Yu Yusumgud Taem Blong Yu Long Wok Blong Prij
Long seves yia blong 2014, ol Witnes blong Jehova oli spenem 1,945,487,604 aoa long wok blong prij. !Hemia wan klia pruf we i soemaot se yumi gat strong tingting, blong stap bisi long wok blong Jehova! (Sam 110:3; 1 Kor. 15:58) Naoia we i “no gat plante taem i stap,” ?olsem wanem yumi save yusumgud ol aoa blong yumi, blong kasem moa man long wok blong prij?—1 Kor. 7:29.
Yumi mas jenisim sam samting, blong mekem se yumi save yusumgud taem blong yumi long wok blong prij. Eksampol. Sipos oltaem yu spenem wan aoa, no plante aoa, long wan haf blong wok blong prij, be yu no storian wetem wan man, i gud yu mekem sam jenis. Olsem nao, bambae yu save faenem plante moa man we oli glad blong storian. Long evri ples, laef blong ol man i stap jenis. Nating se i olsem, ol tingting we oli kam biaen oli save givhan long yu blong yusumgud taem blong yu. Olsem nao, yu no stap ‘sakem han blong yu i go olbaot we yu no kasem man.’—1 Kor. 9:26.
Prij Long Ol Haos Wanwan: Blong plante yia finis, ol pablisa oli folem fasin ya blong prij long ol haos wanwan long moning. Nating se i olsem, plante man oli no stap long haos from we oli wok. Taswe, maet i gud we yu mekem sam jenis blong prij long ol haos wanwan, long aftenun no long sapa, taem ol man oli kambak long haos mo oli spel. Wok blong prij long ol pablik ples mo long ol ofis, maet i save karem gudfala frut taem ol pablisa oli prij long dei.
Prij Long Ol Pablik Ples: Ol pablisa oli mas putum ol tebol mo troli, long ol ples we plante man oli stap pas long hem, long teritori blong kongregesen blong olgeta nomo. (Yu luk Kingdom Wok blong Julae 2013, pej 5, 6.) Sipos i no gat plante man we oli stap pas long ples we ol pablisa oli putum tebol long hem, Seves Komiti blong Kongregesen i save mekem plan blong jenisim, i go long wan narafala ples we i gat plante moa man we oli stap pas long hem.
Mekem Ol Visit Mo Ol Baebol Stadi: Taem i no gat gudfala frut long sam haf blong wok blong prij, maet i gud we yu jenisim program blong yu, blong mekem ol visit mo Baebol stadi, i go long wan narafala taem. Eksampol, sipos wok blong prij long haos wanwan, i karem gudfala frut long Sarede moning, maet yu save jenisim taem blong mekem ol Baebol stadi blong yu long moning, i go long aftenun no long sapa. Taem ol pablisa oli mekem ol visit, maet oli save seraot long ol smosmol grup, blong mekem se oli save mekem moa long wok blong prij.
I tru se, yumi save kaontem hamas aoa we yumi spenem taem yumi prij, be yumi glad moa taem wok we yumi mekem i karem gudfala frut. Sipos yu luk se wan haf blong wok blong prij i no karem gudfala frut long wan taem, i gud yu traem wan narafala haf. Mo tu i gud yu prea long Jehova, we hem nao i “Masta blong garen,” blong hem i lidim yu blong yu save yusumgud taem blong yu long wok blong prij.—Mat. 9:38.