Yumi Yusum jw.org Blong Prij

Websaet blong yumi hem i wan spesel tul blong givhan long yumi blong talemaot gud nius long “olgeta ples long wol.” (Wok 1:8) Plante man oli no save Websaet ya jw.org. Oli save nomo taem wan pablisa i soem Websaet ya long olgeta.

Wan eria elda i daonlodem video ya, ?From Wanem Yu Mas Stadi Baebol? long mobaelfon blong hem, mo hem i soem long eni man we hem i gat janis blong stori wetem. Taem hem i prij long ol haos wanwan, hem i talem long ol man se: “Mi mi pas smoltaem blong givhan long ol man blong oli save ansa blong tri impoten kwestin. ?From wanem i gat plante trabol tede? ?God bambae i stretem ol trabol ya olsem wanem? ?Olsem wanem yumi save winim ol trabol ya? Video ya bambae i ansa long trifala kwestin ya.” Brata ya i gohed nomo blong soem video ya, mo hem i stap lukluk man blong haos blong luk sipos hem i glad blong wajem video ya no nogat. Video ya i gud tumas. Plante man we oli lukluk video ya, oli folem gud stori long stat kasem en. Afta we eria elda i soem video ya, hem i talem se: “Olsem we yu luk long video ya, yu save go long Websaet ya jw.org blong askem wan fri Baebol stadi. Be naoia we mi stap wetem yu, mi save soem long yu olsem wanem blong mekem samting ya.” Sipos man blong haos i glad, eria elda i yusum buklet ya Gud Nius blong soemaot olsem wanem blong stadi Baebol. Sipos man blong haos i bisi, hem i mekem plan blong gobak nekis taem mo tokbaot samting ya. Taem hem i go long wan ples blong dring kofe, hem i stori wetem man we i sidaon klosap long hem. Ale, hem tokbaot sem samting olsem we hem i talem long man blong haos. ?Olsem wanem? ?Yu yu yusum jw.org blong prij?