?Jehova i Lukluk Mi Se Mi Olsem Wanem?
1. ?Olsem wanem Baebol i olsem wan glas?
1 ?Yu yu stap lukluk fes blong yu oltaem long glas? Evri dei yumi lukluk fes blong yumi long glas. Yumi mekem olsem blong jekem sipos i gat wan samting long fes blong yumi we i no stret, ale yumi stretem. Baebol i olsem wan glas. Taswe, taem yumi ridim Baebol, bambae yumi naf blong save samting we i stap long hat blong yumi. Mo hemia nao samting we Jehova i stap lukluk. (1 Saml. 16:7; Jem. 1:22-24) Baebol i talem se: “Tok blong God i save jajem olgeta tingting blong man, mo ol samting we man i wantem long tingting blong hem.” (Hib. 4:12) Sipos yumi wantem luksave ol samting we yumi mas kam gud moa long olgeta, blong wok blong yumi i karem frut, yumi mas ridim Baebol mo tingting dip long hem oltaem.—Sam 1:1-3.
2. ?Olsem wanem Baebol i save givhan long yumi blong yumi jekem yumi?
2 Yu Yusum Baebol Olsem Glas: Ol stori blong ol man blong God long Baebol oli tijim yumi long ol fasin we oli mekem man i naes long fes blong Jehova. Yu traem tingbaot, Deved i soemaot se hem i gat strong tingting blong leftemap nem blong God. (1 Saml. 17:45, 46) Aesea i no fraet blong prij long wan teritori we i had. (Aes. 6:8, 9) Jisas i lavem tumas Papa blong hem, taswe hem i glad nomo blong prij, be hem i no tingbaot wok ya olsem wan hevi samting. (Jon 4:34) Ol Kristin bifo, oli gat strong tingting blong prij, oli trastem Jehova, mo oli no wantem lego wok ya. (Wok 5:41, 42; 2 Kor. 4:1; 2 Tim. 4:17) I gud yumi tingting dip long ol stori ya. Olsem nao, oli save givhan long yumi blong jekem ol fasin we yumi wanwan i wantem kam gud moa long hem, long wok blong Jehova.
3. ?From wanem yumi no mas slo tumas blong jenisim ol fasin blong yumi?
3 Yumi Mas Traehad Blong Stretem Ol Fasin Blong Yumi: I tru, wan glas i no save givhan long yumi sipos yumi lukluk yumi long hem mo biaen yumi no stretem samting we yumi luk. Yumi save askem long Jehova blong hem i givhan long yumi blong faenemaot ol samting we yumi stap tingbaot, mo yumi stretem olgeta. (Sam 139:23, 24; Luk 11:13) Naoia yumi gat smol taem nomo i stap mo laef blong yumi i stap long denja, taswe yumi no mas slo tumas blong jenisim ol fasin blong yumi.—1 Kor. 7:29; 1 Tim. 4:16.
4. ?Wanem i hapen long man we i luklukgud long Tok blong God, mo i stretem samting we hem i luk?
4 Samting we i moa impoten long Jehova, hemia samting we i stap long tingting blong yumi, be i no bodi blong yumi. (1 Pita 3:3, 4) ?Wanem i hapen long man we i luklukgud long Tok blong God mo i stretem samting we hem i luk? Baebol i tokbaot man olsem se: “Hem i no save fogetem ol samting we loa ya i talem. Hem i save mekem ol samting ya, mo taem hem i stap mekem olsem, God i stap mekem hem i harem gud long olgeta laef blong hem.” (Jem. 1:25) Sipos yumi evriwan i olsem glas we i stap soemaot paoa blong Jehova, wok blong yumi bambae karem gudfala frut mo yumi save glad.—2 Kor. 3:18.