?Yu Yu Save Prij Long Sapa?
1. Folem samting we wan buk i talem, ?wetaem Pol i prij long ol haos wanwan?
1 Wan buk (Daily Life in Bible Times) i talem se aposol Pol i prij long ol haos wanwan “stat long 4 klok long sapa kasem let long naet.” Yumi no save sipos Pol i plan blong mekem olsem, be yumi save se hem i glad blong “mekem ol samting ya from gud nius.” (1 Kor. 9:19-23) Mo hemia i min se hem i finisim ol wok we hem i mas mekem, blong i save go prij long taem we man i stap long haos.
2. ?From wanem i gud blong prij long sapa?
2 Long plante ples, ol pablisa oli prij long ol haos wanwan long moning. ?Be long ples blong yu, wetaem i beswan taem blong prij? Wan paenia i tokbaot teritori we hem i prij long hem, i se: “I had blong faenem ol man long haos blong olgeta long dei. Be bighaf blong ol man oli stap long haos long sapa.” Maet i wan gudfala janis blong talemaot gud nius long ol man, taem yumi prij long sapa. Plante taem ol man oli no bisi long taem ya, mo oli glad blong storian. Sipos i oraet blong mekem olsem, ol elda oli save mekem plan blong gat ol miting blong prij long sapa.
3. ?Yumi soemaot fasin luksave olsem wanem taem yumi prij long sapa?
3 Yu Mas Gat Fasin Luksave: Taem yu prij long sapa, i impoten we yu gat fasin luksave. Sipos yu wantem toktok long wan man, be maet i no wan stret taem from we hem i stap kakae, i moa gud yu talem long hem se bambae yu kambak long wan narafala taem. Sipos ples i tudak, yu mas stanap long ples we man blong haos i save luk yu klia, mo yu talemaot kwiktaem se yu yu hu, mo yu kam blong mekem wanem. I waes blong yu prij wetem wan narafala pablisa, no yu joen wetem wan grup blong prij long sapa. Mo i gud we yufala i prij long ol ples we i gat laet long rod, olsemia yufala i no stap yufala nomo. Yufala i no mas prij let long naet, nao yufala i spolem ol man we oli rere blong slip. (2 Kor. 6:3) Sipos wan ples i no sef blong prij long hem long naet, i gud yufala i go prij long ples ya taem i delaet yet.—Prov. 22:3.
4. ?Wanem ol blesing we oli save kamaot taem yumi prij long sapa?
4 Ol Blesing: Bambae yumi harem gud moa long wok blong prij, sipos yumi faenem man long haos blong hem, mo yumi toktok long hem. Moa we yumi prij long ol man, moa we yumi gat janis blong givhan long olgeta blong ‘God i sevem olgeta, mo oli save trutok blong hem.’ (1 Tim. 2:3, 4) ?Olsem wanem? ?Yu yu save jenisim program blong yu, blong yu save prij long sapa?