Ansa Long Wan Kwestin
◼ ?Ol pikinini oli mas lanem wanem blong gat strong bilif?
Ol Kristin papa mo mama oli traehad blong ‘stretem mo tijim ol pikinini blong olgeta, olsem we Jehova i wantem.’ (Efes. 6:4) Oli luk se taem oli tokbaot vas blong dei evri moning wetem pikinini blong olgeta, hemia i givhan long hem. Long taem blong famle wosip mo long ol narafala taem tu, famle i save wajem mo tokbaot wan video. Sipos no, oli tokbaot sam save long haf ya Ol Yangfala Oli Askem, no oli save aktem wan stori blong Baebol, no oli aktem se oli stap prij, no wan narafala samting olsem. Be sipos papa mo mama i wantem se pikinini i kam “bigman long Kraes,” tufala i mas tijim hem tu long ol dip trutok blong Baebol.—Hib. 6:1.
Yu traem tingbaot samting we yumi tijim long ol man long wok blong prij. Taem yumi jes mitim wan man no yumi visitim hem, yumi traehad blong statem stadi blong hem long buk ya ?Wanem Samting We Baebol i Rili Tijim? Taem hem i finisim buk ya, yumi gohed blong stadi wetem hem long buk ya ‘Stap Long Laef Ya We God i Lavem Yu.’ ?From wanem? From we buk ya Baebol Tijim i givhan long man blong i save ol stamba tijing blong Baebol. Buk ya ‘God i Lavem Yu’ i tijim hem blong i folem ol rul blong Baebol long laef blong hem. Taem ol niuwan oli stadi long tufala buk ya, hemia i givhan long olgeta blong oli ‘holemstrong long Kraes, olsem we rus blong tri i holem graon,’ mo ‘bilif blong olgeta i kam strong moa.’ (Kol. 2:6, 7) ?Olsem wanem? ?Tufala buk ya i save givhan tu long ol pikinini blong yumi? !Yes, oli save givhan! Ol pikinini tu oli mas kasem save long ransom, long Kingdom, mo oli mas save samting we i hapen taem man i ded. Oli mas save from wanem God i letem ol man oli stap harem nogud, mo oli mas save ol saen blong ol las dei. Oli mas bilif se ol Witnes blong Jehova oli tijim trutok. Oli mas kasem save long ol rul blong Baebol, mo oli mas kam ‘naf blong luksave wanem i stret mo wanem i no stret.’ (Hib. 5:14) I tru se ol papa mo mama oli mas tingbaot yia blong pikinini mo samting we hem i naf blong kasem save long hem. Be plante pikinini oli naf blong lanem ol dip trutok blong Baebol taem oli smol nomo.—Luk 2:42, 46, 47.
Long Websaet ya jw.org, bambae i gat sam save we oli kamaot long buk ya Baebol Tijim, we papa mo mama i save yusum blong stadi wetem pikinini blong tufala. Oli save faenem ol save ya, taem oli klik long toktok ya BIBLE TEACHINGS > TEENAGERS (long Franis mo Inglis). Long ol taem we i stap kam, bambae i gat sam moa save we oli kamaot long buk ya ‘God i Lavem Yu.’ Be sipos ol papa mo mama oli wantem, oli save yusum tufala buk ya nomo blong stadi wetem pikinini. Ol papa mo mama bambae oli jusum sipos oli stadi long ol save ya long taem blong famle wosip, no taem oli mekem stadi blong pikinini, no taem oli trenem hem blong i mekem prapa stadi blong hem.