!Ol Niufala Singsing Blong Wosip!
1 Long 4 Oktoba 2014, long miting blong Watch Tower Bible and Tract Society of Pennsylvania, we oli stap mekem evri yia, oli talemaot ol plan blong jenisim bakegen singbuk blong yumi. !Hemia wan nius we i nambawan tumas! Miting ya i mekem se evriwan we oli stap long taem ya, oli tingbaot bakegen se, ol singsing blong yumi oli impoten tumas long wosip blong yumi.—Sam 96:2.
2 Maet yu tingbaot se: ‘?From wanem oli mas jenisim singbuk ya bakegen?’ I gat sam risen from wanem oli mekem olsem. Fas risen se, save blong yumi long Baebol i stap gohed blong kam klia moa, mo hemia i save mekem se ol toktok blong ol singsing blong yumi, oli no laenap wetem ol niufala save we yumi kasem. (Prov. 4:18) Wan narafala risen from wanem oli mekem jenis ya, hemia se: Plante long ol toktok we oli stap long singbuk blong yumi naoia, oli kamaot long New World Translation we i stap fastaem. Be naoia ol toktok ya oli mas jenis blong oli laenap wetem New World Translation Baebol we i jes kamaot. Hem i wan bigfala wok blong mekem niufala singbuk ya, taswe oli wantem ademap sam moa niufala singsing long hem.
3 ?Olsem wanem? ?Yumi mas wet kasem taem we niufala singbuk ya i kamaot, nao yumi save stat blong singsing long ol niufala singsing ya? Nogat. Mifala i glad blong talemaot long yufala se long ol manis we oli kam, sam long ol niufala singsing ya bambae oli kamaot long Websaet blong yumi, jw.org. Taem wan niufala singsing i kamaot, bambae oli putum long en blong program blong Miting Blong Kingdom Wok, mo bambae oli makem se “niufala singsing.”
4 ?Olsem Wanem Blong Lanem Ol Niufala Singsing Ya?: I no isi blong lanem wan niufala singsing. Be, olsem man blong raetem sam, yumi wantem singsing bigwan long taem blong miting mo yumi “no save stap kwaet.” (Sam 30:12) Blong lanem wan niufala singsing, i gud yu folem ol rod ya we oli isi nomo.
Yu lesin bakegen mo bakegen long miusik blong niufala singsing ya, we bambae i kamaot long Websaet blong yumi. Taem yu mekem olsem, bambae i moa isi long yu blong tingbaot singsing ya.
Yu stadi long ol toktok blong singsing ya mo yu traem talem ol toktok ya baehat.
Yu mekem miusik i plei, mo yu singsing folem. I gud yu mekem olsem, kasem taem we yu save gud singsing ya.
Long taem blong Famle Wosip i gud yufala i singsing long ol niufala singsing ya plante taem, kasem taem we famle blong yu i save gud.
5 Long ol manis we i kam, taem i gat wan niufala singsing blong singsing long hem long en blong Miting Blong Kingdom Wok, bambae evriwan long kongregesen oli lesin long miusik blong singsing ya fastaem. Biaen, evriwan bambae oli singsing long hem, sem mak olsem we oli stap mekem wetem ol narafala singsing.
6 Taem yumi singsing long ol miting, hemia i mekem yumi glad blong joen wanples mo presem Jehova. Taswe, yumi no mas mekem i kam wan fasin blong yumi blong lego jea blong yumi mo go samples, taem brata i talemaot se bambae yumi mekem wan singsing long taem blong miting.
7 I gat wan narafala gudfala rod we yumi save soemaot se yumi tinghae long ol tabu singsing blong yumi. Long taem blong ol asembli, ol brata oli plei long wan singsing bifo we program i stat. Tu taem long wan yia, ol brata mo sista long ol defren ples long wol, oli yusum mane blong olgeta blong go long Patterson, New York, blong mekem ol naesfala miusik blong yusum blong mekem wosip blong yumi. Taswe taem jeaman blong asembli i askem yumi blong sidaon mo lesin long program blong miusik we i rere finis, i gud we yumi folem advaes ya. Taem yumi mekem olsem, bambae yumi rerem hat blong yumi blong lesin long ol save we bambae oli kamaot biaen.—Esra 7:10.
8 Long en blong miting blong yumi tede, bambae yumi singsing long wan long ol niufala singsing ya, we stamba blong hem se “Kingdom i Rere—Plis Yu Mekem i Kam.” Singsing ya, i jes kamaot long taem blong miting we Watch Tower Bible and Tract Society of Pennsylvania i mekem i no longtaem. Oli wokem singsing ya, blong makem wan handred yia we Kingdom blong God i stap rul.
9 Ol niufala singsing ya oli “ol gudfala samting” we Jehova i givim. (Mat. 12:35, NW) !I gud yumi gat strong tingting blong lanem ol niufala singsing ya mo yumi singsing long ol singsing ya wetem fulhat blong yumi! !Yumi singsing blong presem mo ona long God blong yumi!—Sam 147:1.