!Lukaot Long Ol Denja Taem Yu Yusum Internet!

¹ Ol man blong Jeova oli laekem blong kampani tugeta. Oli glad blong serem ol ekspiryens blong wok blong prij mo oli laekem harem stori blong samting we i hapen long ol Witnes blong Jeova mo wok blong Kingdom raonabaot long wol. Oli laekem kasem nius blong eni samting we i hapen long ol brata blong olgeta, olsem wan trabol no disasta, mo oli wantem save sipos i gat rod blong oli givim help blong olgeta. Intres ya we oli gat long olgeta i soemaot se oli joengud olsem ol brata sista. Hemia i pruvum se oli rili gat lav long olgeta.​—Jon 13:34, 35.

² Tede, nius blong ol samting we oli hapen long wol i stap kasem yumi kwiktaem. Radyo mo televisin i talemaot evri haf blong ol samting we oli hapen long ful wol. Mo tu, telefon i mekem man i save toktok kwiktaem wetem narafala man long eni ples long wol. Mo naoia i gat wan niufala tul we man i yusum blong toktok tugeta mo we naoia i kam antap bigwan, hemia Internet.​—Lukluk Wekap!, Julae 22, 1997 long Engglis no Franis.

³ Taem bifo ol man oli stat blong yusum telefon, samting ya i openem rod blong oli toktok wetem eni man, kwiktaem nomo, long eni ples long wol. Nating se telefon i givhan gud long man, man i mas lukaot gud long fasin we hem i yusum telefon from we hem i wan samting we sam man oli yusum blong toktok wetem man blong mekem nogud plan no fasin, mo tu, sipos man i yusum telefon bitim mak, hem i save pem bigfala mane from. Televisin mo radyo oli save givhan bigwan long ol wok olsem edukesen. Be, sore tumas from we bighaf blong ol program we oli pastru long tufala rod ya, oli fulap long kruked fasin, mo man we i stap intres long ol samting ya i save westem fulap taem. Waes fasin i mas pulum yumi blong jusumgud ol program taem yumi yusum televisin mo radyo.

⁴ Internet i wan rod we i no sas mo i givhan long man blong toktok wetem plante milyan narafala man long wol. Man i save lanem plante samting tru long rod ya. (Wekap!, Janewari 8, 1998, Engglis no Franis) Be, man we i yusum Internet i save stap long denja long saed blong spirit mo gudfala fasin. ?Olsem wanem samting olsem i save hapen?

⁵ Ol man oli wari lelebet from we long Internet i isi nomo blong kasem ol save long saed blong fasin blong wokem ol tul blong faet, olsem ol bom. Sam bigfala kampani oli komplen from we ol man blong wok blong olgeta oli westem fulap taem blong yusum Internet. I gat plante toktok i kamaot long ol buk blong yumi we oli soemaot se Internet i save spolem yumi long saed blong spirit. Plante program insaed long Internet oli soem ol samting we oli sapotem raf fasin mo fasin nogud long saed blong seks, hemia ol samting we i no stret nating long wan Kristin man blong lukluk. (Sam 119:37) Antap long ol denja ya, i gat wan narafala denja we i haed gud. Ol Witnes blong Jeova oli mas lukaot gud moa long denja ya. ?Wanem denja ya?

⁶ ?Yu yu rere blong tekem eni man i kam long haos blong yu we yu no faenemaot fastaem se man ya i hu? ?Olsem wanem sipos i no gat rod blong faenemaot fasin blong hem? ?Bambae yu save letem hem i stap hem wan wetem ol pikinini blong yu? Hemia samting we i save hapen long saed blong Internet.

⁷ Tru long kompyuta, yu save sanem mesej i go long eni man, mo eni man i save sanem mesej i kam long yu. Hemia i sem mak taem yu yusum ol spesel rod long kompyuta we oli kolem forum no chat room. Long ol ples olsem yu save toktok wetem enikaen man. Sam man we oli storeyan wetem yumi, oli save talem se oli Witnes blong Jeova, be plante taem oli giaman nomo. Sam man oli save talem se oli yangfala, be maet oli olfala. Man i save talem eni samting long saed blong hem wan, we i giaman nomo.

⁸ Maet yu kasem sam mesej we oli tokbaot sam ekspiryens, no oli givim sam toktok long saed blong ol bilif blong yumi. Ale yumi save pasem mesej ya i go long narafala man, we biaen, hem tu bambae i pasem i go long narafala man bakegen. Plante taem i no gat rod blong jekem sipos ol mesej ya oli tru no oli giaman. Ol mesej ya maet oli wan rod we ol man blong apostasi oli stap yusum blong pasem tingting blong olgeta i go olbaot.​—2 Tes. 2:​1-3.

⁹ Taem yu tingbaot se denja ya i stap taem yu yusum Internet, ale, askem long yu wan se: ‘?Mi stap yusum Internet blong mekem wanem? ?Bambae mi spolem bilif blong mi wan sipos mi yusum samting ya? ?Maet mi stap givhan long wan man blong i spolem bilif blong narafala, nao oli kam slak long saed blong spirit?’

¹⁰ Web Sites of “Jehovah’s Witnesses”: Eksampel, tingbaot sam program long Internet we sam man we oli talem se oli Witnes blong Jeova, oli stanemap. Oli singaot yu blong lukluk program ya blong olgeta, blong ridim sam ekspiryens blong narafala man we oli talem se oli Witnes. Oli askem yu blong talem tingting blong yu long saed blong sam buk blong Sosaeti. Samfala oli raetem ol defren fastok we yu save yusum long wok blong prij. Long ol program ya i gat ol chat room we wanwan man i save yusum blong toktok wetem narafala, hemia wan rod we i sem mak long telefon. Plante taem oli letem yu yu save long sam narafala program blong Internet we yu save yusum blong fren wetem ol Witnes blong Jeova raon long wol. Be, ?yu yu sua se ol adres ya oli no wan plan blong ol man blong apostasi nomo?

¹¹ Fasin blong yusum Internet blong fren wetem narafala maet i no laenap nating wetem advaes we i stap long Efesas 5:​15-​17. Aposol Pol i raetem se: “Yufala i mas lukaot gud long ol fasin blong yufala. Bambae yufala i no mekem fasin blong man we i no gat hed. Yufala i mas mekem fasin blong man we i waes. Yufala i mas yusum evri janis we yufala i kasem blong mekem ol gudfala wok, from we naoia, ol fasin nogud oli gat paoa. Bambae yufala i no krangke. Yufala i mas traem save olgeta samting we Masta blong yumi i wantem blong yufala i mekem.”

¹² Folem tiokratik oda, Kristin kongregesen i kasem kakae blong hem long saed blong spirit, tru long “slef we i stret mo waes.” (Mat. 24:45-​47, NW) Insaed long ogenaesesen blong God yumi kasem advaes we i halpem yumi blong stap longwe long wol ya. Long ogenaesesen ya, yumi kasem strong tingting we i pusum yumi blong bisi oltaem long wok blong Masta. (1 Kor. 15:58) Man blong raetem Sam i talem se hem i kasem glad mo i harem se hem i sef gud taem hem i stap long medel blong kongregesen blong ol man blong God. (Sam 27:​4, 5; 55:14; 122:1) Mo tu, kongregesen i sapotem ol man we oli nidim help long saed blong spirit. Insaed long hem, yu save faenem ol fren we oli gat lav, oli kea, mo oli rili intres long yu​—oli ol man we yu savegud olgeta, we oli rere mo we oli wantem halpem narafala mo leftemap tingting blong narafala long taem blong trabol. (2 Kor. 7:​5-7) Ol memba blong kongregesen oli stap longwe long trabol from advaes ya blong Baebol we i talem se yumi mas putumaot olgeta we oli sin mo we oli no wantem tanem tingting blong olgeta, mo olgeta we oli leftemap tingting blong apostasi. (1 Kor. 5:​9-​13; Taetas 3:​10, 11) ?Yu ting se yu save faenem ol semfala samting taem yu fren wetem ol narafala tru long Internet?

¹³ I kam klia se, yu no save faenem semfala samting long Internet. Ol program blong Internet oli olsem ol gudfala tul we ol man blong apostasi oli stap yusum blong leftemap ol tijing blong olgeta. Maet ol man we oli yusum ol program ya oli raetem plante toktok blong pruvum se oli rili Witnes blong Jeova. Maet oli askem yu tu blong yu pruvum sipos yu yu rili wan Witnes blong Jeova.

¹⁴ Jeova i wantem se yu soem fasin luksave. ?From wanem? From we hem i save se fasin ya bambae i lukaot gud long yu blong no foldaon long denja. Fastok blong Ol Proveb 2:​10-​19 i talem se: “Nao bambae yu save kam waes, mo waes ya blong yu bambae i save mekem yu yu harem gud. Fasin ya we yu luksave ol samting, mo we yu savegud ol mining blong hem, hem bambae i stap lukaot long yu, mo bambae i stap blokemgud yu.” ?Blokem yu long wanem? Long ol “fasin nogud,” ol man we oli lego stret rod, mo ol man we oltaem oli folem ol rabis tingting mo fasin.

¹⁵ Taem yumi go long Haos Kingdom, i klia se yumi stap wetem ol brata blong yumi. Yumi save gud olgeta. I no gat man we i nidim pruf blong soemaot samting ya from we lav bitwin ol brata i naf blong pruvum samting ya. Yumi wanwan i no nidim blong soem wan pepa blong pruvum se yumi rili wan Witnes blong Jeova. Hem i long Haos Kingdom we yumi faenem trufala fren blong leftemap tingting blong yumi olsem we Pol i bin tokbaot long Hibrus 10:24, 25. Yumi no save kasem samting ya tru long ol program blong Internet we oli pulum yumi blong fren wetem narafala man. Sipos yumi tingbaot ol tok blong Ol Sam 26:4, 5, samting ya i save givhan long yumi blong blokem ol denja we oli save kamaot taem yumi yusum ol program blong Internet.

¹⁶ I no gat samting we i save blokem man blong kasem ol defren kaen infomesen we oli stap insaed long Internet. Plante taem, ol raf fasin mo nogud samting we oli stap long Internet oli gat moa paoa long ol pikinini mo ol yangfala. Ol pikinini oli trastem eni man, oli intres long evri samting, mo oli wantem faenemaot moa long saed blong wol ya we i olsem wan niufala samting long olgeta. Mo tu, oli intres long ol pija mo narakaen samting we oli stap long kompyuta. Taswe ol papa mama oli nidim blong lukaot gud long ol pikinini blong olgeta mo yusum Baebol blong lidim olgeta long stret rod blong yusum Internet. Hemia i sem mak long ol advaes we papa mama i save givim long pikinini blong olgeta blong oli jusum gud ol myusek mo film blong olgeta.​—1 Kor. 15:33.

¹⁷ Sore tumas, ol kongregesen oli bin putumaot sam brata mo sista blong yumi finis, from we oli stat blong joen wetem ol man blong wol we oli mitim tru long ol chat room long Internet mo biaen oli mekem nogud fasin long saed blong seks. Ol elda we oli sapraes tumas long nogud frut we i kamaot from Internet, oli raetem leta blong talemaot se sam brata mo sista oli bin lego hasban no waef blong olgeta blong go wetem narafala man mo woman we oli bin mitim fastaem long Internet. (2 Tim. 3:6) Sam narafala oli bin lego trutok from we oli ridim toktok blong ol man blong apostasi. (1 Tim. 4:1, 2) Taem yumi tingbaot ol nogud frut ya we oli kamaot, ?yu no ting se i stret nomo blong lukaot gud long fasin blong joen long ol chat room long Internet? I klia se, yumi save stap sef gud sipos yumi kasem waes, save, gudfala tingting, mo fasin luksave we Ol Proveb 2:​10-​19 i tokbaot.

¹⁸ Yumi luk se plante man lelebet oli bin wokem prapa Web sites blong olgeta, olsem wan ples blong talemaot gud nius long olgeta man. Ol brata we oli givim mane blong olgeta blong sapotem ol program olsemia oli no rili soem waes fasin. Samtaem ol man blong apostasi nao, oli givim mane blong statem sam Web sites olsem, blong pulum man we oli no gat save long samting ya. (2 Jon 9-​11) Kingdom Wok blong Novemba 1997, long pej 3, i tokbaot sipos ol brata oli nidim blong putum sam toktok long Internet long saed blong wok blong yumi no nogat. Hem i se: “I no gat nid blong rerem sam toktok blong putum long Internet, long saed blong ol Witnes blong Jeova, wok blong yumi, no bilif blong yumi. Sosaeti i gat wan ples finis [we adres blong hem www.watchtower.org] long Internet we i givim ol stretfala infomesen long eni man we i wantem save long saed ya.”

¹⁹ ?Help Blong Stadi Tru Long Internet? Samfala maet oli gat tingting se oli givhan long ol brata taem oli putum sam infomesen we oli faenem long saed blong ol tiokratik wok, i go long kompyuta. Eksampel, wan brata maet i stadi hem wan blong faenem moa save long saed blong wan pablik tok we hem i mas givim long kongregesen. Ale, ol save we hem i faenem, hem i putum i go long kompyuta wetem tingting se, long rod ya, ol narafala brata we oli mas rerem semfala pablik tok ya, bambae oli save yusum sam long ol infomesen we hem i faenem. Sam narafala brata maet oli putum olgeta vas we oli laenap wetem Stadi blong wan Wajtaoa we bambae i kam, long kompyuta, no maet oli givim sam infomesen long saed blong wan tok we i stap long Tiokratik Skul no Kongregesen Buk Stadi. Sam narafala maet oli givim tingting blong olgeta long saed blong sam gudfala rod blong prij. ?Ol samting ya oli rili save halpem narafala?

²⁰ Ol buk mo narafala tul we ogenaesesen blong Jeova i givim, oli mekem yumi tingtinggud long ol stret samting, mo oli trenem yumi blong “jusumaot wanem fasin i gud mo wanem fasin i nogud.” (Hib. 5:​14) Bambae yumi no save mekem olsem, sipos yumi letem narafala i mekem stadi mo i faenemaot samting long ples blong yumi.

²¹ Ol Kristin man long Berea oli “glad moa blong tingbaot ol tok blong [Pol mo Saelas] i winim ol man Tesalonaeka.” ?From wanem? From we “oli wantem tumas blong harem tok blong tufala, mo evri dei, oli stap ridimgud ol tok blong Baebol, blong faenemaot se ol tok blong tufala i tru no i no tru.” (Wok 17:11) Nating se Pol mo Saelas tufala i prij long ol man ya, trutok i no save gat paoa long laef blong olgeta sipos olgeta wanwan oli no traehad.

²² Sipos yu stap mekemrere wan tok no wan pat blong wan miting, mo yu yusum infomesen we narafala nomo i faenem, yu mekem se fasin blong stadi yu wan i olsem nating nomo. ?Ating yu wantem bildimap yu wan mo mekem bilif mo tingting blong yu long Tok blong God i strong moa? Ale, yu wan yu mas luksave wanem i tru, blong bambae yu naf blong talemaot bilif blong yu long ol tok we yu givim, long ol ansa we yu mekem long miting, mo long wok blong prij. (Rom 10:10) Taem yumi yusum infomesen we narafala man i faenem, i no olsem. Samting ya i no laenap wetem toktok we i stap long Ol Proveb 2:​4, 5, se yumi wanwan i mas ‘traehad blong kasem waes ya, olsem we yumi traehad blong faenem silva, no wan narafala samting olsem, we man i bin berem.’

²³ Eksampel, taem yu jekemap ol vas long prapa Baebol blong yu, yu save jekemap kwiktaem ol tok we oli stap raonabaot long vas ya. Yu save ‘luklukgud long olgeta samting ya,’ olsem we Luk i mekem taem hem i raetem Gospel blong hem. (Luk 1:3) Traehad we yu yu mekem bambae i halpem yu tu blong gat gudhan blong faenem ol vas blong Baebol long wok blong prij mo taem yu givim ol tok. Plante man oli talem se oli sapraes long ol Witnes blong Jeova from we oli save gud olsem wanem blong yusum Baebol. Wan rod nomo blong gat gudhan long saed ya, hemia sipos yumi wanwan i traehad blong lukaot ol vas long Baebol blong yumi.

²⁴ Yusum Taem Long Waes Fasin: Wan narafala samting blong tingbaot long saed ya, hemia hamas taem we yumi spenem blong wokem, ridim, mo jekem ol infomesen we oli stap long Internet. Ol Sam 90:12 i leftemap tingting blong yumi blong prea olsem: “Plis yu mekem mifala i save we laef blong mifala i sotfala nomo, blong mifala i save kam waes.” (1 Kor. 7:​29) Mo wan narafala vas i talem se: “From samting ya, oltaem, sipos yumi gat janis, yumi mas mekem i gud long olgeta man. Antap moa, yumi mas mekem olsem long olgeta ya we oli brata mo sista blong yumi from we olgeta tu oli bilif long Kraes.”​—Gal. 6:​10.

²⁵ Advaes ya i soemaot klia long yumi se yumi nidim blong wajem gud fasin blong yusum taem blong yumi. !I moa gud sipos yumi spenem taem blong ridim Tok blong God! (Sam 1:1, 2) !Hemia beswan fren we yumi save gat! (2 Tim. 3:​16, 17) Papa mama, ?yufala i stap tijim pikinini blong yufala blong oli waes gud blong yusum taem blong olgeta long ol wok blong Kingdom? (Pri. 12:1) Taem we yumi spenem blong mekem stadi blong yumi wanwan mo famle Baebol stadi, kam long ol miting, mo joen long wok blong prij, i gud moa i winim olgeta gudfala samting we maet yumi ting se bambae yumi kasem taem yumi lukluk ol program blong Internet.

²⁶ Long saed ya, i waes blong putum tingting blong yumi i stap long ol samting long saed blong spirit mo long ol samting we oli impoten blong givhan long Kristin laef blong yumi. Blong mekem olsem, yumi mas mekem sam stret disisen long saed blong wanem kaen infomesen we yumi save spenem taem mo tingting blong yumi long hem. Taswe, samting we i impoten long laef blong yumi ol Kristin i laenap wetem tok blong Jisas Kraes, se: “Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen hem i save givim olgeta samting ya tu long yufala.” (Mat. 6:​33) !Bambae yu harem gud moa taem laef blong yu i bisi wetem ol wok blong Kingdom i bitim enikaen narafala samting!

²⁷ E-Mail Mesej Tru Long Internet: I stret nomo blong serem ekspiryens no tingting blong yumi wetem ol famle mo fren we oli laef longwe. Be, ?i stret blong mekem olsem wetem ol man we oli no save ol famle mo fren blong yumi? ?I stret blong raetem ol toktok ya long kompyuta blong olgeta man oli save ridim? ?I stret blong mekem kopi blong ol mesej ya long saed blong prapa laef blong yu mo sanem i go long enikaen man we maet yu no save? Long sem fasin, sipos yu kasem mesej blong narafala man we i no blong yu ridim, ?i stret blong yu pasem ol mesej ya oli go long narafala man bakegen?

²⁸ ?Olsem wanem sipos ekspiryens we yu pasem long mesej, i giaman? Taem yu pasem mesej ya i go, ?maet yu stap sapotem wan bigfala giaman? (Prov. 12:19; 21:28; 30:8; Kol. 3:9) I sua se taem yumi lukaot gud ‘long fasin blong yumi, blong yumi no mekem fasin blong man we i no gat hed, be yumi mekem fasin blong man we i waes,’ samting ya i save pusum yumi blong tingbaot samting ya. (Efes. 5:​15) Yumi glad tumas se ol Yearbook, Wajtaoa, mo Wekap! oli fulap wetem sam trufala ekspiryens we oli leftemap tingting blong yumi mo pusum yumi blong gohed blong wokbaot long “rod” ya.​—Aes. 30:20, 21.

²⁹ I gat wan narafala denja bakegen. Aposol Pol i tokbaot samfala, i se: “Oli save lanem fasin blong go olbaot long ol haos blong storian blong nating nomo. Mo biaen, bambae oli save kam mowas, nao oli save kam woman [no man] blong mekem toktok, we oli stap go insaed long bisnes blong ol narafala man, nao oli stap talem ol samting we oli no gat raet blong talem.” (1 Tim. 5:​13) Samting ya i laenap wetem fasin blong spenem taem mo paoa blong yumi blong pasem ol infomesen we oli no impoten long ol brata blong yumi.

³⁰ !Mo tu, tingbaot hamas taem we yu mas spenem blong kasem mo raetem ol mesej long E-mail! Yumi intres long samting we buk ya Data Smog i talem, i se: “Man i spenem plante moa taem long kompyuta, mekem se fasin ya blong yusum E-mail i no moa wan nambawan tul we man i wokem, be i kam olsem wan bigfala baden we i kakae taem blong yumi. I gat plante handred mesej blong ridim mo ansarem, we ol man blong wok, ol fren, mo ol famle oli sanem i kam long yumi, . . . mo we oli tokbaot samting we man i wantem salem.” Buk ya i gohed blong talem se: “Plante man we oli intres bitim mak long saed blong kompyuta, oli gat nogud fasin ya blong sanemaot kwiktaem, enikaen infomesen we oli kasem, i go long narafala man we oli stap long adres buk blong kompyuta blong olgeta​—ol tok fani, ol narakaen stori, ol jen leta, mo plante moa samting olsem.”

³¹ Hemia i kamaot long ol mesej we plante brata oli bin sanem long olgeta tru long E-mail​—ol tok fani mo stori blong laf long saed blong wok blong prij; ol naesfala toktok we oli stanap long bilif blong yumi; ol pijatok we oli kamaot long sam tok long ol asembli no Haos Kingdom; ol ekspiryens blong wok blong prij; mo plante samting bakegen olsem, we maet oli gud nomo. Plante taem yumi kwik blong sanem olkaen mesej ya oli go long narafala man, bifo we yumi jekem stamba blong hem, from samting ya i hadwok blong faenemaot rili hu i sanemaot mesej ya fastaem, ale, samting ya i mas mekem yumi askem long yumi wan se mesej ya i tru no i giaman.​—Prov. 22:20, 21.

³² Ol mesej ya we plante taem oli no impoten tumas, oli no laenap wetem ol tok we Pol i tokbaot taem hem i raet i go long Timoti, i se: “Yu yu mas holemstrong ol tok ya we mi mi tijim yu finis long hem. Ol tok ya i stret gud, mo i blong soemaot rod long yu, blong yu save folem ol fasin blong bilif mo blong lavem ol man. Ol fasin ya, yumi stap folem from we yumi joen long Jisas Kraes.” (2 Tim. 1:​13) “Klin lanwis” we i minim olgeta trutok blong Baebol, hemia nao ‘ol tok we oli stret gud, mo we oli soemaot rod’ long yumi. Ol tok ya oli stanap long stamba tok ya blong Baebol long saed blong hae rul blong God we bambae i win tru long Kingdom. (Sef. 3:​9, NW) Yumi mas traehad blong yusum olgeta taem mo paoa we yumi gat blong sapotem hae rul ya blong Jeova.

³³ From we yumi stap long taem we klosap wol ya i finis, i no taem naoia blong slip. Baebol i givim woning ya long yumi se: “Yufala i mas lukaot gud. Yufala i mas rere, from we enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigwan, i stap lukaot man blong i kakae.” (1 Pita 5:8) Baebol i talem tu se: “Yufala i mas putum olgeta klos blong faet, we God i givim long yufala blong bambae yufala i save stanap strong agens long ol giaman trik blong Setan.”​—Efes. 6:​11, NW.

³⁴ Sipos yumi bitim mak long fasin blong yumi blong yusum Internet, bambae Setan i save yusum rod ya blong winim yumi. I tru se Internet i save mekem plante samting lelebet, be i gat denja sipos yumi no lukaot long samting we yumi stap lukluk. Ol papa mama oli nidim moa blong tingbaot ol samting mo pleplei we pikinini blong olgeta i yusum long Internet.

³⁵ Sipos yumi holem wan tingting we i skelgud long saed blong Internet hemia i save protektem yumi. Yumi glad long stret advaes blong Pol se: “Man we i stap mekem ol bisnes long wol, i gud hem i stap olsem we ol bisnes ya i nating nomo long hem. Mi mi tok olsem from we wol ya wetem ol fasin blong hem, bambae i no longtaem hem i lus.” (1 Kor. 7:​29-31) Sipos yumi tingbaot ol samting ya, bambae yumi mo famle blong yumi i naf blong stanap strong mo no letem ol samting blong wol, we i minim Internet tu, oli pulum tingting blong yumi.

³⁶ I impoten tumas blong stap klosap long ol brata blong yumi long kongregesen. Mo yumi waesgud taem yumi yusum sot taem we i stap blong gohed moa long ol wok blong Kingdom. Klosap nao wol ya bambae i lus. Taswe, i gud blong “no moa folem ol fasin blong ol hiten man, we tingting blong olgeta i krangke nomo.” Defren nao, yumi mas ‘traem save olgeta samting we Masta blong yumi i wantem blong yumi mekem.’​—Efes. 4:​17; 5:​17.