?Yu Yu Save Jenisim Program Blong Yu?
1. ?From wanem yumi mas rere blong jenisim program blong yumi blong prij?
1 Yumi ol trufala Kristin, yumi bin agri taem Jisas i singaotem yumi blong kam “man blong pulum man.” (Mat. 4:19) Olsem ol man blong pulum fis, yumi save kasem gudfala frut long wok blong pulum man sipos yumi prij long taem we ol man oli stap long haos blong olgeta. Long plante ples, delaet bambae i kam moa longfala long ol manis we i stap kam. Long let aftenun mo long sapa, i gat plante moa man oli stap long haos. Plante taem, oli no bisi tumas mo oli glad moa blong welkamem ol man we oli kam long haos blong olgeta. ?Yu yu save jenisim program blong yu blong yu save prij long ol taem olsem?—1 Kor. 9:23.
2. ?Wanem sam rod we i save givhan long yumi blong kasem moa man wetem gud nius?
2 Prij Long Sapa: Taem yumi mekem plan fastaem blong prij long sapa, hemia i save givhan long yumi blong talemaot gud nius long plante moa man. (Prov. 21:5) Ol yangfala oli save prij afta long skul. Ol narafala oli save mekem olsem afta long wok. Sam grup blong buk stadi oli save mekem plan blong prij wan aoa bifo long Buk Stadi evri wik.
3. ?Long ples blong yu, wanem ol fasin blong prij we yu save mekem long let aftenun mo long sapa?
3 Taem yumi prij long ol haos wanwan long let aftenun no long sapa, yumi save toktok long olgeta we yumi no save faenem long ol narafala taem long dei. Long plante ples, ol pablisa oli save folem sam narafala fasin blong prij long pablik ples long sapa, olsem prij long rod. Mo plante pablisa oli luk se beswan taem blong mekem ol visit mo statem ol Baebol stadi, hemia long sapa.
4. ?From wanem i impoten blong gat fasin luksave mo blong tingbaot narafala taem yumi prij long sapa?
4 I Nidim Fasin Luksave: Yumi nidim fasin luksave taem yumi prij long sapa. Plante taem i moagud blong prij long let aftenun i bitim we yumi go long haos blong ol man long naet, taem oli stap rere blong slip. (Fil. 4:5, NW ) Taem yu noknok long doa, i gud blong stanap long ples we man blong haos i save luk yu, mo talemaot klia se yu yu hu. Talemaot kwiktaem risen from wanem yu kam long haos blong olgeta. Sipos yu kam long wan taem we i no stret, olsem taem oli stap kakae, talem long olgeta se bambae yu kambak long wan narafala taem. Oltaem yu mas tingbaot ol narafala.—Mat. 7:12.
5. ?Olsem wanem yumi save blokem denja taem yumi stap prij?
5 Yumi mas tingbaot ol denja tu. Sipos yu stap prij taem ples i tudak, i waes blong yu wokbaot wetem wan narafala no wetem wan grup. Wokbaot long rod we i gat laet long hem mo we i gat ol narafala man long hem. Prij nomo long ol ples we yu harem se yu sef long hem. Yu no mas prij long ol ples we oli no sef taem ples i tudak.—Prov. 22:3.
6. ?Wanem sam blesing we i save kamaot taem yumi prij long let aftenun mo long sapa?
6 Prij long let aftenun mo long sapa i givim janis long yumi blong prij wetem ol fultaem mo haftaem paenia. (Rom 1:12) ?Yu yu save jenisim program blong yu blong yu save prij long taem ya?