Talemaot Gud Nyus—Long Sapa
1 Wan hae pris blong ol man Isrel bifo i talem long sam disaepol blong Jisas Kraes se: “Yufala i mekem we ples ya Jerusalem i fulap finis long ol tok blong yufala.” (Wok 5:28) I klia se ol brata long taem ya oli mekem gud wok blong prij long taon ya. Oli bin wok strong blong traem prij long olgeta evriwan long teritori blong olgeta. Mo oli gohed blong wok strong long wok blong prij long ples ya mo long sam narafala ples.—Wok 8:25.
2 Tede tu, plante ples long wol oli fulap finis long ol trutok. Namba blong ol pablisa i go antap bigwan. Mo namba blong ol kongregesen tu i go antap. Teritori blong ol kongregesen wanwan i stap kam smol moa, mo oli stap finisim ol teritori kwiktaem nomo. Taswe yumi mas mekem teritori blong yumi i kam bigwan moa blong yumi save mekem gud nyus ya i kasem moa man.
FRUT BLONG WOK BLONG PRIJ LONG SAPA
3 Plante pablisa oli luksave se sipos oli prij long sapa, oli save mekem teritori blong olgeta i kam bigwan moa. Long sapa yumi save faenem plante man we yumi no faenem long haos long dei. Sam pablisa oli talem se taem oli prij long sapa, oli faenem man long evri haos. Be i no hemia nomo. Long taem ya ol man oli harem gud moa, mo oli rere blong lesin long mesej blong yumi. Sam seket elda oli bin givhan long sam kongregesen blong ogenaesem wok blong prij long sapa. I gud we ol pablisa oli sapotem wok blong prij long Wenesdei sapa blong visit blong seket elda.
4 ?Yu yu prij finis long sapa long teritori blong yu? Long hot taem, san i slou blong godaon. Long taem ya, yumi save tekem jans blong prij moa, gogo i let lelebet. Yumi save prij long evri haos wanwan long sapa no yumi save visitim bakegen ol haos we fastaem oli no gat man. Mo biaen, ating yumi save mekem sam visit no wan Baebol stadi. Nating we long koltaem tudak i kam kwik, be yumi save yusum sam haoa long sapa blong prij long evri haos wanwan. Tru ya, yumi mas yusum waes tingting mo tingtinggud. Samting ya i tru moa taem yumi prij long ol ples we i no sef long tudak.
TINGBAOT NARAFALA
5 Blong karem gudfala frut long wok blong prij long sapa, yumi mas tingbaot sam samting. Wan samting: Long sam eria, ol man oli fraet long ol strenja we oli visitim olgeta long sapa. Long ol ples olsem, long fas tok blong yumi, yumi mas toktok gud mo talemaot kwik from wanem yumi visitim olgeta. Sipos yumi soemaot se yumi rili tingbaot ol man, ating oli no fraet, mo ating bambae oli glad blong talemaot tingting blong olgeta.
6 Long sam ples, ol man oli mekem sam samting blong gadem haos blong olgeta mo blong oli stap sef gud. Yumi mas respektem samting ya. Olsem ya nao, maet man ya i agri blong lesin long trutok we yumi wantem talem long hem.
7 Plante kongregesen oli mekem program blong prij long sapa long wan no tu dei evri wik. Plan ya i givim moa jans long ol pablisa we oli wok fultaem blong joen long wok blong prij. Mo oli save wok wetem sam pablisa we neva oli gat jans blong wok wetem olgeta bifo, from we program blong wok blong olgeta i defren. Wok blong prij long sapa i bin mekem se sam pablisa oli save spenem moa taem long wok blong prij. Mo samting ya i givhan long olgeta blong oli gat gudhan long wok blong talemaot gud nyus long ol narafala. Mo tu, oli bin statem plante nyufala Baebol stadi from we oli mitim plante man we bifo oli no lesin long ol Wetnes blong Jeova.
8 ?Yu ting se yu save joen long wok blong prij long sapa? ?Yu yu save harem gud long narafala jans ya blong “mekem wok ya blong talemaot gud nyus”? (2 Tim. 4:5) Sipos sam moa long yumi i save ansa yes long kwestin ya, ating yumi tu bambae yumi mekem trutok i kam fulap moa long teritori blong yumi.