Yumi Yusum Websaet Blong Yumi Taem Yumi Prij—“Baebol i Ansa”

I gat wan haf long Websaet ya jw.org we i se “Bible Teachings.” Insaed long haf ya, i gat wan haf bakegen we i se “Bible Questions Answered.” Sipos yumi save gud ol kwestin we plante man oli askem, bambae yumi save pulum man blong go stret long Websaet blong yumi blong luk ol ansa we Baebol i givim. Yumi save yusum ol kwestin ya, olsem fastok blong yumi long wok blong prij. Yumi save jusum wan kwestin we plante man long teritori blong yumi oli stap tingbaot. Yumi askem tingting blong man, mo talemaot ol samting we Baebol i talem. Yu yusum ol save we i stap long jw.org blong givhan long yu. Biaen yumi save eksplenem olsem wanem nao, yumi kasem ol save ya. Wan narafala rod hemia blong letem man i ridim ansa blong kwestin blong hem, stret olsem we i stap long Websaet. Woman blong wan eria elda i luk se gudfala frut i kamaot taem hem i talem se: “Plante man oli stap tingbaot se ‘?God nao i stamba blong ol trabol?’ ?Yu wantem save ansa blong kwestin ya, naoia nomo?” Ale, hem i plei long rikoding blong ansa blong kwestin ya, we hem i daonlodem long mobaelfon blong hem. Blong finisim, hem i soem japta 11 blong buk ya Baebol Tijim.