Yu Save Givhan Long Olgeta We Oli No Moa Gohed

Evri yia, plante brata mo sista we oli no moa gohed, oli stap kam long Memoriol. Oli bin stat blong ron long resis ya blong kasem laef, be sam samting i hapen we i mekem se oli no moa gohed. Buklet ya Kambak Long Jehova, i tokbaot sam long ol samting ya. (Hib 12:1) Nating se i olsem, Jehova i tinghae yet long olgeta from we hem i pemaot olgeta long blad blong Pikinini blong hem. (Wok 20:28; 1Pi 1:18, 19) ?Olsem wanem yumi save givhan long olgeta blong oli gohed gud bakegen?

Ol elda oli traehad blong lukaotem mo halpem olgeta we oli no moa gohed, sem mak olsem wan man blong lukaotem sipsip i wok had blong lukaotem ol sipsip we oli lusum rod. (Lu 15:4-7) Fasin ya i soemaot se Jehova i lavem ol man blong hem, mo i kea long olgeta. (Jer 23:3, 4) Be yumi evriwan i save givhan long olgeta, i no ol elda nomo. Taem yu traehad blong soem se yu sore mo kaen long olgeta, yu mekem Jehova i glad tumas, mo bambae yu tu yu glad. (Pro 19:17; Wok 20:35) !Taswe, i gud yu tingbaot wan brata o sista olsem, mo yu kwik blong givhan long hem!

WAJEM VIDEO YA GIVHAN LONG OLGETA WE OLI NO MOA GOHED, MO BIAEN YU ASKEM OL KWESTIN YA:

• ?Wanem faswan samting we Abbey i mekem taem hem i mitim wan Witnes we hem i no save?

• Sipos yumi stap tingting blong givhan long wan we i no moa gohed, ?from wanem i gud we yumi go luk ol elda fastaem?

• ?Abbey i rere olsem wanem bifo we hem i go visitim Laura bakegen?

• ?Olsem wanem Abbey i soemaot longfala tingting, lav mo strong tingting taem hem i givhan long Laura?

• ?Yumi lanem wanem long pijatok blong Jisas long Luk 15:8-10?

• ?Wanem ol blesing we oli kamaot from ol hadwok we Abbey i mekem blong halpem Laura?