1992 “Ol Man Blong Karem Laet” Distrik Asembli
1 Jisas i talem long ol man blong hem se bambae oli kam “olsem laet long ol man long wol.” (Mat. 5:14) Defren nao wol ya i stap kam tudak moa long saed blong speret mo fasin taem ol dei oli stap pas. (Aes. 60:2; Rom 1:21) Wok blong yumi olsem man blong karem laet i gat bigfala mining taem yumi stap kam kolosap long en blong rabis fasin blong wol ya. Taem yumi luksave impoten wok we yumi stap mekem, yumi wantem tumas blong go long Distrik Asembli blong 1992 we stampa tok blong hem i se, “Ol Man Blong Karem Laet.” Asembli ya i stat long Fraede, Ogis 21.
2 Hem i Tri Dei Asembli: Program bambae i stat long 10:20 Fraede moning mo bambae i finis wetem singsing mo prea long samwe 4:15 Sande aftenun. Haos-Kingdom bambae i open long 7:30 moning, mo man i no save go insaed long Haos-Kingdom bifo long taem ya be sipos hem i gat wok blong mekem insaed, hem i save go insaed bifo long taem ya. Ol man blong Jeova bambae oli wantem lesin long ful program blong asembli ya. ?Yu mekem disisin blong yu finis blong stap long ol trifala dei ya? Prea long Jeova blong hem i blesem plan blong yu blong yu stap long taem ya.
3 Stat wetem faswan tok long Fraede moning go kasem laswan tok long Sande aftenun, olgeta program oli mas pulum tingting blong yumi. Ol gudfala samting blong lanem bambae oli kamaot long ol tok, ol pleplei, ol storeyan, mo long wan drama. Mekem plan naoia blong yu save sidaon rere long taem ya bifo we program i stat long Fraede. Oltaem, long faswan dei blong asembli i hadwok blong putum trak, faenem ples blong sidaon, mo ol narafala samting olsem. Taswe i gud blong yu kam samtaem bifo we program i stat. Sipos yumi kasem olgeta samting we oli kamaot long taem ya mo yumi stap go kasem laswan singsing mo prea blong asembli, yumi save kasem ful blesing blong program ya mo yumi soemaot fasin tangkyu long wok ya blong yumi olsem ol man blong karem laet.
4 Yu Mas Lesingud: Man blong raetem Ol Sam i talem se: “Long ol loa blong yu mi mi stap lesingud. !Yes mi mi laekem ol loa blong yu! Long ful dei mi mi stap tingting long hem.” (Sam 119:95b, 97, NW) Long evritaem we yumi hivap wanples blong Jeova i tijim yumi, yumi mas lesingud mo yumi no lesin nomo wetem sora blong yumi be wetem hat blong yumi tu.
5 Fasin blong lesin i wan samting we yumi save wok long hem mo yumi save lan blong mekem. Tok ya “lesin” i min se “yumi harem mo yumi tingtinggud long hem.” Hemia sam long ol advaes: (1) Slipgud evri naet mo evri moning traehad blong kasem ples blong asembli bifo we program i stat. Samting ya i min se bambae yu yu mekem wan plan mo famle i mas joengud blong folem. Sipos yu no slipgud no yu hanggri from we yu no kakae long moning, no tingting blong yu i no spel from we yu hareap, bambae yu no kasem plante samting long program blong asembli. (2) Tingbaot olsem wanem stampa tok blong asembli bambae i kamaot. Sam wik bifo long taem blong asembli, ol famle oli save stadi, mo maet ol memba blong famle oli save tokbaot mining blong tok ya se: ol man blong karem laet. Taem oli stap long asembli, mekemrere ol haf blong dei ya bifo we program i stat. (3) Putum ol gudfala klos, mo i nogud blong kakae mo dring taem program blong asembli i stap gohed. Samtaem i gat sam man oli stap kakae mo dring insaed long ples blong asembli no long ples blong sidaon taem program i stap gohed. Samting ya i no soemaot respek, mo i save pulum ae blong ol narafala man, mo i soemaot se man i no bos long tingting blong hem.—Lukluk Wajtaoa blong Novemba 15, 1991 (Engglis mo Franis), pej 8-18.
6 Yumi wantem tingbaot fasin blong raetem not. Sipos yumi mekem long fasin we i stret, bambae i givhan long yumi blong lesingud long tok blong man we i givim tok mo yumi save tingbaot. From we tingting blong yumi i wok kwik olsem fo taem i bitim toktok, taswe fasin blong raetem not i gudfala rod blong mekem tingting blong yumi i no go olbaot. Olsem wan man blong raetem buk i talem, “Oltaem i hadwok moa blong lesin long tok bitim we yu givim wan tok.” Maet yu tingbaot se bifo ol Kristin oli stap tekem ol pis graon pot we oli brobrok i go long miting mo oli stap raetem ol vas blong Baebol long olgeta. Tede yumi glad se yumi save raet long fasin we i gud moa, yumi save raet long wan buk mo yumi yusum wan pensel no wan pen. Blong gat gudhan long fasin blong raetem ol not, i min se yumi raetem not we i naf nomo blong kasem stampa tingting be yumi no gohed blong raetem plante samting tumas. Fasin blong raetem tumas samting bambae i no save givhan long yumi mo maet yumi save mestem ol impoten poen taem man i stap givim tok. Raetemdaon ol impoten tok, mo yusum ol tok we oli sot nomo. Ol not blong yu bambae oli givhan long yu sipos yu lukluk bakegen long sem naet ya mo tu yu save lukluk bakegen bifo kongregesen i tokbaot ol impoten poen long program blong asembli long Miting Blong Kingdom Wok.
7 Singsing Mo Prea: Singsing presem Jeova mo kam kolosap long hem long prea oli impoten haf blong wosip blong yumi long hem. (2 Kron. 30:21, 27) Hemia ol impoten samting long asembli we yumi evriwan i save joen long hem. Long ol tri dei blong Distrik Asembli blong yumi “Ol Man Blong Karem Laet,” bambae yumi sing long 18 singsing blong presem Jeova mo bambae yumi joen blong mekem eit prea long Papa blong yumi long heven. Hemia ol nambawan samting we yumi save joen long hem. Jeova i givim bitim 12 haoa blong tijim yumi mo trenem yumi long saed blong speret. Be long sam menet we i stap blong singsing mo prea, yumi talem tangkyu long Jeova from we hem i givim ol nambawan presen ya mo yumi stap presem hem from.—Mat. 7:12; Rom 12:10; Fil. 2:1-4.
8 Mekem Evri Samting Blong Leftemap Nem Blong God: Long evri yia yumi stap tokbaot bakegen olsem wanem i impoten blong gat gudfala fasin mo ol stret fasin long asembli. Plante long yumi oli stap mekem olsemia, oli stap tingbaot ol advaes ya bakegen. Taem rabis fasin blong wol ya i stap kam kolosap long en blong hem, yumi mas wok wetem ol man no skul wetem ol pikinini we oli gat ol fasin olsem 2 Timote 3: 1-5 i tokbaot. Ol man ya we yumi stap kampani wetem olgeta oli save mekem se yumi gat ol rabis fasin sipos yumi no lukaotgud. Yumi no wantem ol man oli ‘faenem poen long yumi se yumi man blong brekem loa.’ (1 Pita 2:12)
9 Ol Tep, Ol Videotep, Ol Kamera: Mifala i letem ol man oli tekem video kamera, be mifala i askem olgeta we oli yusum ol samting ya blong tingbaot ol narafala man, oli save jusum wanem samting oli tepem, mo oli respektem ol man we oli no wantem ol narafala man oli tekem video long olgeta taem oli kakae, taem oli stap lesin long program blong asembli, no long taem blong ol prea. Man we i yusum videotep mo i yusum kaset blong tepem sam samting i mas lukaotgud se hem i no pulum ae blong ol man we oli stap lesin no hem i mekem noes. I oraet nomo sipos man i sidaon long ples blong hem blong tepem ol program long asembli. Be long taem we program i stap gohed, i no stret blong wan man i stap goraon long ol ples we man i save wokbaot mo long fored blong ol man we oli stap lesin blong tepem program. Sipos i gat nid, olgeta we oli mekem welkam oli mas toktok long ol man we oli no soem fasin lav long saed ya. Plis tingbaot se ol kamera no ol narafala samting we ol man oli stap yusum oli no save joenem i go long lektrik no ol spika we oli stap long taem blong asembli, oli no mas putum ol samting blong olgeta long ples blong wokbaot no long ples we plante man i stap wokbaot long hem.
10 Ol man blong Jeova oli gat fasin tangkyu from we oli save kam hivap long ol gudfala ples blong haremgud long program long saed blong speret we i stap kamaot. Mifala i luksave plante wok mo ol samting we oli rere finis blong ol man oli haremgud taem oli stap hivap wan ples olsem. Sosaete i keagud mo i yusum plante mane blong mekemrere ol ples blong sidaon, mo ol lektrik mo ol spika we oli mekem saon i gud, mo rod blong givimaot ol kakae, mo ol narafala samting blong mekem ol man we oli kam long asembli oli save glad mo oli save haremgud long saed blong speret.
11 Kam Long Distrik Asembli “Ol Man Blong Karem Laet”: Taem yu kam long Distrik Asembli “Ol Man Blong Karem Laet,” bambae yumi glad blong luksave se hem i wan bigfala wok mo ona blong yumi stap olsem ol man blong karem laet. Mo bambae oli talem long yumi bakegen se hem i wan wok we yumi mas tinghevi long hem. Sipos yumi lesingud long ol samting we yumi harem long asembli ya, bambae yumi gat gudhan mo fasin tangkyu long wok blong yumi olsem ol man blong karem laet. Naoia i gud blong mekem plan blong stap long olgeta haf blong asembli ya stat long faswan singsing long Fraede go kasem laswan prea long Sande aftenun.
[Bokis]
Ol Samting Blong Tingbaot Long Taem Blong Distrik Asembli
Rum: Plis fulumap pepa blong faenem rum blong stap long hem kwiktaem. Sipos yu faenemaot se yu mas kanselem ol rum we yu bukum finis, yu mas raet no telefon long man we i lukaot long saed blong rum, blong hem i save holem rum ya long narafala man.
Baptaes: Ol man we bambae oli tekem baptaes oli mas sidaon long ples blong olgeta bifo we program blong Sarede moning i stat. Oli mas gat ol klos blong swim we i stret mo oli mas gat taoel blong olgeta. Afta long tok blong baptaes mo prea, jeaman bambae i givim smol toktok long ol man we oli tekem baptaes mo talem wan singsing. Afta long laswan haf blong singsing ya, olgeta we oli givhan long ol man we oli tekem baptaes bambae oli save tekem olgeta i go long ples we bambae oli baptaes long hem no tekem olgeta long trak blong go long ples blong baptaes. From we baptaes i wan saen blong soemaot we wan man i givim laef blong hem long Jeova finis mo from we hem i disisin we wanwan man i mekem wetem Jeova nomo, i no save gat tu no tri man oli holholem han blong olgeta blong tekem baptaes.
Volontia: Distrik Asembli i nidim ol volontia blong mekem wok long taem blong asembli i rongud. Nating sipos yu save wok long wan smol haf blong asembli nomo, be mifala i tangkyu from wok blong yu. Sipos yu save givhan, plis yu save go luk man we i lukaot long volontia taem yu kasem ples blong asembli. Ol pikinini we oli no kasem 16 yia yet oli save givhan blong mekem ol wok blong asembli oli rongud, be oli mas wok wetem wan papa no mama no ol narafala bigman.
Ol Kad Blong Baj: Plis yufala i putum ol baj long taem blong asembli mo taem yufala i goaot mo kambak long ples blong asembli.