Yusum Gud Mira Ya Baebol

Disaepol Jemes i talem se Baebol i olsem wan mira we yumi save lukluk yumi wan long hem. (Jem. 1:​22-25) ?Be olsem wanem yumi save yusum gud Baebol olsem wan mira?

Ridim gud. Sipos yumi lukluk yumi wan kwiktaem nomo long wan mira, maet bambae yumi no luksave se i gat wan doti long fes o klos blong yumi. Long sem fasin, sipos yumi ridim Baebol kwiktaem nomo, bambae i had blong luk ol fasin we yumi mas jenisim o yumi nid blong kam gud moa long olgeta. Taswe yumi mas tekem taem blong ridim gud Baebol.

Lukluk gud yu wan, be i no ol narafala. Samtaem, sipos yumi holem wan mira mo yumi tanem smol, yumi save luk wan narafala man mo makem samting we i rong long hem. Long sem fasin, samtaem yumi save yusum Baebol blong makem ol mastik blong narafala. Be hemia bambae i no givhan long yumi blong kam gud moa long ol fasin blong yumi.

Gat stret tingting. Sipos yumi stap lukluk yumi wan long mira mo yumi lukluk nomo wan samting we yumi no laekem long bodi blong yumi, bambae tingting blong yumi i foldaon. Taswe, yumi mas gat stret tingting taem yumi stap ridim Baebol. I nogud yumi mekem i strong tumas long yumi wan, from we Jehova i no stap mekem i strong tumas long yumi.—Jem. 3:17.