Haremgud Fulwan Long 1993 Distrik Asembli “Tijing Blong God”

¹ ‘Jeova, plis yu tijim mi . . .’ (Sam 86:11) Olgeta man we oli givim laef blong olgeta finis blong mekem wok blong God, oli mas askem strong long Jeova from samting ya. Yumi mas gat strong tingting blong yumi neva stop blong lanem. Samtaem yumi nidim advaes, mo olsem man blong raetem Ol Sam i mekem, yumi nidim blong askem God blong mekem hat blong yumi i kam fulwan long saed blong Hem, blong yumi no gat tu tingting. Program blong Distrik Asembli ya “Tijing Blong God” bambae i save givim ol gudfala tijing mo advaes we yumi nidim blong gohed blong mekem wok blong Jeova long medel blong wan wol we i gat fulap trabol we i stap kasem laef blong ol man.

² Fo-Dei Asembli: Ol program bambae oli stap long Niu Kaledonia mo long Vanuatu. Program bambae i stat long Tasde long 1:20 long aftenun, mo bambae i finis long Sande aftenun. Long ol dei blong asembli ya bambae doa i open long 7⁠:30 long moning. Plis tingbaot se bambae i no gat man we i save go insaed bifo 7⁠:30 long moning. Yu save go nomo, sipos yu gat sam wok blong mekem long taem ya. Long Niu Kaledonia, bambae oli holem asembli ya long La Salle Omnisports de l’Anse-Vata, long Septemba 2-5, 1993. Long Vanuatu, asembli ya, bambae oli mekem long Bislama long Haos Kingdom, long Luganville, Santo, long Ogis 26-29, 1993.

³ ?Bambae yumi kasem wanem from? Hemia fulap strong kakae long saed blong speret we oli save givim long ol defren rod blong hem: ol tok, ol pleplei, storeyan wetem sam man, mo bambae i gat tu drama. !Yu no mas mestem ol impoten tijing ya! Mo tu, yumi save glad blong lukluk ol fren blong yumi bakegen mo mitim ol nyufala fren tu.

⁴ ?Bambae Yu Karem Wan Ful Hif Blong Ol Samting Long Haos Blong Kipim Ol Samting? Long Malakae 3⁠:10, Jeova i mekem promes ya long ol man Isrel se, sipos oli rere blong testem hem taem oli karem wan ful hif blong ol ten hif i kam long haos blong kipim ol samting, bambae hem i givim blesing long olgeta gogo oli no moa nidim samting.

⁵ Samfala, bambae oli testem Jeova, taem oli go kwiktaem blong askem long masta blong olgeta, blong oli mas tekem spel blong olgeta, blong oli save stap long asembli ya. Long taem ya, sam brata oli no wantem mekem samting ya, oli ting se, ol bos blong olgeta bambae oli no letem olgeta blong stap long asembli ya. Be, oli no faenem i had blong talem long bos blong olgeta long ol samting we oli wantem mekem we oli no joen long ol samting long saed blong speret.

⁶ Yumi save askem yumi wanwan: ?Sipos wan fren bambae i mared long wan narafala ples, yumi no save askem bos blong yumi blong letem yumi smoltaem blong stap long mared blong fren ya? ?Mo sipos hem i no wantem givim, yumi no save eksplenem wetem respek olsem wanem yumi wantem tumas blong go long mared ya? !I tru ya, i impoten moa we Jeova i tijim yumi bitim we yumi go long mared! Sipos yumi rili bilif se, program blong asembli ya, hem i impoten blong halpem yumi blong gru long saed blong speret, bambae hem i isi long yumi blong talem long bos blong yumi blong givim sam taem long yumi blong stap long asembli ya.—⁠Jem. 1⁠:7, 8.

⁷ Long Isrel, wan hif blong ol ten hif we oli mas karem i blong sapotem haos wosip blong Jeova. Long taem blong yumi, wan hif ya blong ol ten hif i minim taem, paoa mo mane we yumi yusum long wok blong Jeova mo blong sapotem wok blong Kingdom. Wan hif ya i minim tu ol taem we yumi spenem blong go long ol miting, ol asembli, mo blong klinim mo lukaotgud long haos miting blong yumi. Distrik Asembli ya, “Tijing Blong God” bambae i givim plante jans long yumi blong karem wan ful hif blong olgeta ten hif long haos blong putum gud ol samting long saed blong speret. ?Wanem sam long ol samting ya?

⁸ Yumi save karem wan hif blong ol ten hif blong ol samting, taem yumi lesingud long ol tok we yumi save harem long asembli ya, taem yumi glad blong joen long ol singsing blong Kingdom, mo lesingud long olgeta prea, blong yumi save talem amen wetem wan fulhat.

⁹ Blong yumi gohed long trutok i dipen bigwan long fasin blong yumi blong lesin. Long wan bigfala haos blong asembli, hem i isi blong no lesingud no tingtinggud, from ol samting we ol narafala oli stap mekem raonabaot long yumi, from samting ya, yumi mas putum tingting blong yumi i stap long stret rod. So mekem sua blong rere fulwan blong kam long asembli, wetem singsing buk, pen mo wan notbuk, mo karem Wajtaoa ya we bambae yumi stadi long hem long wik ya. Hem i gud blong tekem ol not long ol poen mo long ol vas we bambae ol man blong givim ol tok, oli talem. Mekem ol not we oli sot nomo, taem yumi tekem plante not, ating yumi no save lesingud. Olgeta yangfala tu oli mas lanem blong kam wan man we i lesingud. Ol pikinini oli save karem wan hif blong ol ten hif blong olgeta samting wetem ol papa mama, taem oli lesingud long ol program.

¹⁰ Sam papa mama oli gat wan kwaet taem long haos evri dei, ale long taem ya ol yangfala blong olgeta oli mas save se, hemia i taem blong rid no lukluk ol pija blong ol buk blong Sosaeti. Gudfala trening olsem i mekem se, hem i moa isi blong olgeta pikinini oli sidaon kwaet long taem blong ol miting mo long ol asembli. Ol papa mama we oli bin trenemgud ol pikinini blong olgeta, oli talem se neva oli letem ol pikinini oli karem ol samting blong pleplei, no ol buk blong kalarem long taem blong miting. Nating se oli smosmol pikinini, be oli save lanem se, risen blong kam long ol miting i blong mekem wosip long Jeova. Yumi save talem tangkyu mo leftemap ol papa mama we oli tijim ol pikinini blong olgeta long trufala mining blong tok ya, karem wan hif blong ol ten hif blong ol samting blong olgeta i go long haos blong kipim gud ol samting.

¹¹ Mo tu yumi save karem wan hif blong ol ten hif blong ol samting, taem yumi volontia blong givim paoa blong yumi blong mekem asembli ya i rongud. Long plante ples we oli mas mekem asembli long hem oli mekem wan program blong oli klinim ples ya wan no tu dei bifo asembli i stat. Sipos yu stap kolosap, i gud yu mekem plan blong ful famle blong yu oli save joen long wok ya blong klinim. Sam brata oli tekem ol Baebol stadi blong olgeta we oli stap gohed gud, blong oli save lanem bifo baptaes se wanem nao oli mekem blong sapotem trufala wosip blong Jeova. I gat plante wok blong mekem blong asembli ya i save ron gud. ?From wanem yufala i no mekem volontia olsem wan ful famle?

¹² Ol mane blong yumi blong sapotem asembli ya hem i olsem wan narafala rod blong karem wan hif blong ol ten hif blong ol samting. Blong soem se yumi mas givim ol samting olsem wan presen blong sapotem klin wosip, Jeova i talem long nesen blong Isrel se: “I no gat wan long yufala we i save kam fored long Jeova wetem wan han we i emti. Ol wanwan presen blong yufala, oli mas bigwan we i laenap wetem blesing we Jeova God blong yufala i givim finis long yufala.” (Dut. 16⁠:16, 17) Nomata ol man oli save givim plante no smol, be ol sakrifaes blong olgeta we oli mekemrere fastaem, oli mekem Jeova i glad. Sem mak nao, plante brata oli prea mo tingtinggud long ol mane we oli save givim, maet wetem mane no oli raetem wan jek (mekem i go long “Ol Wetnes blong Jeova”). ?Yu yu letem smol pikinini blong yu i putum smol mane long bokis?

¹³ Flasemgud Tijing Blong Man Blong Sevem Yumi, God: From fasin respek blong yumi mo gudfala fasin blong yumi, yumi save “flasem tijing blong Man blong sevem yumi, God, long olgeta samting.” (Taet. 2:10, NW) Hemia i min se, insaed long asembli nomo, yumi save soem we stret tijing blong God i stap wok long laef blong yumi.

¹⁴ ?Olsem wanem long fasin respek blong yumi long ol narafala? Fasin blong tingbaot ol narafala man i kam smol naoia long wol. Be, ol man blong Jeova we oli stap letem ol rul blong Baebol i lidim olgeta, oli tingbaot ol narafala man fastaem, oli no tingbaot olgeta nomo. (Fil. 2:⁠4) Yumi mas tingbaot ol narafala we oli stap kolosap long yumi. Yumi no mas pusum ol man taem oli stap mekem laen blong karem kakae, no blong pem ol buk. Yumi mas tingbaot ol olfala mo ol smosmol pikinini we oli stap wet long laen wetem ol papa mama blong olgeta mo maet hem i isi blong wan bigman i pusum hem, from we oli no luk hem.

¹⁵ Ol gudfala fasin blong yumi i save gat bigfala paoa long ol man we oli stap raonabaot long yumi. Long wan distrik asembli long wan taon long las yia, wan polisman we i stap 21 yia long wok ya i talem se: “Mi mi glad long ol stret fasin blong yufala. [Oli] nambawan tumas; oli pikimap doti, nating se wan man i no askem olgeta blong mekem, mo oli wok long fasin we i gat oda long hem, mo asembli blong yufala i ogenaes gud.” Hem i gohed: “Taem ol man blong yufala oli luk mifala, oli smael. Hemia wan gudfala saen. Mifala i stap lukaot samting ya nao. Hemia wan fasin blong soemaot fasin fren, mo se oli no traem blong haedem wan samting. Mo tu, mifala i luk se ol pikinini blong yufala oli stap wetem ol papa mama blong olgeta, mo we oli tijim gud olgeta. Yufala i save bilivim, mi mi glad. Mi glad we oli jusumaot mi blong kam wok long ples ya.”

¹⁶ Sam haeman oli mekem wan spesel trep i go long Betel blong askem olgeta blong holem wan asembli long taon blong olgeta. Sosaeti i agri mo ol haeman blong taon ya, oli haremgud. Namba tu haeman blong taon ya i talem se: “Mifala i glad tumas blong gat wan impoten grup olsem yufala i hivap long taon blong mifala. Mifala i traehad blong tekem yufala i kam long ples ya . . . mo mifala i glad bitim mak.” From ol gudfala fasin blong olgeta, wanwan brata, sista oli save givim nambawan wetnes long ples ya.

¹⁷ ?Yu wan, yu save flasem tijing blong Man blong sevem yumi, God, from wan gudfala ­eksampel blong yu? Yu save mekem long rod ya:

Klos mo Hea: Long taem we yumi stap long asembli, yumi no mas tingbaot olsem we yumi stap long wan holidei. Defren olgeta, yumi stap givim yumi wanwan i go long Jeova blong hem i tijim yumi. From we i olsem, ?yumi putum ol klos olsem we yumi stap putum oltaem blong joen long ol miting blong Haos Kingdom? (1 Tim. 2:9, 10) Mo tu, yumi mas lukaotgud long wanem we yumi werem afta we program blong evri dei i finis. Taem yumi gobak long haos we yumi slip long hem, ?yu ting se i stret, nomata wanem yia yumi gat, blong jenisim gudfala fasin blong yumi blong putum klos, nao yumi werem ol klos we i save mekem yumi luk olsem ol man blong wol we oli putum ol klos olbaot we oli no klin nating? Samting ya i luk olsem we ol klos we yumi stap werem blong go long ol miting, oli olsem wan yunifom, we oli no laenap wetem fasin blong laef blong yumi. Tingbaot, yumi stap karem nem blong Jeova, mo wanwan long yumi i mas mekem sua se i no gat wan man we i save sakem ol nogud tok we i go agens long trutok.

Ol man blong baptaes oli mas tingbaot se, long wan impoten taem olsem, i no stret blong werem wan singglet we i gat ol toktok blong wol, ol kaen pija, no pablisiti blong ol bisnes long hem. Ol elda oli mas mekem sua se oli storeyan wetem ol man we oli wantem baptaes long ol kwestin blong baptaes. Mo oli talem long olgeta ya wanwan longtaem lelebet bifo long asembli sipos hem i stret blong hem i baptaes no i no save. (Taem oli stap gotru long ol kwestin, maet hem i wan stret taem blong givim sam gudfala tok long saed blong fasin blong putum klos we i stret nomo blong baptaes.) Ol man blong baptaes we ol elda oli agri long olgeta oli no nidim blong go blong rejista long asembli.

Ples Blong Slip: Soemaot ol frut blong tabu speret, taem yu stap long haos blong ol brata.

?From wanem yu no tokbaot wetem ol famle blong yu se, hem i wan jans blong letem haos blong yu, blong ol brata blong yumi long bus no long ol narafala ples oli save kam stap long hem? Fasin blong yumi blong singaot ol narafala, i wan rod blong givim wan hif blong ol ten hif blong ol samting. Hem i gud blong ol papa mama oli save spenem sam taem wetem ol pikinini blong olgeta bifo long asembli, blong tokbaot wanem fasin we ol pikinini blong olgeta oli mas mekem, olgeta oli save tokbaot ol wanwan responsabiliti blong ol pikinini blong olgeta blong folem ol rul we oli laenap wetem Kristin fasin.

Ol Tep, Ol Videotep, Ol Kamera: Nating se yufala i save yusum video kamera, mifala i save se, bambae yufala i tingbaot ol narafala. Yumi no gat fasin lav, sipos yumi stap blokem ol narafala blong no lesingud long asembli ya, taem yumi stap mekem video kaset blong program. Sipos yu save mekem kaset no video long ples we yu stap sidaon long hem, bambae i gud nomo. Be tingbaot, se ol kamera no ol kaset rikoda oli no save joenem i go long lektrik no ol spika blong asembli, mo oli no mas putum ol samting ya long ples blong wokbaot no long ples we plante man i stap wokbaot long hem.

Jea: Plis holem long tingting blong yu se, OL JEA YU MAS BLOKEM NOMO BLONG OL MEMBA BLONG FAMLE BLONG YU NO ENI MAN WE I KAM WETEM YU LONG TRAK BLONG YU. Bambae i gat ol spesel ples blong ol olfala mo ol ples blong ol handikap tu long asembli ya. Plis yu mas stap tingbaot ol olfala. Samtaem i bin hapen finis se, sam olfala brata oli mas lukaot ples blong sidaon long hem, we i no isi nating long olgeta, from ol yangfala oli fulumap ol ples we oli makemaot blong ol olfala. Mifala i sore from i no gat ples no eria we mifala i save makemaot blong ol man we oli gat ol defren kaen sik.

Ol prapa samting blong yumi we yumi karem: Hem i gud blong no karem tumas samting i kam long asembli. Sipos hem i bigwan tumas blong putum aninit long jea blong yu, hem i moa gud blong livim i stap long haos no insaed long trak blong yu. Bigfala aes-bokis oli no mas putum i stap long ples we man i stap wokbaot long hem, from i denja blong mekem olsem, mo sipos oli putum i stap long jea kolosap long yu, i save blokem wan man we i nidim wan jea.

¹⁸ Long fasin lav mo tingbaot long ol narafala, mekem plan blong kam eli long ol dei blong asembli ya, speseli long Tasde taem hem i had blong faenem ples blong putum ol trak, mo ples blong sidaon.

¹⁹ Hem i wan bigfala blesing blong letem Jeova i tijim yumi! Sipos yumi yusum ol taem blong yumi, paoa blong yumi, mo ol samting blong yumi blong sapotem Distrik Asembli ya, “Tijing Blong God”, bambae yumi save kasem ol blesing long saed blong speret we oli save stap longtaem, mo we oli save mekem yumi haremgud mo ol famle blong yumi tu.

Tingbaot Distrik Asembli

Prapa Fasin: Hem i impoten blong olgeta we oli stap long asembli ya oli mas gat gudfala fasin, tingbaot wetem ona se “haos ya blong asembli, hem i blong God.” (Sam 55:14) Long taem blong ol tok, drama, singsing, mo speseli long taem blong prea, plis no mekem eni samting we i save spolem narafala blong no lesin long ol program. Fasin blong muvmuf olbaot, stap toktok, no yusum ol kamera we i gat flas, no video kamera long fasin we i blokem ol man blong oli no lesin, ol fasin ya i no soem respek. Ol gud fasin blong yumi mo fasin blong tingbaot narafala oli save soemaot we yumi rili gat fasin tangkyu, from tijing blong God mo yumi kam long asembli ya blong Jeova i tijim yumi.

Rum: Mifala i glad tumas taem yufala i agri mo wokgud wetem ol brata we oli stap lukaot ol rum blong slip long asembli.

Sekretari blong kongregesen hem i mas mekem sua se hem i sanem kwiktaem ol pepa blong askem rum blong slip i go long ples blong asembli. Sipos yu no moa nidim ples blong slip we yu bin askem, yu mas talem long man ya we i lukaot long ol rum kwiktaem, olsem nao oli save givim i go long narafala.

Kat Blong Bebi: Long plante ples, ol kat blong ol bebi oli no mas yusum long ol ples blong asembli. Ol loa blong faea oli talem se, oli no save putum long ol smol ples we man i stap wokbaot long hem, no kolosap long ples blong sidaon. Long ol taem we i gat hif blong ol man, hem i save mekem ples i fasfas, ale ol kat blong ol bebi oli denja, i no long ol bebi nomo, be long ol bigwan man tu, sipos oli foldaon antap long olgeta. Taswe, plis, no mas karem olgeta i kam wetem yu long dei blong asembli. Yes, ol jea blong bebi we oli stap yusum long ol trak yu save karem from oli save stap long jea kolosap long yu nomo. Fasin blong yumi blong folem advaes i save mekem evriwan i glad.

Baptaes: Ol man blong baptaes oli mas sidaon long ol jea we oli makem finis blong olgeta, bifo we program blong Sarede moning i stat. Ol man we bambae oli baptaes oli mas karem wan stret klos blong swim mo wan taoel. Afta long tok blong baptaes i finis mo prea, jeaman bambae i givim smol toktok long ol man blong baptaes mo talem wan singsing. Afta long laswan haf blong singsing ya, ol man blong welkam, bambae oli save tekem olgeta i go long ples blong baptaes no tekem olgeta long trak blong go long ples blong baptaes. From we baptaes i wan saen blong soemaot we wan man i givim laef blong hem long Jeova finis mo from we hem i disisen we wanwan man i mekem wetem Jeova nomo, i no save gat tu no tri man we oli holholem han blong olgeta blong tekem baptaes.

Volontia: Ol volontia oli save givhan blong mekem distrik asembli ya i wok gud. Nating sipos yu save wok long wan dei nomo blong asembli ya, be wok blong yu hem i save mekem evriwan i glad. Sipos yu save givhan long asembli, plis givim nem blong yu long ol man blong lukaot long volontia. Ol pikinini we oli no gat 16 yia yet, oli save joen long ol wok ya blong asembli, be oli mas wok wetem ol papa mama blong olgeta, no wan narafala bigman.

Ol baj: Plis werem ol baj long asembli ya, taem yu stap go mo kambak long ples blong asembli ya. Plante taem samting ya i stap givim wan gudfala wetnes.

Kad Blong Soemaot Yu Yu Hu: Wetem baj blong asembli ya “Tijing Blong God” i gud tu we wanwan long yumi i mas karem kad blong hem long saed blong blad. Olgeta memba blong Betel famle, mo ol paenia oli mas karem ol kad blong olgeta blong soemaot se oli paenia.

Ol Woning: Nomata weples yu putum trak blong yu long hem, yu mas lokem gud oltaem mo neva livim ol samting oli stap insaed long klia ples nomo we man i save luk olgeta. Sipos yu save mekem, putum ol samting blong yu insaed long trak long ples biaen mo lokem gud olgeta. Hemia i minim tu se yu no mas livim eni samting we i sas i stap long ol jea long asembli taem yu yu no stap. Mo tu i gat sam ripot se samtaem i bin gat sam man nogud we oli kam insaed long asembli, ale oli traem blong pulum sam pikinini blong yumi, blong oli aot long eria blong asembli. Plis lukaotgud.