Yumi Save God Tru Long Ol Profet Blong Hem
Long taem bifo, God i givim sam impoten mesej long ol profet blong hem, blong oli talemaot long ol man. ?Ol mesej ya oli save halpem yumi blong kasem blesing blong God? Yes. I gud yumi luk samting we yumi save lanem tru long tri profet blong God.
EBRAHAM
God i mekem i sem mak long olgeta man mo i wantem blesem olgeta
God i promes long profet Ebraham se: “Mi bambae mi yusum yu blong blesem ol man blong olgeta narafala kantri long wol.”—Jenesis 12:3.
?Yumi lanem wanem? God i lavem yumi tumas mo i wantem blesem olgeta famle, hemia ol man, ol woman, mo ol pikinini, we oli obei long hem.
MOSES
God i gat sore mo i blesem olgeta we oli traehad blong save hem.
God ya we i gat Olgeta Paoa, i givim paoa long profet Moses, blong i mekem ol bigfala merikel. Be yet, Moses i prea i go long God se: “Plis yu tijim mi long ol fasin blong yu, blong mi save mekem ol wok blong yu, mo blong mi save stap mekem yu yu glad long mi olwe.” (Eksodas 33:13) God i glad tumas long samting we Moses i askem nao i blesem hem, i mekem Moses i kasemsave long ol rod mo ol fasin blong Hem. Eksampol, Moses i lanem se Krieta i wan ‘God we i gat sore long man, mo i stap givhan long man long gladhat blong hem.’—Eksodas 34:6, 7.
?Yumi lanem wanem? God i wantem blesem yumi evriwan, ol man, ol woman, mo ol pikinini, sipos yumi traehad blong savegud hem. Long Baebol, hem i soem olsem wanem blong wosipim hem, mo se hem i wantem tumas blong blesem yumi.
JISAS
Jisas i gat sore nao i hilim ol man we oli gat defren kaen sik
Yumi save haremgud olwe long ol blesing blong God sipos yumi save Jisas mo ol samting we hem i mekem mo i tijim.
Long Baebol, yumi save lanem plante samting long laef mo tijing blong Jisas. God i givim paoa long hem blong i mekem plante merikel, olsem i hilim blaenman, wetem man we sora blong hem i fas, mo man we i no save wokbaot. Mo hem i mekem dedman tu i laef bakegen. Long rod ya, Jisas i soemaot ol blesing we God bambae i mekem long ol man long fiuja. Jisas i eksplenem samting we yumi wanwan i save mekem, blong kasem ol blesing ya, i se: “Mo laef ya we i no save finis, hemia se man i save yu we yu nomo yu tru God, mo i save Jisas Kraes we yu yu sanem hem i kam.”—Jon 17:3.
Jisas i gat sori, i gat lav mo i kaen long ol man. Taswe ol man mo ol woman, ol yangfala mo ol olfala, oli no fraet blong kam long hem taem hem i talem olgeta se: “Yufala i lan long mi, from we mi mi wan kwaet man mo tingting blong mi i stap daon, nao bambae yufala i save harem gud long laef blong yufala.” (Matiu 11:29) Ol man long taem blong Jisas oli stap tritim nogud ol woman, be Jisas i no olsem, hem i kaen long ol woman, i ona, mo i respektem olgeta.
?Yumi lanem wanem? Jisas i soem bigfala lav long ol man, mo i soem wan nambawan eksampol we yumi save folem, blong mekem i gud long ol narafala.
JISAS I NO GOD
Baebol i talem se: “Yumi save se i gat wan God nomo,” mo se Jisas Kraes i mesenja blong God we i gat tingting daon. (1 Korin 8:6) Jisas i talem klia se God i hae moa long hem, mo se God nao i sanem hem i kam long wol.—Jon 11:41, 42; 14:28.a
a Blong save moa long saed blong Jisas Kraes, yu luk haf 8 mo haf 9 long buklet ya Real Faith—Your Key to a Happy Life we i stap long www.jw.org.