Websaet Ya i Save Givhan Long Yumi Long Wok Blong Prij
Yu Pulum Man i Go Long Websaet Ya: Sam man oli fraet blong toktok wetem ol Witnes blong Jehova, mo oli no wantem tekem ol buk. Be maet oli glad moa blong go long Websaet ya taem oli stap olgeta nomo long haos, blong oli traem save moa ol Witnes mo wok we oli stap mekem. Taswe, yumi mas tekem evri janis blong talemaot Websaet ya long ol man.
Yu Ansa Long Ol Kwestin: Sipos man blong haos, no man we i laekem blong lesin, no wan fren i askem wan kwestin from we hem i wantem save moa long ol wok mo bilif blong ol Witnes blong Jehova, i gud yu yusum mobaelfon no kompiuta blong yu blong ansa long hem. Be taem yu wantem ridim wan vas, i moa gud yu ridim stret long Baebol. Sipos mobaelfon blong yu i no gat Intenet, yu save eksplenem long man olsem wanem hem i save go long jw.org blong faenem ansa blong kwestin blong hem.—Yu luk long “Baebol Tijing/Baebol i Ansa” no “Ol Witnes Blong Jehova/Kwestin We Plante Man i Askem.”
Yu Sanem Wan Haf No Wan Ful Buk i Go Long Man We Yu Save Hem: Sipos yu daonlodem wan buk long fomat ya PDF no EPUB, yu save sanem long imel i go long wan man. Mo yu save daonlodem riding blong wan buk i go long CD. Taem yu sanem wan ful buk, buklet no magasin long wan man we i no baptaes, yu save kaontem buk ya long ripot blong yu. Yu no mas sanem wan buk i go long man we yu no talemaot long hem se yu yu sanem, mo yu no mas sanem plante buk wantaem. Mo tu, yu no mas putum ol samting we yu tekemaot long Websaet ya i go long wan narafala Websaet.—Yu luk long “Ol Buk.”
Yu Soemaot Nius Blong Ol Witnes Blong Jehova: Ol nius ya oli save givhan bigwan long ol man we oli stadi Baebol mo long ol narafala man tu, blong oli luk olsem wanem wok blong prij i stap gohed long fulwol. Mo tu, oli save luk olsem wanem ol man blong Jehova oli joen gud wanples. (Sam 133:1)—Yu luk long “Nius.”
[Diagram long pej 5]
(Lukluk niuspepa)
Yu Traem
1 Yu klik long tok ya “Ol Buk” ale yu jusum weswan buk we yu wantem daonlodem. Mo tu, yu mas jusum se yu wantem daonlodem buk ya long wanem kaen fomat, EPUB, PDF, MP3, no AAC.
2 Taem yu jusum fomat ya “MP3,” wan lis bambae i kamaot. Long lis ya i gat nem blong evri haf blong buk ya. Sipos yu wantem daonlodem, yu klik long nem blong haf we yu wantem. Sipos yu wantem lesin nomo long riding blong wan haf blong buk ya, ale yu klik long ▸ blong lesin long hem.
3 Sipos yu wantem daonlodem wan buk long wan narafala lanwis, yu save jusum lanwis ya long lis we i stap.