Lukaot Blong No Spredem Ol Giaman Stori

Tede, ol man oli save kasem infomesen kwiktaem tru long niuspepa, radio, TV, mo Intenet. Olgeta we oli wosipim “God blong trutok,” oli no wantem nating blong spredem infomesen we i no tru, mo oli lukaot gud tu blong no mekem olsem. (Sam 31:5, NW; Eks 23:1) Ol giaman stori we i pas i go long nara man i save spolem man. Taem yu stap traem blong faenemaot sipos wan stori i tru o nogat, i gud yu askem se:

• ‘?Stori ya i kamaot long wan man we mi trastem?’ Man we i talem stori ya, maet i no gat evri infomesen. Mo plante taem ol man oli jenisim stori smol taem oli talem long ol narafala, taswe yumi mas lukaot gud taem yumi no save stret se hu i statem stori ya. Olgeta we oli gat wok long kongregesen, oli mas lukaot gud blong no pasem ol infomesen we i no gat pruf blong hem, from we ol narafala oli trastem ol tok blong olgeta

• ‘?Stori ya i spolem gudnem blong wan man?’ Sipos stori ya i mekem ol narafala oli stat blong lukluk nogud long wan man o grup, i moa gud yumi no talem stori ya long narafala.—Pro 18:8; Fil 4:8

• ‘?I stret blong bilivim stori ya?’ Yumi mas lukaot gud taem yumi harem ol stori mo ekspiriens we oli mekem man i sek

WAJEM VIDEO YA ?OLSEM WANEM BLONG STOPEM GOSIP? MO ANSA LONG OL KWESTIN YA:

• 

  Folem Ol Proveb 12:18, ?tok we man i talem i save mekem wanem long narafala?

• 

  ?Olsem wanem Filipae 2:4 i halpem yumi blong skelemgud ol samting we yumi talem long saed blong ol narafala?

• 

  ?Yumi save mekem wanem taem ol man oli stat blong jik o talem sam nogud samting long saed blong narafala?

• 

  Bifo we yumi stat blong tokbaot narafala, ?wanem ol kwestin we yumi mas askem yumi wan?