Distrik Asembli Blong 1997, “Bilif Long Tok Blong God”
1 Aposol Pol i pulum Timote blong tingbaot bakegen se, ‘olgeta tok blong Baebol oli kamaot long God fastaem.’ (2 Tim. 3:16) From we Baebol i kamaot long God, yumi gat gudfala risen blong bilif long hem. Stampa tok blong distrik asembli long yia ya, hemia “Bilif Long Tok Blong God.” Ol tok long asembli ya bambae oli mekem bilif blong yumi long Baebol i kam strong moa, nating se yumi save trutok plante yia finis, no yumi jes stat blong save ogenaesesen blong Jeova. Yumi evriwan i mas mekem plan blong stap long fulwan asembli ya. !Bambae yumi haremgud tumas sipos olgeta we oli jes stat blong intres long Baebol, antap moa olgeta we yumi mekem Baebol stadi wetem olgeta, oli kam long asembli wetem yumi!
2 Asembli Blong Tri Dei: Long yia ya, Sosaeti i mekem plan blong gat wan distrik asembli blong tri dei, blong givhan long yumi. Sipos i no gat jenis long ol holidei, bambae asembli i stap long Haos Kingdom, Luganville, Santo, long Ogis 29-31, 1997. Yu mas meksua se yu stap long ol tri dei blong asembli ya. ?Yu yu go luk masta blong yu finis blong askem spel blong yu long wok?—Dut. 31:12.
3 Wajtaoa blong Febuwari 15, 1997, i talem ol ples we bambae i gat asembli long Saot Pasifik. Bambae i gat tu asembli long Franis long Nouméa, wan long Septemba 12-14, mo narawan long Septemba 19-21, 1997. Sipos yu wantem kam long Nyukaledoni mo yu no gat ples blong slip, yu save fulumap pepa blong askem ples blong slip, mo givim long sekretari blong kongregesen longtaem bifo long asembli, nao hem bambae i sanem i go long Sosaeti. Ol kwestin long saed blong ol distrik asembli long ol narafala kantri, oli mas go long ol wanwan hedkwota blong ol kantri ya.
4 Asembli bambae i stat evri dei long haf pas 9 long moning. I klia se, sipos yu kam bifo long taem ya, yu save storeyan gud wetem ol narafala Kristin mo leftemap tingting blong olgeta.—Fil. 2:4.
5 I Gud We Yu Lesingud: Aposol Pita i talem bakegen long ol Kristin long faswan handred yia se i gud we oli lesingud long tok blong ol profet, from we hem i olsem wan laet we i stap saen long ples we i tudak. (2 Pita 1:19) Semfala samting i tru long yumi. Laef long olfala wol ya we Setan i bos long hem, i olsem se yumi stap long wan ples we i tudak. Yumi glad we Jeova i bin singaot yumi blong kamaot long tudak long saed blong speret. (Kol. 1:13; 1 Pita 2:9; 1 Jon 5:19) Blong stap long laet ya oltaem, bilif blong yumi i mas stap strong oltaem. Taswe, yumi mas lesingud long ol Tok blong Jeova long Baebol. Distrik asembli ya bambae i pulum yumi blong mekem olsem.
6 Ating i no isi blong lesingud long ol tok long asembli, yumi mas rili traehad. Be, bambae yumi sua blong kasem blesing from. Yumi mas traehad blong slipgud bifo we yumi kam long asembli evri dei. Olsem nao, bambae yumi save lesingud. Yumi mas aot long haos eli evri dei blong gat naf taem blong wokbaot i go long asembli, mo faenem wan jea bifo we asembli i stat. Mo tu, yumi save joen long faswan singsing mo prea, we i statem asembli evri dei. Ol bigman oli mas soem eksampel, mo ol papa mama oli mas tijim ol pikinini blong olgeta long rod ya.—Efes. 6:4.
7 Long evri moning bifo we asembli i stat, i gud blong lukluk nem blong ol tok blong dei ya. Nao yumi save traem tingbaot ol poen we maet oli kamaot long ol tok ya. Samting ya i save mekem se yumi intres moa long ol tok ya. Maet yumi save lukaot ol poen we bambae oli givhan long yumi blong talem long ol narafala from wanem yumi bilif long God mo long trufala promes blong hem blong givim pei long olgeta we oli rili traehad blong faenem hem. (Hib. 11:1, 6) I gud sipos yumi raetemdaon ol bigfala poen nomo, blong yumi no fogetem olgeta. Sipos yumi raetemdaon plante tumas poen, maet yumi mestem sam bigfala poen taem yumi stap raetem ol samting.
8 Las yia, plante bigman mo yangfala tu oli stap wokbaot olbaot afsaed long Haos Asembli, mo toktok tugeta, taem asembli i stap gohed. Oli no stap lesin long tok we ‘slef we i stret mo waes,’ i mekemrere blong halpem yumi. Jisas i bin promes blong givim kakae long saed blong speret long stret taem we yumi nidim. (Mat. 24:45-47) Taswe, yumi mas stap sidaon mo lesin, blong kasem ol kakae ya. I nogud sipos yumi no gat tangkyu from. (2 Kor. 6:1) Mo tu, i luk olsem se taem sam pikinini oli no moa wantem stap kwaet, oli mekem eskyus se oli wantem go long tolet, jes blong oli save girap mo wokbaot. Sipos ol papa mama oli tijimgud ol pikinini blong olgeta long haos, bambae oli no nidim blong go plante taem long tolet. Sam samtaem, ol yangfala we oli bigwan finis oli sidaon wanples no afsaed long Haos Kingdom, mo oli toktok, mekem noes, mo raetem ol mesej long pepa blong pasem i go long olgeta wanwan. Ol yangfala blong yumi we oli fesem plante traem tede, oli nidim blong lesingud long ol save we i stap kamaot. Oli no mas mekem ol narafala samting taem asembli i stap gohed. Oli mas blokem ol tingting blong yangfala we oli no laenap wetem Baebol. (Skelem wetem 2 Timote 2:22.) Fasin blong olgeta evriwan blong lesingud, nating se oli yangfala no olfala, bambae i givim ona long Jeova mo mekem hem i glad.
9 Sipos wan man blong welkam i mas stretem samfala long poen ya, oli mas harem advaes blong hem olsem we Jeova i stap givim advaes ya wetem lav. (Gal. 6:1) Olgeta evriwan oli mas tingbaot se risen from wanem yumi hadwok blong go long asembli, hemia blong ‘lesin mo lanem ol samting.’ (Dut. 31:12) Mo tu, “man we i waes, bambae hem i lesin long ol tok we oli save tijim hem.” (Prov. 1:5) Bifo long asembli, tokbaot wetem famle blong yu se, blong kasem ol gudfala samting long asembli ya, yufala i mas sidaon wanples, stap sidaon kasem en blong program, mo lesingud long ol tok.
10 Putum Klos Mo Mekem Hea Long Fasin We Jeova i Glad Long Hem: Ol man blong Jeova oli stap long klia ples we ol man blong wol oli save lukluk olgeta. (1 Kor. 4:9) Kolosap olgeta man blong wol oli agri se yumi folem ol hae rul long saed blong klos mo fasin blong mekem hea. Ol man we oli joen wetem Kristin kongregesen, nao oli folem advaes blong 1 Timote 2:9, 10 mo 1 Pita 3:3, 4, oli mekem plante bigfala jenis long lukluk blong olgeta. Hemia i defren olgeta long fasin blong ol man blong wol blong putum klos mo mekem hea, we i stap kam nogud moa. Yumi mas lukaot se yumi no kam olsem ol man blong wol—putum ol klos we oli narakaen, folem ol stael blong mekem hea we wol i folem, mo putum ol klos we oli soemaot bodi blong yumi. Eksampel blong yumi long saed blong klos mo hea, i mas givhan long ol man we oli jes stat blong joen wetem yumi long asembli ya, blong luksave stret fasin blong putum klos mo mekem hea we ol Kristin oli mas folem.
11 I tru se, las yia kolosap olgeta man oli talem ol gudfala tok long saed blong ol asembli. Be, fasin blong putum klos mo mekem hea olsem ol man blong wol, i save kam wan problem long medel blong ol brata mo sista, antap moa, taem oli spel afta long asembli. Taem yumi stap mekem plan blong go long asembli, yumi mas skelemgud fasin blong yumi blong putum klos mo mekem hea. Ol papa mama, i waes we yufala i jekemap klos blong ol pikinini mo ol yangfala blong yufala. Meksua se yumi no stap letem ol fasin mo stael blong wol oli spolem naesfala Kristin lukluk blong yumi.
12 Mekem Fasin We i Stretgud: Ol gudfala fasin oli makemaot ol trufala Kristin. (1 Pita 2:12) Fasin blong yumi long evri ples—long asembli, long taon, long haos blong narafala, mo taem yumi stap go mo kambak long asembli—i save givim wan gudfala wetnes mo halpem ol narafala blong luksave olsem wanem bilif long God mo Tok blong hem i save givhan long olgeta. Maet samting ya i pusum samfala blong wantem save Jeova. (Skelem wetem 1 Pita 3:1, 2.) Yumi gat jans blong givim ona long God tru long fasin blong yumi. Maneja blong wan hotel long Alabama i talem se ol Wetnes we oli stap kam long asembli long taon blong hem, “oli moa naes mo fasin blong olgeta i moagud i bitim ol narafala man we oli stap long hotel ya.” Hem i gohed se: “Mifala i glad tumas blong welkamem yufala bakegen long fyuja.” Wan ofis blong lukaot long ol miting mo turis long wan ples long not wes blong Yunaeted Stet, i talem se: “Evri yia, mifala evriwan long ples ya i wet long asembli blong Wajtaoa Sosaeti. Mifala i laekem tumas ol memba blong skul blong yufala. Oli gat gudfala fasin mo respek. Ol bisnesman long ples ya oli luksave samting ya, mo oli glad tumas taem ‘famle ya blong olgeta’ i kam visitim olgeta evri yia.” Yumi glad tumas blong ridim ol ripot olsem, ?i tru? Be yumi mas lukaotgud oltaem, blong yumi save holem gudnem ya we ol man blong Jeova oli gat.
13 Plante taem, yumi bin kasem advaes blong lukaotgud long ol pikinini blong yumi, mo no letem olgeta oli ronron olbaot long Haos Asembli, we oli mekem ol narafala oli harem nogud. Samting ya i tru tu afsaed long ples blong asembli. Evri yia, Sosaeti i kasem ripot se sam papa mama oli letem ol pikinini blong olgeta oli mekem wanem we oli wantem afta we asembli i finis long naet, mo oli no stap lukaotgud long olgeta. Maneja blong wan hotel we i slip long hotel blong hem, i talem se, tu taem, ol grup blong pikinini blong yumi oli wekemap hem afta 11 klok long naet. Oli stap kilkilim ol doa blong faenem ol narafala Wetnes. I tru, ol asembli oli givim jans long yumi blong joen mo storeyan wetem ol brata blong yumi long saed blong bilif. Be ol papa mama oli mas rimemba se wok blong lukaot long ol pikinini blong olgeta i blong oltaem nomo. Hemia wan wok we Jeova i givim long evri papa mo mama. (Prov. 1:8; Efes. 6:4) Ol fasin we ol pikinini oli mekem taem papa mama i no stap wetem olgeta, oli save spolem gudnem we ol Wetnes blong Jeova oli bin wokhad blong kasem.—Prov. 29:15.
14 Ples Blong Slip Mo Trep Blong Go Long Asembli: Sipos yu stap wetem ol brata mo sista long Santo, i sua se bambae yu soemaot tangkyu from kaen fasin we oli soem long yu. Yumi no wantem yusum ol brata blong yumi jes blong kasem samting blong yumi nomo. Taswe, yumi respektem se oli nidim taem blong toktok tugeta, olgeta nomo, mo tu, yumi givhan blong pem ol kakae. Hemia nao gudfala rod blong soemaot tangkyu. Sipos yumi luk se wan narafala Wetnes i no mekem stret fasin long saed ya, i gud yumi pulum hem long kaen fasin, blong tingbaot gudfala fasin we hem i mas mekem.
15 Long saed blong mane blong pem rod blong go mo kambak long asembli, ol famle oli luk finis se i impoten blong putum mane i stap, plante manis bifo. Olsem evri yia, ating kongregesen blong Pot Vila bambae i rentem wan sip. Sam narafala bambae oli tekem plen. Nomata wanem rod yumi yusum blong kam long asembli, yumi mas meksua longtaem bifo, se bambae yumi no mestem asembli ya.
16 Mane Blong Pem Asembli: I tru se, yumi evriwan i nidim mane blong pem ol samting blong kam long asembli ya. Be i gat wan narafala samting blong pem tu, we yumi mas tingbaot. Haos Kingdom we yumi yusum blong mekem asembli long hem, yumi rentem long kongregesen. Mane ya i givhan long kongregesen blong pembak kaon blong olgeta long Sosaeti. I gat sam narafala samting tu we yumi mas pem. Taswe, presen mane we yumi putum long bokis long asembli, i givhan bigwan.—Wok 20:35; 2 Kor. 9:7, 11, 13.
17 Ol Jea: From we i no gat plante tumas jea long ples blong asembli, i moagud sipos yumi no blokem plante jea. I gud blong luk se plante moa oli folem advaes ya long ol yia we oli jes pas. Samting ya i mekem se filing blong lav i stap moa long ol asembli ya. Maet sam jea oli stap long ples we i moa isi blong sidaon bitim ol narafala ples. Plis, tingbaot ol narafala, mo livim ol jea olsem long ol brata mo sista we oli rili nidim olgeta.
18 Ol Kamera, Video Kamera mo Teprikod: Yumi save yusum ol kamera mo teprikod long asembli. Be, yumi no mas yusum olgeta long fasin we i mekem i hadwok long narafala blong lesin. Yumi no mas wokbaot blong karem ol foto taem ol tok oli stap gohed, from we samting ya i save pulum ae blong ol narafala we oli stap traehad blong lesingud. Yumi no mas joenem ol teprikod long lektrik no saon blong asembli. Mo tu, ol mesin ya oli no mas blokem ol ples blong wokbaot, no blokem ol narafala blong lukluk brata we i givim tok.
19 Dokta: Dokta long asembli i blong givhan long olgeta we oli nidim help kwiktaem nomo long asembli. Hem i no stap blong lukaot long olgeta we oli gat wan sik i stap. Taswe, bifo long asembli, yu mas tingbaot ol samting we yu mo famle blong yu i nidim long saed blong helt.
20 Kakae Long Asembli: Naoia we yumi no moa mekem ol bigfala kakae long asembli, plante moa brata mo sista oli save sidaon mo lesingud long ol kakae long saed blong speret. Mifala i kasem plante leta blong talem tangkyu from plan ya long saed blong kakae, we i mekem i moa isi.
21 Yumi gat bigfala tangkyu from lafet ya long saed blong speret, mo from smol spel long medel dei, we i givim jans long yumi blong joengud long pis mo storeyan smol wetem ol narafala. Blong sapotem plan ya, i gud we yu kakae long haos asembli, i bitim we yu gobak long haos blong yu long medel dei. Olsem nao, bambae yu gat moa taem blong haremgud long kampani blong ol brata mo sista blong yu.
22 !Yumi glad tumas se i no longtaem, bambae yumi stap long Distrik Asembli ya, “Bilif Long Tok Blong God”! Yumi evriwan i mas sua se yumi mekem plan blong stap long fulwan asembli ya. Olsem nao, bambae yumi haremgud fulwan long lafet ya long saed blong speret we Jeova i mekemrere blong yumi, tru long ogenaesesen blong hem. Long rod ya, bambae yumi “gat evri samting blong mekem ol gudfala wok” long fyuja.—2 Tim. 3:17.
[Bokis]
Ol Samting Blong Tingbaot Long Saed Blong Distrik Asembli
Baptaes: Olgeta we bambae oli tekem baptaes, oli mas sidaon long ol jea we ol brata oli makemaot, bifo we asembli i stat long Sarede moning. Olgeta wanwan oli mas karem klos blong swim we oli stret, wetem wan taoel. Long ol yia we oli pas, samfala oli bin putum ol klos blong swim we oli no stret long wan taem olsem, mo we oli no soem respek. Ol elda oli mas meksua se olgeta evriwan oli kasem save long poen ya, taem oli mekem ol kwestin long buk ya Minista Wok Blong Yumi wetem olgeta we oli wantem tekem baptaes. Afta long tok blong baptaes mo prea, jeaman bambae i askem yumi blong singsing. Afta long laswan vas blong singsing ya, ol man blong welkam bambae oli lidim olgeta we oli rere blong tekem baptaes oli go long ples blong baptaes. Baptaes i soem se man i givim laef blong hem i go long Jeova, taswe hem i wan samting we i spesel mo we man ya i mekem wetem Jeova nomo. From samting ya, i no stret se olgeta ya oli holholem olgeta, no holholem han, taem oli tekem baptaes.
Ol Baj: Plis, werem baj blong 1997 asembli oltaem, long taon we asembli i stap long hem, mo taem yu mekem trep blong go mo kambak long asembli. Plante taem, samting ya i save givim jans long yu blong wetnes. Yu save kasem ol baj mo plastik blong olgeta long kongregesen blong yu. Yu no mas wet kasem sam dei nomo bifo long asembli, blong askem ol baj ya blong yu mo famle blong yu. Yu no mas fogetem tu blong karem nyufala Kad blong Hospital wetem yu.
Ples Blong Slip: Mifala i askem long evriwan blong tekem rum ya we ol brata long asembli oli givim. Sipos yumi no askem ples blong slip tru long ofis blong asembli, be yumi nomo i mekem plan blong slip long narafala ples, i save gat problem i kamaot. SIPOS YU KASEM WAN PROBLEM, plis, yu no mas fraet blong talem long ofis blong asembli we i lukaot long ol ples blong slip, taem yu stap yet long asembli. Olsem nao, ol brata ya oli save givhan long yu blong stretem problem ya kwiktaem. Sekretari blong ol kongregesen oli mas sua se oli sanem kwiktaem ol pepa blong askem ples blong slip, oli go long stret adres blong asembli long Santo. Sipos yu no moa nidim wan ples blong slip we yu askem finis, kwiktaem nomo yu mas talemaot long hemia we yu mas slip long haos blong hem, mo long ofis blong asembli we i lukaot long ol ples blong slip. Nao oli save givim rum ya long narafala.
Ol Volontia: ?Yu save tekem sam taem long asembli blong givhan wetem ol wok? Nating se yumi wok blong ol brata blong yumi blong sam haoa nomo, samting ya bambae i givhan bigwan mo i mekem yumi haremgud tumas. Sipos yu save givhan, plis go luk ol brata long ofis blong asembli we i lukaot long ol volontia. Ol pikinini we oli no gat 16 yia yet, oli save givhan tu, taem oli wok wetem papa no mama blong olgeta no wetem wan narafala bigman. Oltaem i nidim plante volontia long dei bifo we asembli i stat, long faswan moning blong asembli, mo stret afta we asembli i finis. I gud tumas sipos yu save givhan long ol brata blong yu long ol taem ya. Long yia ya, ol brata we oli lukaot long ol wanwan wok long asembli, bambae oli karem nem blong ol volontia. Yu no nidim blong fulumap wan pepa blong volontia, be brata we i lukaot long wan wok bambae i askem yu blong wok wetem hem. Biaen, bambae hem i sanem lis blong ol volontia i go stret long ofis blong asembli we i lukaot long ol volontia.
Woning: Tingrere long ol problem we oli save kamaot, blong mekem se yu no kasem wan trabol we yu no nidim blong kasem. Plante taem, ol stilman mo ol narafala man nogud oli mekem wok blong olgeta long medel blong ol man we oli stap longwe long ples blong olgeta. Yu mas sua se yu lokem trak blong yu oltaem, mo yu no mas livim wan samting i stap insaed long hem we i save pulum ol stilman blong brekem lok. Ol stilman oli laekem blong wokbaot long medel blong ol bigfala hif blong man. I no waes blong livim enikaen sas samting long jea blong yu taem yu no stap sidaon. Samfala we oli stap long asembli ya oli no Kristin man. I moagud blong no givim jans long olgeta blong stilim wan samting.