Yu Yusum Websaet Blong Yumi Blong Tijim Pikinini Blong Yu
1. ?From wanem oli wokem haf ya “Children” insaed long Websaet blong yumi?
1 Websaet ya blong yumi, jw.org, oli wokem blong givhan long enikaen man, ol papa mo mama, ol olfala, ol pikinini, mo ol yangfala. Naoia ol haf ya oli no kamaot yet long bislama, oli kamaot nomo long Franis mo Inglis. I gat wan haf long Websaet blong yumi, nem blong hem “Children,” (yu go long Bible Teachings > Children.) Hem i save givhan long ol pikinini blong oli fren gud wetem ol papa mo mama blong olgeta, mo blong olgeta evriwan oli kam klosap moa long Jehova. (Dut. 6:6, 7) ?Olsem wanem yufala i save yusum haf ya blong tijim ol pikinini blong yufala?
2. Taem yu wantem jusum wan haf blong famle i stadi long hem, ?olsem wanem blong jusum wan haf we i stret long evriwan?
2 Yu Mas Rere Blong Mekem Sam Jenis: Ol pikinini blong yu oli defdefren. (1 Kor. 13:11) Taswe, taem yu wantem jusum wan haf we famle bambae i stadi long hem, i gud yu jusum wan haf we i stret long olgeta evriwan. ?Olsem wanem blong mekem olsem? Fastaem i gud yu askem ol kwestin olsem se: ‘?Wanem samting nao we pikinini blong mi bambae i laekem blong tokbaot? ?Hamas save we olgeta wanwan oli naf blong tingbaot? ?Oli naf blong sidaon kwaet longtaem mo lesin?’ Sipos pikinini blong yu i gat tri yia, no maet i no kasem tri yia yet, yu save tokbaot ol stori we oli stap long “My Bible Lessons” we oli stap long Websaet blong yumi. Sam narafala famle, bambae oli glad blong tokbaot ol stori blong Baebol, we oli stap long haf ya “Teach Your Children.” Long ol haf we i kam biaen bambae i soemaot sam rod we yu save folem.
3. ?Olsem wanem ol papa mo mama oli save yusum ol haf insaed long “Family Worship Projects” blong tijim pikinini blong olgeta?
3 Ol Samting We Famle i Save Mekem Long Famle Wosip: Ol papa mo mama oli save yusum ol haf insaed long Family Worship Projects, blong stadi wetem ol pikinini blong olgeta. Yu klik long toktok ya download, mo yu ridim haf ya long “Parents’ Guide” blong luk olsem wanem yu save yusum ol stori, mo ol pija long famle wosip blong yufala. Yufala i save yusum ol picture activities, blong tijim ol pikinini blong yufala long hem. Yu givhan long ol pikinini blong yu we oli bigwan lelebet blong oli finisim ol study activities blong olgeta. Insaed long Family Worship Projects i tokbaot stori blong plante man long Baebol. Sipos yu jusum wan long ol man ya blong tokbaot long taem blong famle wosip, evri pikinini blong yu oli save joen long hem. From we olgeta samting we bambae oli mekem, i tokbaot sem man nomo, mo bambae oli lanem sem samting nomo.
4. ?Yu save faenem wanem long haf ya “Yu Save Kam Fren Blong God”?
4 Yu Save Kam Fren Blong God: Ol video mo songs, mo activity long Websaet ya, oli givhan long ol papa mo mama blong oli tijim ol smol pikinini blong olgeta long tok blong God. (Dut. 31:12) Ol sot video blong ol pikinini, oli tijim olgeta long ol impoten lesen. Mo taem oli mekem ol activity olsem lukaotem mo faenem wan samting, oli no save fogetem lesen ya. Ol pikinini oli laekem tumas blong singsing, mo ol singsing oli givhan long olgeta blong oli tingbaot samting we oli lanem. From samting ya, ol singsing blong Kingdom mo ol narafala singsing blong ol pikinini, bambae oli stap kamaot oltaem long Websaet blong yumi.
5. ?From wanem ol papa mo mama oli mas askem long Jehova blong i givhan long olgeta, taem oli stap tijim pikinini blong olgeta long trutok?
5 Ol papa mo mama, Jehova i wantem se wok we yufala i mekem i karem gudfala frut. Taswe, i gud we yufala i askem long hem blong i givhan long yufala, blong yufala i tijim gud ol pikinini blong yufala long trutok. (Jaj. 13:8) Jehova nomo i save givhan long yu, blong yu trenem pikinini blong yu blong i kam ‘waes, mo i save stanap strong long bilif blong hem long Jisas Kraes, blong God i save sevem hem.’—2 Tim. 3:15; Prov. 4:1-4.