wanem samting ol pikinini blong olgeta oli stap mekem? Tru ya, taem ol brata oli mekem ol tok, mo taem program i finis tu, ol papa mama oli mas wajemgud ol pikinini blong ol.—Prov. 29:15.
15 Long kwaet fasin, sam brata sista we oli olfala lelebet oli traem stretem sam pikinini we oli stronghed. Be ol pikinini ya oli no respektem olgeta. I no stret nating we sam Kristin pikinini oli stronghed olsemia. Samting ya i hapen from we ol papa mama oli no stretem gud ol pikinini blong olgeta long haos. Olgeta Kristin papa mama oli mas stretem fasin olsem. Oli mas wajemgud ol pikinini blong olgeta oltaem, “blong stretem olgeta, mo blong trenem tingting blong olgeta olsem we Jeova i wantem.”—Efes. 6:4, NW.
16 YUMI MAS WOK TUGETA: Ol brata oli mekem wan bigfala wok blong mekemrere ol samting. Olsem nao, bambae i gat naf jea, buk, magasin, kakae mo ol narafala samting we evriwan i nidim.—1 Korin 13:5; Fil. 2:4.
17 Long saed blong ol jea, yumi mas lesin mo obei long ol advaes we ol brata oli talem. Yumi mas rimemba se YUMI SAVE HOLEM OL JEA BLONG STRET FAMLE BLONG YUMI NOMO, MO BLONG OLGETA WE OLI STAP LONG TRAK WETEM YUMI BLONG KAM LONG ASEMBLI. Yumi no mas holem ol jea blong ol narafala. Sam oli holem jea, be oli no wet wan man. Samting ya i soemaot se oli no gat lav. Oli blokem ol brata we oli welkamem man mo ol narafala man blong faenem ol ples blong sidaon. Olsem Baebol i talem, yumi mas soemaot lav long ol brata mo yumi mas obei gud long ol advaes we ol brata oli givim long saed long jea. Wan brata i save holem jea blong stret famle blong hem nomo, mo blong olgeta we oli stap long trak wetem hem. I no gat wan brata we i gat raet blong bitim mak long saed ya.—2 Pita 1:7.
18 Evri yia, ol man blong Jeova oli glad blong joen wanples blong lesin long ol gudfala tok blong speret we ol brata oli mekemrere blong olgeta. Oli mekem ol asembli ya long ol gudfala ples. Yumi harem gud tu from ol defren wok we ol brata oli stap mekem blong givhan long yumi long ol asembli ya. Sosaete i wok strong mo i spenem plante mane blong ol man oli save sidaon, oli save harem gud ol tok, blong evriwan i save kakae mo plante narafala samting olsem. Ol samting ya oli mekem yumi harem gud blong stap long asembli, nao asembli ya i save leftemap tingting blong yumi long saed blong speret.
19 Mane we ol brata oli givim long asembli i kavremap praes blong ol samting we oli mas pem blong mekem asembli ya i rere. Sipos yu yu wantem mekem wan jek, yu yu save raetem jek ya long nem blong “Ol Wetnes blong Jeova.” Bambae ol brata oli putum ol smol bokis long defren ples long asembli ya, nao yu yu save putum mane blong yu i go long ol bokis ya. Sosaete i glad long mane ya, mo i tangkyu long yufala from. Bambae mane ya i save givhan long wok blong Kingdom.—Luk 6:38.
20 YUMI GO LONG DISTRIK ASEMBLI BLONG “OL MAN WE OLI LAEKEM FASIN FRI”: Sipos yumi stap long distrik asembli blong “Ol Man We Oli Laekem Fasin Fri” mo yumi lesin gud long ol tok blong hem, bambae yumi kasem save long fasin fri we yumi save gat from Kraes. Mo tu bambae yumi save yusumgud fasin fri ya. I stat tede, yumi mas mekem evri samting i rere blong yumi save singsing long faswan sing blong asembli mo blong lesin long olgeta tok, gogo kasem ol brata oli talem finis laswan prea long Sande aftenun.