?Yu Save Lanem Wanem Long Ol Original Singsing?

?Yu yu laekem weswan original singsing? ?From wanem? ?Yu yu makem se ol video blong ol original singsing ya oli soem samting we i stap hapen long laef blong yumi evridei? I gat defdefren stamba tok mo stael blong miusik we yumi evriwan i save haremgud long olgeta. Nating se i olsem, oli no wokem ol original singsing mo ol miusik video blong yumi haremgud nomo.

Oli wokem ol original singsing blong tijim yumi long ol impoten lesen we yumi save folem long laef blong yumi, mo long wok blong prij. Sam singsing oli tokbaot fasin blong singaot narafala i kam long haos, fasin joengud, fren, strong tingting, lav, o bilif. Mo sam hem i long saed blong kambak long Jehova, fogivim narafala, holem strong long Jehova evridei, mo putum ol mak long saed blong spirit. Mo tu i gat wan original singsing we i tokbaot se yumi mas skelemgud fasin blong yusum mobaelfon. ?Wanem sam narafala lesen we yu save lanem long ol original singsing?

WAJEM VIDEO BLONG ORIGINAL SINGSING YA KLOSAP BAMBAE I KAMTRU, MO BIAEN YU ANSA LONG OL KWESTIN YA:

• ?Wanem ol blesing blong fiuja we tufala olfala ya i stap tingbaot?​—Je 12:3

• ?Olsem wanem blong mekem bilif blong yumi i strong moa se Jehova i save mekem ol promes blong hem oli kamtru?

• ?Wanem blesing we klosap nao bambae i kamtru?

• ?Olsem wanem hop ya blong Kingdom i halpem yumi blong stanap strong tru long ol trabol we yumi gat naoia?​—Ro 8:25