LAEF BLONG OL KRISTIN

Wan Niufala Samting Long Miting Blong Medel Wik

Stat long Jenuware 2018, bae i gat ol not blong stadi long New World Translation of the Holy Scriptures (nwtsty) we i blong stadi. Bae yumi stat yusum long ol miting blong medel wik, nating sipos i nogat yet long lanwis blong yu. Bae ol save ya i givhan bigwan long yu blong rerem gud ol miting. Samting we i impoten moa se, bae i mekem yu kam klosap moa long Papa blong yumi, Jehova, we i lavem yumi tumas.

OL NOT BLONG STADI

Long ol not blong stadi i gat ol save blong ol kalja, ol ples, mo ol save long saed blong ol lanwis we oli stap long plante vas blong Baebol.

Matiu 12:20

Wik blong laet we faea blong hem klosap i ded: Laet we ol man long faswan handred yia oli yusum, hem i wan smol graonpot we i gat oel blong oliftri long hem. Mo i gat wan wik long hem we i stap pulum oel i go antap blong laet i save stap laet. Maet Grik tok ya “wik blong laet we faea blong hem klosap i ded” i minim wan wik we i mekem smok from we laet blong wik ya i stap laet yet be faea blong hem klosap i ded. Profet tok blong Aesea 42:3 i talemaot se bae Jisas i gat sore long ol man. Bae hem i no save mekem se smol hop blong ol man we ol narafala oli stap spolem olgeta mo olgeta we oli gat tingting daon i lus.

Matiu 26:13

Tru: Grik tok ya, a·menʹ, hem i sem Hibru tok ya ʼa·menʹ, we i minim “i mas olsem,” o “i tru.” Jisas i yusum toktok ya oltaem long stat blong wan toktok, wan promes, o wan profet tok, blong soemaot se samting we hem i talem i tru mo i stret. Sam man oli talem se fasin blong Jisas blong yusum tok ya “tru” o amen, i mekem se ol buk blong Gospel i defren long ol narafala buk blong Baebol. Samtaem, Jisas i talem tok ya tu taem (a·menʹ a·menʹ) olsem hem i mekem long Gospel blong Jon, blong mekem se tok blong hem i gat moa paoa.

PIJA MO VIDEO

Ol foto, ol pija, ol video, mo ol katun we man i droem oli soemaot plante samting we i stap long Baebol.

Betfas, Hil Blong Oliftri, Mo Jerusalem

Sotfala video ya i soem wan rod we i pas long wan vilej blong naoia we nem blong hem et-Tur. Hem i sem vilej ya Betfas we Baebol i tokbaot, mo rod ya pas long is blong Jerusalem. Rod ya i go kasem bigfala hil ya we nem blong hem Hil blong Oliftri. Betani i stap long is blong Betfas mo long is saed blong Hil blong Oliftri. Taem Jisas i stap long Jerusalem, oltaem hem mo ol disaepol blong hem oli slip long Betani, we tede hem i taon blong el-ʽAzariyeh (El ʽEizariya). Nem blong taon ya i wan Arabik nem we i minim “Ples blong Lasaros.” Maet oltaem Jisas i stap long haos blong Mata, Meri mo Lasaros. (Mt 21:17; Mak 11:11; Luk 21:37; Jon 11:1) Taem hem i aot long haos blong olgeta blong go long Jerusalem, maet hem i folem rod ya nao we video i soem. Long namba 9 blong manis Nisan long yia 33 Kristin Taem, Jisas i klaem long wan yang dongki long hil blong Oliftri blong go long Jerusalem, maet long taem ya tu hem i folem rod blong Betfas we i go kasem Jerusalem.

Rod We i Stat Long Betani Kasem Betfas
Betfas
Hil Blong Ol Oliftri
Hil Blong Kedron
Hil We Tempol i Stap Long Hem

Wan Nil We i Stap Long Bun Blong Leg

Hemia foto blong wan bun blong baksaed blong leg we oli nilim wan nil i go tru long hem. Nil ya hem i 11 sentimeta. Oli faenem bun ya long yia 1968, taem ol man oli digim graon long not blong Jerusalem. Hem i wan bun blong wan man long taem blong ol man Rom. Bun ya i soemaot se ol man long taem blong Baebol oli yusum ol nil blong nilim ol man i go long wan pos. Maet nil ya i sem mak long ol nil we ol soldia blong Rom oli yusum blong nilim Jisas Kraes long pos. Oli faenem bun ya insaed long wan bokis blong ston, we nem blong hem ossuary. Oli yusum ol bokis olsem blong putum ol bun blong ol man we oli hangem olgeta long pos afta we ol mit blong olgeta oli folfoldaon. Hemia i soemaot se samtaem oli karemaot ol man long pos blong go berem olgeta.—Mt 27:35.